Շատ ուժեղ համագումար. ՀՌԱԿ-ը, ՀԺԱՄ-ը եւ «Հզոր հայրենիքը» միանում են

Տպագրվել է «Հայկական Ժամանակ» օրաթերթի՝ 2004 թվականի նոյեմբերի 20-ի համարում

Չնայած հերթական ԱԺ ընտրություններին դեռ 2.5 տարի ժամանակ կա, սակայն երեկ Կինոյի տանը տեղի ունեցած ՀԺԱՄ երրորդ համագումարի տպավորությունն այնպիսին էր, որ Հայաստանում որոշ կուսակցություններ ակտիվորեն պատրաստվում են ընտրությունների: Նախ՝ համագումարին հրավիրյալի կարգավիճակով մասնակցող ՀՌԱԿ ատենապետ Հարություն Առաքելյանը հայտարարեց, թե ՀՌԱԿ-ի եւ ՀԺԱՄ-ի համար «համագործակցության առիթներ կան թե՛ գաղափարախոսության, թե՛ քաղաքական մշակույթի կայացման, թե՛ երկրի տնտեսական զարգացման հեռանկարի, թե՛ պետական ազգային մտածողության շրջանակներում»: Ապա «Հզոր հայրենիք» կուսակցության նախագահ, Երեւանի նախկին փոխքաղաքապետ Վարդան Վարդապետյանը ավելի հստակորեն խոսեց ՀԺԱՄ-ի, ՀՌԱԿ-ի եւ «Հզոր հայրենիք»-ի համագործակցության մասին:

«Ինչպես տեղյակ եք, ՀԺԱՄ-ը, ՀՌԱԿ-ը եւ «Հզոր հայրենիք» կուսակցությունը 2003 թվականի խորհրդարանական ընտրություններում պաշտոնապես հավաքել են 10 տոկոսից ավելի ձայն: Ենթադրվում է, որ համատեղ հանդես գալու պարագայում՝ մենք կդառնանք ավելի ազդեցիկ գործոն, եւ այդ պատճառով նախաձեռնել ենք քաղաքական համագործակցություն, որը կդառնա նոր քաղաքական կռվան՝ երկրի հետագա քաղաքական կյանքում»,- հայտարարեց Վ. Վարդապետյանը: Նախկին փոխքաղաքապետը մանրամասնեց, որ իրենց քաղաքական համագործակցության նպատակը լինելու է ազգային պետական խնդիրների գերակայության ապահովումը, առանց ցնցումների առաջընթացը, երկրում քաղաքական հանդուրժողականության մթնոլորտի ապահովման եւ քաղաքական մշակույթի ապահովումը: Համագործակցության մասին խոսեց նաեւ ՀԺԱՄ նախագահ, Ռոբերտ Քոչարյանի խորհրդական Սեյրան Ավագյանը:

Նա կանխատեսեց, որ իրենց համագործակցությունը հաղթանակելու է, եւ հաղթանակը լինելու է մոտ ապագայում: Ճիշտ է, Ավագյանի ելույթը ընդհանուր առմամբ հիշեցնում էր Հայաստանի սահմանամերձ գյուղերից մեկի տարրական դասարանի դասվարի խոսք՝ մեր երկրի ծանր վիճակի, աղքատության եւ պայծառ ապագայի հանդեպ չկորցրած հույսի թեմայով: Մասնավորապես՝ Ավագյանը երկրում առկա աղքատության բարձր մակարդակը բացատրեց այսպես. «42% աղքատության պատճառը կոմունիստական հասարակության պարտության ճանաչումն էր աշխարհում, այդ պարտությունը մեր ժողովրդի համար ունեցավ ե՛ւ մեծ կորուստներ, ե՛ւ մեծ ձեռքբերումներ»: Խոսելով աշխարհաքաղաքական զարգացումների մասին՝ Ս.Ավագյանն ասաց, որ պատմությունը կրկնվում է, քանի որ, ինչպես նախորդ դարի սկզբին, հայ ժողովուրդը դիմում է աշխարհի մեծերին՝ իր արդարությունը պաշտպանելու համար, սակայն պարզվում է, որ դարձյալ վճռորոշը շահերն են՝ նավթային դոլարները:

ԼՂ հարցում Ավագյանը կոչ է անում մերժել «կկվային քաղաքականությունը», ըստ որի՝ պետք է ինչ-որ բան զիջել՝ մնացածը պահելու համար: Թերեւս, այս մտքերը արտասանելիս Ս.Ավագյանն արտահայտում էր առավելապես ՀԺԱՄ տեսակետները, սակայն իր ելույթի առանձին հատվածներ եւ առանձին շեշտադրումներ Քոչարյանի խորհրդականն անում էր նախագահական նստավայրում առկա ազդեցությունների տակ: Նախ, խոսելով ՀԺԱՄ եւ Ռ.Քոչարրյան հարաբերությունների մասին, Ավագյանը հայտարարեց, որ ՀԺԱՄ-ի եւ Քոչարյանի հռչակած նպատակները ներդաշնակ են: Սակայն ավելացրեց, որ նույնը չի կարելի ասել ՀԺԱՄ-կոալիցիա հարաբերությունների մասին: «Մենք չենք ուզում չնկատել եւ չբարձրացնել կոռուպցիայի եւ կաշառակերության այն հսկայական քափը, որ այսօր կա այդ կառույցում: Մենք դա շատ լավ ենք տեսնում»,- ասում է Ս.Ավագյանը:

Նա, որպես Ռոբերտ Քոչարյանին մոտ կանգնած մարդ, հավատացնում է, որ իր շեֆը այդ ամենի հետ կապ չունի, որովհետեւ. «Այն պահվածքը եւ վերաբերմունքը, որը հռչակում է հանրապետության նախագահը, որը առաջադրում է մնացածներին եւ կյանքում, հանկարծ շուռ ենք գալիս եւ տեսնում ենք, որ՝ լինի դա ԱԺ-ն, թե կառավարության օղակները, այդ հորդորներն իրական կյանքի չեն վերածվում»: Ասվածից Ս.Ավագյանը հետեւություն չարեց, որ պետք է լուծարել ԱԺ-ն կամ ցրել կառավարությունը, բայց դիմելով ՀՌԱԿ-ի եւ «Հզոր հայրենիք»-ի նախագահներին՝ հայտարարեց, որ միասին են առաջնորդելու հասարակությանը: Իհարկե, նման պատրաստակամությունը կարելի էր ողջունելի համարել, եթե ՀԺԱՄ-ը կարողանար գոնե Կինոյի տան դահլիճը լցնել սեփական անդամներով:

Թեեւ համագումարի սկզբում լեփլեցուն էին նույնիսկ միջանցքները, սակայն պարզվեց, որ դրանք հիմնականում «Հայբուսակ» եւ «Երեւանի հյուսիսային համալսարանի» ուսանողներն էին՝ իրենց ռեկտորներ Անահիտ Հարությունյանի եւ Բորիս Մակիչյանի գլխավորությամբ: Ի դեպ, Ա.Հարությունյանն իր ողջունի խոսքում անձնական երջանկություն մաղթեց ՀԺԱՄ-ականներին՝ ցանկանալով, որ նրանք «գոհ լինեն իրենց այսօրվա ապրած կյանքից»: Ի դեպ, ՀԺԱՄ համագումարը շարունակվելու է նաեւ այսօր եւ վաղը, որի արդյունքում ընտրվելու է ղեկավար մարմին, եւ ճշգրտվելու է կուսակցության քաղաքական գիծը:

Ավետիս Բաբաջանյան