Գետը հասնենք՝ նոր բոբիկանանք. խորհուրդ է տալիս Պնախարար Սերժ Սարգսյանը

Տպագրվել է «Հայկական Ժամանակ» օրաթերթի՝ 2004 թվականի դեկտեմբերի 9-ի համարում

Վերջին շրջանում Հայաստանի ներքաղաքական կյանքում ամենահրատապ խնդիրներից մեկը կրկին դարձել է ԼՂՀ խնդրի կարգավորման շուրջ ընթացող բանակցություների թեման: Այս առնչությամբ մոտ երկու շաբաթ առաջ իր տեսակետն արտահայտեց նաեւ ՀՀ առաջին նախագահ Լեւոն Տեր-Պետրոսյանը: Զուգահեռ լուրեր են պարբերաբար շրջանառության մեջ դրվում գրավյալ տարածքների մի մասը Ադրբեջանին վերադարձնելու մասին: Երեկ ՍԴ ժամանած պաշտպանության նախարար Սերժ Սարգսյանից փորձեցինք պարզել նրա կարծիքը վերոբերյալ խնդիրների եւ մի քանի այլ հարցերի շուրջ:

- Պարոն Սարգսյան, ինչպե՞ս եք վերաբերվում տարածքները վերադարձնելու մասին լուրերին, եւ ձեր կարծիքն այս առնչությամբ ինչպիսի՞ն է:

- Անընդհատ տարբեր լուրեր են շրջանառության մեջ դրվում: Պարբերաբար լուրեր են տարածվում՝ իբր արդեն նույնիսկ փաստաթուղթ կա ստորագրված, իբր արդեն տվել են հողերը: Նման անլուրջ մոտեցումները տպագրվում են նաեւ մամուլում: Մեկ անգամ չէ, որ ես իմ կարծիքն արտահայտել եմ: Կան երեք սկզբունքներ, որոնց առկայության պայմաններում մենք կգնանք Ղարաբաղի խնդրի լուծման. ԼՂՀ-ն այլեւս չի կարող լինել Ադրբեջանի ենթակայության տակ, Ղարաբաղը Հայաստանի հետ պետք է ունենա ցամաքային սահման, եւ անհրաժեշտ է, որ լինեն Ղարաբաղի անվտանգության հզոր երաշխիքներ, այդ թվում՝ պատերազմի վերսկսման բացառում:

- ՀՀ առաջին նախագահ Լեւոն Տեր-Պետրոսյանը ԼՂՀ խնդրի կարգավորման շուրջ 1998թ. հետո ՀՀ իշխանությունների  վարած քաղաքականությունը գնահատել է բացասական, նրա խոսքից ակնհայտ է դառնում, որ Հայաստանն այս հարցում հայտնվել է գրեթե փակուղում: Դուք ի՞նչ կասեք այս առնչությամբ:

- Յուրաքանչյուր ոք իրավունք ունի կարծիք արտահայտելու, այդ թվում՝ նաեւ ես: Իմ համոզմամբ՝ մենք որեւէ փակուղու առջեւ կանգնած չենք: Բազմաթիվ անգամներ են եղել, երբ տարբեր տեսակի լուրեր են տարածվել՝ սկսած Մեղրին հանձնելուց, վերջացրած ինչ-որ արտառոց երեւույթներով, որոնք հետագայում բնականաբար չեն հաստատվել: Իսկ որոշ մարդիկ ասել են (ես բացարձակապես Լեւոն Տեր-Պետրոսյանին նկատի չունեմ. դուք էլ գիտեք, որ նա երկար ժամանակ լռում էր), որ իրենց ակտիվ գործողությունների շնորհիվ եւ ջանքերով, իբր, այդ խնդիրը (Մեղրիի հանձնումը կամ Հայաստանի շահերին հակասող որեւէ այլ տարբերակ-Վ.Հ.) չլուծվեց: Հավատացնում եմ ձեզ, որ նման խնդիրներ չեն եղել եւ չեն կարող լինել. այսօր փակուղու մասին խոսելն անհիմն է:

- Ամեն դեպքում Տեր-Պետրոսյանը բանակցություների ընթացքը գնահատել է բացասական. դու՞ք ինչ կարծիքի եք:

