Քաղաքապետարանը 2017-ին Թումանյան փողոցում ասֆալտ էլի կանի

Երեւանի փոխքաղաքապետ Կամո Արեյանն այսօր քաղաքապետարանում հրավիրած մամուլի ասուլիսն սկսեց նախապես հիշեցնելով, որ ինքը պատասխանատու է երեք ոլորտի համար՝ շինբարեկարգման, կոմունալ տնտեսության, բնապահպանության եւ սոցիալական ապահովության: Ուղիղ 50 րոպե Կամո Արեյանը պատմեց, թե ի՞նչ աշխատանքներ է կատարել քաղաքապետարանն այս ուղղությամբ 2013-ից 2016 թվականներին, մոռանալով, հավանաբար, որ ասուլիսը հրավիրվել է 2016 թվականի գործունեությունը ներկայացնելու նպատակով: Հիշեցնենք, որ 2013 թվականին Երեւան քաղաքի ավագանին քաղաքապետի պաշտոնում ընտրել էր Տարոն Մարգարյանին:

Կամո Արեյանի ասուլիսից առաջ լրագրողներին բաժանվեց ավելի քան 50 էջից բաղկացած՝ գունազարդ եւ պատկերազարդ մի գրքույկ, որտեղ վերնագիրը «Երեւանի քաղաքապետարանի 2016 թվականի գործունեության հաշվետվություն» էր, սակայն հաշվետվությունը ներկայացվում էր սկսած 2013 թվականից:

Փոխքաղաքապետը մանրամասն ներկայացրեց, թե քանի հեկտար, սանտիմետր, քառակուսի, կիլոմետր կանաչապատում, նկարազարդում, ասֆալտապատում եւ ճանապարհաշինական աշխատանքներ են կատարվել:

Մեր դիտարկմանը, որ բոլոր թվերը ներկայացվում է 2013-ից 2016 թվականների համար, մինչդեռ ասուլիսը հրավիրվել էր 2016 թվականի հաշվետվության համար, Կամո Արեյանն արձագանքեց. «Այո, դուք նկատեցիք, որ ես տալիս եմ 2016 թվականի հաշվետվություն եւ կատարում եմ համեմատական վերլուծություն: Հաշվետվություն՝ չոր, միայն այս տարվա կատարողական, կարծում եմ, որեւէ տպավորություն չի կարող թողնել անգամ իր՝ ներկայացնողի վերլուծական աշխատանքի մեջ: Եթե դու հաշվետվությունը չես ներկայացնում համեմատության մեջ, որակական եւ քանակական գնահատականների մեջ, դառնում է իմաստազուրկ: Դրա համար իմ հղումները գալիս են քառամյա ծրագրի մեկնարկից»:

Armtimes.com-ի հարցին՝ այդ դեպքում 2013 թվականից մինչ օրս Երեւան քաղաքի Թումանյան փողոցը քանի՞ անգամ է ասֆալտապատվել, փոխքաղաքապետը շտապեց հարցի ենթատեքստին պատասխանել. «Հարցի ենթատեքստն ու ուղղամտությունը պարզ է, դա կնշանակի, թե կենտրոնական փողոցները քանի՞ անգամ են ասֆալտապատվել: 2013 թվականից 2016 թվականները ես նշեցի, 2013-2014 թվականին 88 փողոց, 2014-ին 25 փողոցից կենտրոնում ընդգրկված է եղել միայն 2 փողոց՝ Գրիգոր Լուսավորիչը եւ Ագաթանգեղոսը, մնացած բոլոր փողոցները բաժին են ընկել ծայրամասերին: Թումանյան փողոցի վրա հիմնանորոգման աշխատանքներ չեն կատարվել, կատարվել են ընթացիկ նորոգման աշխատանքներ, որոնք կրելու են պարբերական բնույթ»:

Կամո Արեյանը նշեց, որ բացառված չէ, որ Թումանյան փողոցի մի հատվածը հենց վաղը քանդվի, քանի որ կարող են լինել ստորգետնյա ենթակառուցվածքների (էլեկտրական լարեր, կոյուղիներ եւ այլն) վթարներ, որոնք հանգեցնելու են քանդման:

Մեր մյուս հարցին՝ Երեւանի քաղաքապետարանը 2017 թվականին քանի՞ հին շենք է պատրաստվում քանդել Երեւանում, խոսքը միայն պատմամշակութային շինությունների մասին չէ, Կամո Արեյանը պատասխանեց, որ քանդման ծրագիր չունեն, այդպիսի աշխատանքները կառուցապատման, ներդրումային ծրագրերում է լինում: «Քաղաքաշինական խոշոր հատվածներում, ինչպիսիք են Հին Երեւան, «33» թաղամասի (Ֆիրդուսի շուկայի հարակից տարածք), այդպիսի շենքեր որոնք կունենան ճարտարապետական, քաղաքաշինական խոշոր արժեք, այդպիսի միտում եւ ծրագիր չկա»,- ասաց Կամո Արեյանը՝ կրկնելով քաղաքաշինության պետական կոմիտեի նախագահ Նարեկ Սարգսյանի այն խոսքը, որ Արամի փողոցում ՀՀ առաջին հանրապետության կառավարության ղեկավար Արամ Մանուկյանի տունը չի քանդվելու: «Այդպիսի ծրագիր, որեւէ արժեք ներկայացնող շենք քանդելու այդպիսի միտում չկա»,- ընդգծեց նա:

Կամո Արեյանին հիշեցրեցինք, որ իր 50 րոպե տեւած ելույթի սեղմ տարբերակը լրագրողներին բաժանվել է եւ հետաքրքրվեցինք, որքա՞ն գումար է քաղաքապետարանը վճարել այդ գրքույկների տպագրության համար, սակայն փոխքաղաքապետն առաջարկեց այդ հարցի պատասխանը տրամադրել ավելի ուշ, թվերը ճշտելուց հետո միայն: