ՀՀԿ-ն տեղեկատվական բադիկներ է բաց թողնում. նոր կոալիցիայի հարցը դեռ հեռվում է

Վերջին օրերին նորից թափ հավաքեցին ՀՀԿ-ԲՀԿ կոալիցիայի հավանականության մասին խոսակցությունները: Այս հարցը օրակարգից դուրս չի գալիս Գագիկ Ծառուկյանի՝ քաղաքականություն վերադառնալուց հետո: Ու սա պատահական ու զարմանալի չէ՝ վերջիվերջո խոսքը խորհրդարանում մեծությամբ երկրորդ քաղաքական ուժի մասին է, որի այս կամ այն որոշումը կարող է ազդել քաղաքական օրակարգի վրա: Armtimes.com-ն ԱԺ ՀՀԿ խմբակցության քարտուղար Գագիկ Մելիքյանից հետաքրքրվեց, թե ինչ-որ քննարկումներ, գործընթացներ կա՞ն այլ ուժերի հետ համագործակցության առումով, ինչին պատգամավորը պատասխանեց, որ Հանրապետականը միշտ պատրաստ է եղել ու միշտ էլ պատրաստ է բոլոր քաղաքական ուժերի հետ համագործակցել՝ թե՛ խորհրդարանական, թե՛  արտախորհրդարանական, թե՛ իշխանական, թե՛ ոչ իշխանական:

Նման մեկնաբանություններն, իհարկե, բավականին չեզոք են, ոչ մի կոնկրետ բան չեն ասում, բայց չեն էլ հերքում: Այսպես սովորաբար, լինում են այն դեպքերում, երբ տվյալ հարցի շուրջ հստակություն չկա, կամ կա, բայց պատասխանողին տեսանելի չէ, կամ դրա մասին բարձրաձայն խոսելու ժամանակը չէ: Քաղաքական կուլիսներում նաեւ շրջանառվում են այնպիսի տեսակետներ, թե հիմա ՀՀԿ-ում «փորձնական բադեր»-ի ժամանակներն են:

Այսինքն՝ վերջնական որոշումներ կայացնողներն այս կամ այն տեղեկատվությունը «պատահաբար» նետում են դաշտ ու փորձում հասկանալ, թե ինչ արձագանք, վերաբերմունք են դրանք գտնում, թե՛ սեփական թիմի, թե՛ գործընկերների, իսկ այս դեպքում՝ կոալիցիոն գործընկեր ՀՅԴ-ի կողմից:

Ու այս առումով հիմա գոնե կուլիսներում նաեւ խոսակցություններ են շրջանառվում, որ անգամ ՀՀԿ-ում ԲՀԿ-ի կամ «Ծառուկյան» դաշինքի հետ որեւէ ձեւաչափով կոալիցիայի հարցը սկզբունքային չէ, այն կլինի, եթե ՀՀԿ-ին այդ կոալիցիան տվյալ պահին ու տվյալ քաղաքական պայմաններում պետք լինի, ու կլինի այն ձեւաչափով, որը տվյալ պահին անհրաժեշտ կլինի քաղաքական մեծամասնությանը: Դրա համար ՀՀԿ-ականները «սողացող» պատասխաններ են տալիս նման հարցերի կապակցությամբ, քանի որ չգիտեն՝ թե ինչպիսի քաղաքական օրակարգ կարող է ձեւավորվել, օրինակ, 2018 թվականի ապրիլին ընդառաջ:  

armtimes.com-ի հետ զրույցում նոր կոալիցիաների հնարավորության ու մասնավորապես՝ ԲՀԿ-ի հետ կոալիցիա կազմելու հարցի վերաբերյալ ՀՀԿ փոխնախագահ, ԱԺ ՀՀԿ խմբակցության պատգամավոր Արմեն Աշոտյանը նշեց. «Կարծում եմ, որ գործող կոալիցիան արդյունավետ գործում է այն ժամանակահատվածում, որի համար ստեղծվել է: Եթե կարիք լինի քաղաքական ձեւաչափերի փոփոխության, ապա քաղաքական կոնսուլտացիաների միջոցով դրա մասին կբարձրաձայնվի: Այս պահին գործող կոալիցիան ամբողջությամբ իրականացնում է հուշագրով ստանձնած լիազորությունները»:

Ի դեպ՝ հանրապետականները բավականին վստահ են իրենց պահում ԲՀԿ-ի կամ «Ծառուկյան» դաշինքի հետ կոալիցիա կազմել-չկազմելու հարցով ու իրենց համարում են իրադրության տերը. ասել է թե՝ իրենք կուզեն՝ կլինի կոալիցիա, չուզեն՝ չի լինի՝ ըստ տվյալ պահի նպատակահարմարության:

ԱԺ «Ծառուկյան» խմբակցության պատգամավոր, Գագիկ Ծառուկյանի մամուլի խոսնակ Իվետա Տոնոյանը armtimes.com-ին ասաց.  «Այս հարցի կապակցությամբ Գագիկ Ծառուկյանի ասածին ավելացնելու բան չունեմ, բայց մեկ անգամ եւս վերահաստատեմ պարոն Ծառուկյանի այն ասածը, որ որեւէ քննարկում տեղի չի ունեցել ԲՀԿ-ի Ծառուկյան դաշինքի եւ ՀՀԿ-ի միջեւ, ինչի մասին պարոն Ծառուկյանն ԱԺ-ում լրագրողների հետ հարցուպատասխանի ժամանակ նշել է: Այս պահին՝ այսքանը: Հավանականությունների տեսություններով առաջնորդվելով՝ եթե, ապա, միգուցե, հնարավոր է, բացառվում է, չի բացառվում եւ այլն, այս սկզբունքով չեմ ուզում առաջնորդվել. կապրենք՝ կտեսնենք: Կարծում եմ, որ եթե որեւէ տեղաշարժ լինի այս թեմայի հետ կապված, այդ մասին հանրությունն անպայման տեղյակ կլինի»:

Իվետա Տոնոյանը նաեւ նշեց, թե սա անձնական ցանկությունների կամ ճաշակի հարց չէ, այլ քաղաքական գործընթաց, ու նման քննարկումների դեպքում տեղեկատվություն վստահաբար կլինի:  Ասել է թե, ոչ ոք միանշանակ չի բացառում, թե որեւէ կոալիցիա կլինի, ամեն դեպքում՝ դեռ այն լայն քննարկման կամ օրակարգային հարց չէ: