Թող տառապեմ. Գեղամյանը հորդորում է չշտապել

Տպագրվել է «Հայկական Ժամանակ» օրաթերթի՝ 2004 թվականի հունվարի 23-ի համարում

Երեկ «Ազգային միաբանություն» կուսակցության ղեկավարությունը Կինոյի տանը հանդիպեց կուսակցության Երեւանի քաղաքային ակտիվի հետ: Այս միջոցառմանը նախորդել էին հունվարի 19-ի եւ 20-ի այցելություններն Արմավիրի եւ Մարտունու շրջանի գյուղեր, որոնց ընթացքում կուսակցությունը ծանոթացել էր, թե «ինչ հոգսերով են ծանրաբեռնված մարդիկ, ինչ չլուծված խնդիրներ եւ հոգսեր ունեն»:

Այդ այցելություններից ստացած իրենց տպավորությունների մասին խոսելով՝ «ԱՄ» փոխնախագահ Կորյուն Առաքելյանը հայտարարեց, որ ժողովուրդը պատրաստ է կանգնել իրենց կողքին եւ պայքարել իշխանափոխության համար: Կուսակցության նախագահ Արտաշես Գեղամյանը եւս, շփվելով մարդկանց հետ, համոզվել է, որ չնայած համընդհանուր աղքատությանը, որոշակի հուսահատությանը՝ «մարդկանց աչքերի մեջ դեռ հույս կա»: Սակայն մինչ իշխանափոխության խնդրին անդրադառնալը, պարոն Գեղամյանը հիշեց մեկ տարվա վաղեմություն ունեցող խնդիրները՝ ներկաներին պատմելով, թե ինչպես էին իշխանությունները փորձում իր շրջապատին վերագրել Տիգրան Նաղդալյանի սպանությունը, ապա՝ Արբակ Խաչատրյանի ձերբակալությունը, իսկ վերջերս նաեւ Սերժ Սարգսյանի դեմ Լեւոն Աբրահամյանի կողմից իբրեւ թե կազմակերպված մահափորձի հրահանգավորումը:

Իր ելույթում Գեղամյանը հիշատակեց սպառողական գների եւ հատկապես հացի գնի կտրուկ բարձրացումը` կարծիք հայտնելով, որ դրա համար որեւէ պատճառ չկար, քանի որ, ըստ նրա, եթե Հայաստանի Ազգային անվտանգության խորհուրդի քարտուղար Սերժ Սարգսյանը, Մոնտե Կառլոյի կազինոներում հսկայական գումարներ «ղումարում» տանուլ տալու փոխարեն, այդ գումարով ցորեն գներ եւ պահեստավորեր, ապա այսօր Հայաստանում հացի գները բարձրացնելու խնդիր չէր առաջանա: Մանրամասն նկարագրելով ժողովրդի սոցիալական վիճակը, համատարած թանկացումներն ու համընդհանուր աղքատացումը՝ Գեղամյանը հայտարարեց, որ դրանով նպատակ ուներ ներկաներին հասկացնելու, որ «իշխանափոխություն ասածը աթոռակռիվ չի, այլ երկիրը փրկելու եզակի ճանապարհ»:

Սակայն Արտաշես Գեղամյանի ելույթի մեխն այն էր, որ իշխանափոխության հարցում ավելորդ շտապողականությունը ոչ միայն օգտակար չէ, այլ նաեւ կարող է վնասել ընդդիմությանը, ժողովրդին եւ երկրին: Գեղամյանը բացատրում էր, որ ընդդիմության շտապողականությամբ շահագրգռված են հատկապես իշխանությունները. «Շուտով իշխանական լրատվամիջոցները հրապարակ կիջեցնեն իրենց իսկ կողմից մշակված այն թեզը, որ ՀՀ-ում սպասվում է թեժ գարուն, ինչպես ասում էին, որ սպասվում է թեժ աշուն: Մեր կուսակցությունը երբեք չի ասել թեժ աշուն է լինելու, թե թեժ գարուն, որովհետեւ մենք հաշվետու ենք մեր գործողությունների համար, որովհետեւ վաղը-մյուս օրը բոլորիդ աչքերի մեջ պետք է նայենք, եւ դուք էլ չպետք է ասեք՝ այս ինչ բախտախնդիր, արկածախնդիր մարդիկ էին»:

