Կարեն Կարապետյանի կոնկրետ, բայց ուշացած հայտը. 2018-ի դուռը նրա առաջ խնամքով փակվում է

Վարչապետ Կարեն Կարապետյանի շուրջ օղակը կարծես սեղմվում է: Հայաստանյան վերջին ներքաղաքական բոլոր պրոցեսների հիմքում մի խնդիր է. Կարեն Կարապետյանին զրկել 2018-ից հետո իշխանությունը ստանձնելու թեկուզ չնչին հնարավորությունից: Դրա համար անհրաժեշտ է, որպեսզի ապրիլի 2-ի ընտրությունների արդյունքում ձեւավորվելիք կառավարությունը, ԱԺ նախագահությունը, ինչպես նաեւ կառավարությանն առընթեր մարմինները Կարեն Կարապետյանի քաղաքական վերահսկողության տակ ընկնելու հեռանկարից հնարավորինս ապահովագրված լինեն:

Այս հանգամանքով են պայմանավորված ՀՀԿ-ՀՅԴ կոալիցիայի շուրջ գործընթացները, Կարեն Կարապետյանի եւ ՀՀԴ-ի միջեւ լարվածության հրահրումը, «Ծառուկյան» դաշինքի շուրջ ծավալվող իրադարձությունները, նախկին վարչապետ Հովիկ Աբրահամյանի ակտիվությունները:

Հովիկ Աբրահամյանը, մասնավորապես, փորձեց օգտվել Կարեն Կարապետյանի դեմ Սերժ Սարգսյանի տրամադրություններից եւ, ըստ էության, իր ծառայություններն առաջարկեց: Մոտավորապես հետեւյալ ձեւակերպմամբ` միասին պայքարենք մայր գետերն աղտոտող տեխնոլոգիական գործարաների խառնուրդային ջրերի դեմ: Բայց քանի որ Աբրահամյանի հեռահար նպատակներն այլ էին, այդ առաջարկությունը Սերժ Սարգսյանը մերժեց:

Ենթադրվում է, որ Կարեն Կարապետյանին հիմնական հարվածը կհասցվի ՀՀԿ-ՀՅԴ`ժամեր անց ստորագրվելիք կոալիցիոն համաձայնագրի տեքստով, որով Դաշնակցությունը իշխանության իրական եւ ավելի ընդգրկուն փաթեթ կստանա: Եթե ԱԺ նախագահն ու փոխնախագահներն էլ վարչապետի ազդեցության գոտուց չլինեն, նրան կմնա իր նշանակած նախարարներով նախարարությունների մենեջմենթով զբաղվել: Վարչապետի վրա ծանրացած է նաեւ միլիարդավոր դոլարների ներդրումների խոստումը եւ մինչեւ 2018 թվականը նա ստիպված կլինի բերել այդ ներդրումները կամ բացատրություններ ներկայացնել, թե ինչու դա չի հաջողվում:

Նախօրեին Կարապետյանը Հաղթանակի զբոսայգում լրագրողներին ասաց, որ դեմ չի լինի, որ Կարեն Կարապետյանը ստանձնի ԱԺ նախագահի պաշտոնը: Խոսքը ռուսաստանաբնակ գործարար Սամվել Կարապետյանի եղբոր մասին է: Դա այնքան էլ հավանական չի համարվում:

Երեկ «Մեդիամաքսի» հրապարակած հարցազրույցում, որը վարչապետը տվել է Ավստրիայի Հանրային ռադիոյին, նա ասում է, որ պատրաստ է 2018-ից հետո մնալ վարչապետ եւ դառնալ Հայաստանի ղեկավարը:

Կարեն Կարապետյանը նախկինում էլ առիթ ունեցել էր հայտարարելու, որ իրեն 2018-ից հետո էլ է տեսնում վարչապետի պաշտոնում, սակայն այն ժամանակ խոսակցությունը շատ ավելի տեսական էր: Ավստրիայի հանրային ռադիոյի թղթակիցը շատ տարօրինակ կերպով խոսակցությունը բերել է ռեալ դաշտ եւ վարչապետին ուղղել է այս առումով  Հայաստանում ամենամտահոգիչ համարվող հարցերը, որոնք հիմքում այն է, թե Կարեն Կարապետյանը Ազգային անվտանգության սպառնալիք է Հայաստանի համար՝ հաշվի առնելով իր ռուսական հետքը, ռուսական կոռումպացված համակարգում երկար տարիների աշխատանքը եւ այլն: 

Պարզվում է՝ Կարեն Կարապետյանը ցանկանում է փարատել այս մտահոգությունները: «Անցյալում Դուք Գազպրոմի մենեջեր էիք ։ Դուք կարո՞ղ եք Մոսկվայից բացարձակ անկախ որոշումներ ընդունել»,- հարցին նա պատասխանում է. «Աշխատելով Գազպրոմում, ես շատ լավ հարաբերություններ եմ հաստատել եւ ընկերություն եմ անում շատ մարդկանց հետ։ Բայց դա չի նշանակում, որ այդ ընկերությունը կարող է վնասել Հայաստանի ազգային շահերին։ Հակառակը՝ այն կարող է օգնել լուծումներ գտնել որոշ բարդ իրավիճակներում»:

Մի փոքր ավելի քաղաքականացված լինելու դեպքում վարչապետը կհասկանար, որ այսպիսի պատասխանը համոզիչ չի հնչում, եւ նույնիսկ ավելի է ամրապնդում այդ մտահոգությունները: Նա նաեւ չի թաքցնում, որ դժգոհ է Սերժ Սարգսյանի`որոշումներ կայացնելու ոճից: Սա Կարապետյանի քաղաքական կարիերայում ամենացավոտ կետն է: Հարցին, թե ինչպիսին է տեսնում Հայաստանը 5 տարի անց, ինչը պետք է փոխվի, վարչապետը պատասխանում է. «Հինգ տարի հետո Հայաստանում շատ բան պետք է փոխվի` որոշումներ կայացնելու ընթացակարգը, հասարակության եւ էլիտայի հարաբերությունները, հասարակական կյանքում էլիտայի տեղի ընկալումը, մեր քաղաքացիների կրթության մակարդակը, բիզնեսի վարման պայմանները»։

Խոսքը, բնականաբար, իր ղեկավարության ներքո սպասվող փոփոխությունների մասին է: Կարելի էր կանխատեսումներ անել, թե արդյո՞ք Կարեն Կարապետյանին կհաջողվի այս փոփոխություններն իրականություն դարձնել, կամ արդյոք դժվար իրավիճակները Մոսկվայի ընկերների օգնությամբ լուծելն իսկապես կբխե՞ր Հայաստանի ազգային շահերից:

Սակայն Հայաստանում կատարվող քաղաքական պրոցեսների տրամաբանությունը հուշում է, որ դա ժամանակի անտեղի կորուստ կլինի, որովհետեւ 2018-ից հետո ով ով, բայց Կարեն Կարապետյանը Հայաստանի ղեկավարը չի լինի:

Տպել
3664 դիտում

Սիմֆոնիկ նվագախումբը կներկայացնի Ջեքսոնի հիթերը դասական մոտեցմամբ. համերգը նախորդ տարի հետաձգվել էր

ԱՄՆ Սենատում երկրորդ անգամ է վետո դրվել Հայոց ցեղասպանությունը ճանաչող բանաձևի վրա

Նոր օրինագծով հայոց լեզվի քննությունը բուհ ընդունվելիս պարտադիր կլինի, իսկ մինչ այդ խախտվում է «Լեզվի մասին» օրենքը

Չարենցավանի բժշկական կենտրոնի շուրջ 15 տարի լքված մասնաշենքը հիմնանորոգվել է

Իսրայելի գործող վարչապետ Բենյամին Նեթանյահուին պաշտոնական մեղադրանք է առաջադրվել

Փոքր եւ միջին ջերմատնային տնտեսությունների ներդրման պետական աջակցության ծրագիրը բացասական կողմեր չունի. գյուղատնտես

ԱԻՆ գլխավոր քարտուղար Վահագն Օհանյանը շրջայց է կատարել հրշեջ-փրկարարական ջոկատներում. ԱԻՆ

Քննարկվել են «Կուսակցությունների մասին» ՀՀ օրենքում առաջարկվող փոփոխությունները

ԱԻՆ-ում տեղի ունեցավ պաշտոնների նշանակման և հերթական կոչումների շնորհման հանդիսավոր արարողություն

Աղմուկ հանած եւ Կինոկենտրոնից 16 միլիոն դրամ ստացած «Չնչիկ»-ն այս տարի էլ մեծ էկրան չի բարձրանա

Վանաձորի՝ անձրեւի ժամանակ հեղեղվող դպրոցի տանիքը վերջապես կփոխվի (լուսանկարներ)

Նախագահ Արմեն Սարգսյանը հանդիպել է Ուկրաինայի վարչապետ Օլեքսի Հոնչարուկին

Խաշմանյանը պետք է ներողություն խնդրեր երկրպագուներից ու հրաժարական տար. Լեւոն Պաչաջյան

Իտալիայի վարչապետի հետ ունեցանք բովանդակալից և արդյունավետ բանակցություններ. վարչապետ

Ոստիկանները հայտնաբերել են նարկոլոգիական կենտրոնում հաշվառված վարորդների (տեսանյութ)

10-ից ավելի միկրոավտոբուս տեղափոխվել է ճանապարհային ոստիկանության պահպանող հատուկ տարածք. հայտնաբերվել են դանակներ

ԱԺ նախագահը մասնակցել է ԱՊՀ միջխորհրդարանական վեհաժողովի խորհրդի նիստին

ՖԱՖ եւ «Red Eagles» ֆան-ակումբները գիտեն՝ ՀՖՖ ինչպիսի նախագահ են ուզում

Ապօրինի ծառահատումներ Լոռու մարզում. ՀՀ ոստիկանություն

Եթե նախարարի հետ ուսանողների հանդիպում ծրագրվի, ուսանողները նրան կսպասեն ԵՊՀ-ում. դասախոսների ընդունելությունից դժգոհ են