- Անպայման ցանկանում եք, որ ես Լեւոն Տեր-Պետրոսյանի մասին կարծիք հայտնեմ: Ես ուզում եմ ընդհանրացնել եւ ասել, որ այսօր Հայաստանը որեւէ փակուղու առջեւ կանգնած չէ, այսօր Հայաստանը բոլոր պարամետրերով շատ ավելի զարգացած երկիր է, քան նախորդ տարի, քան 2002-ին, 2001-ին, 93-ին կամ 91-ին: Սա ակնհայտ է, իսկ ով չի ուզում սա տեսնել՝ դա իր խնդիրն է, ով ուզում է ինչ-որ խնդիրների վրա չարախնդալ՝ էլի իր խնդիրն է, ով ուզում է պայծառ կետ տեսնել, հույս տեսնել, որպեսզի նաեւ իր հետեւից հույս ունեցողների զանգված առաջացնի՝ դա եւս նրա խնդիրն է:

- Չե՞ք կարծում, որ վերջին շրջանում Հայաստանի քաղաքական իշխանությանը կարծես չի հաջողվում կարեւոր խնդիրների վերաբերյալ համաձայնության գալ եւ որոշում կայացնել: Oրինակ՝ ԸՕ-ի շուրջ տեղի ունեցող գործընթացները:

- Առաջին անգամ եմ նման կարծիք լսում: Ընդհակառակը, ոնց որ թե միշտ ասում էիք, որ Հայաստանում որոշումները միանձնյա են կայացվում, երկանձնյա են կայացվում: Նման երեւույթ չկա: ԸՕ-ի քվեարկությունը հետաձգվեց, որովհետեւ անհրաժեշտ է առաջին ընթերցմամբ ընդունված նախագիծն ուղարկել միջազգային փորձագետների ստուգմանը, որպեսզի վաղը չասեն՝ այս օրենքը միջազգային չափանիշներին չի համապատասխանում: Դեպքեր են լինում, որ անհրաժեշտ է թուղթ ունենալ, թե այս օրենքը լավն է, որպեսզի հետագայում խնդիրներ չառաջանան:

- Ինչպես եք վերաբերվում նոր ֆորմատով ընդդիմության ձեւավորման պրոցեսին, որը փաստացի խոստանում է լինել արեւմտամետ արժեքներ կրող քաղաքական ուժ, որի ստեղծումը, ենթադրվում է, հիմնականում պայմանավորված է Վրաստանում եւ Ուկրաինայում տեղի ունեցած զարգացումներով:

- Ընդհանրապես գունափոխությունը ես համարում եմ շատ վատ երեւույթ: Չեմ կարծում, որ հայտարարությունը կողմնորոշման մասին՝ կարող է հիմք հանդիսանալ գնահատականների համար: Գնահատականների տեղիք կարող են տալ գործողությունները. կապրենք՝ կտեսնենք: Իսկ ո՞վ է ասել, որ արեւմտամետությունը վատ է: Հասարակության մեջ պետք է լինեն մարդիկ, որոնք լինեն արեւմտյան, հարավային, հյուսիսային արժեքների կրողներ: Այստեղ ես խնդիր չեմ տեսնում: Այդ երկրների ցուցակից (նկատի ունի այն երկրների ցանկը, որտեղ հաղթանակեցին արեւմտամետ քաղաքական ուժերը-Վ.Հ.), չգիտես ինչու, վերջին մի քանի օրերին հանեցին Աբխազիան, այս դեպքում ենթատեքստը պարզ է: Մինչեւ գետը հասնելը՝ պետք չէ բոբիկանալ:

- Պետբյուջեի նախագիծը ԱԺ-ի կողմից հաստատելուց հետո կառավարությունում հնարավոր փոփոխությունների մասին լուրերն, ըստ ձեզ, իրատեսակա՞ն են:

- Նման լուրերի՝ կառավարությունում սպասվող փոփոխությունների մասին ինձ ոչինչ հայտնի չէ: Կարծում եմ՝ ավելի ճիշտ կլինի, որ դրա մասին հարցնեք ՀՀ նախագահին եւ վարչապետին. որեւէ փոփոխության մասին ես տեղյակ չեմ:

Վահագն Հովակիմյան