Այս հայտարարությամբ «Ազգային միաբանության» նախագահն ըստ էության հասկացրեց, որ եթե մյուս ընդդիմադիր կուսակցությունները մոտ ապագայում իշխանափոխությանն ուղղված քայլեր ձեռնարկեն, ապա իրենք չեն միանա դրան: Արտաշես Գեղամյանը դեմ է նաեւ ընդդիմությանը մեկ տանիքի տակ հավաքելու գաղափարին՝ դա եւս համարելով իշխանությունների թեզը: «Իշխանամետ թերթերը շատ են ընկճվում, որ ընդդիմությունը չի միավորվում: Նույնիսկ Սերժ Սարգսյանն իր ելույթում հոգոց հանելով ասաց, որ շատ կուզենար, որ ընդդիմությունը միանար, որ մենք միասնական ընդդիմություն ունենայինք: Ասած Հակոբ Պարոնյանի. «Չգիտես՝ խնդաս, թե լաս»: Ասես գայլը որսորդին սովորեցնում է, ինչպես իրեն շուրջկալ անի»,- ասում է Արտաշես Գեղամյանը:

Իշխանությունների նման շահագրգռվածությունը նա բացատրում է նրանով, որ իշխանությունները միավորված ընդդիմության շարքերն են մխրճելու մարդ-կուսակցությունների, որոնք, չունենալով կուսակցական կառույցներ եւ կողմնակիցներ, ունեն ընդդիմադիր կուսակցության ղեկավարի եւ ընդդիմադիր գործչի համարում: Ապա ամբողջ ժողովրդին կտրամադրեն, որ միայն միասնական ընդդիմության դեպքում հնարավոր կլինի փոփոխությունների իրականացումը, եւ երբ մարդիկ հույսով լցված կսպասեն, որ ուր որ է տեղի կունենա հանգուցալուծումը, մեկ էլ ընդդիմադիր կոչված այդ գործիչները կսկսեն իրար միս ուտել, իրար վարկաբեկել՝ իշխանություններին հնարավորություն տալով ասել, որ այդ մարդիկ զբաղված են աթոռակռվով, եւ նրանց խնդիրը ոչ թե ժողովրդի հոգսը հոգալն է, այլ աթոռ գրավելը, իսկ նման մարդկանց ետեւից չի կարելի գնալ:

Արտաշես Գեղամյանն իշխանափոխության հարցում չշտապելու իր առաջարկը հիմնավորեց նաեւ նրանով, որ եթե ընդդիմությունը գնա արկածախնդրության ճանապարհով, ապա իշխանություններն իրենց կողմից ձախողված ղարաբաղյան հարցի բանակցային գործընթացի ողջ պատասխանատվությունը կփաթաթեն ժողովրդի եւ ընդդիմության վզին: «Այնպես որ, պետք է իշխանափոխության գնալ մտածված, որ վաղը մյուս օրը խիղճներս հանգիստ լինի», - եզրակացրեց Գեղամյանը: Եւ չնայած նա դեմ է շտապողականությանը, դեմ է նախօրոք թեժ աշուն, թեժ գարուն ձեւակերպումներին, սակայն հանդիպումը եզրափակեց այս խոսքերով. «Այս գարունը՝ գարնան նման է լինելու, ամառը՝ ամռան նման է լինելու: Նախորդ գարուններից ու ամառներից մի բանով է տարբերվելու, որ այս գարունն ու ամառը առանց ձեզ՝ Ռոբերտ Քոչարյանի եւ Սերժ Սարգսյանի ենք դիմավորելու»: Թե ինչպես է դա իրականություն դառնալու, «ԱՄ» նախագահը ոչինչ չասաց:

Ավետիս Բաբաջանյան