«Հոնկոնգ» վիրուսը Հայաստանում է, բայց «Խոզագրիպի» համեմատեւթյամբ այն բավական մարդասեր է

Եթե նախորդ տարի Հայաստանում մեծ մասամբ շրջանառվում էր գրիպի A տեսակի H1N1 ենթատեսակը կամ, այսպես կոչված, «խոզագրիպը», ապա այս տարի մեր երկիր է ներթափանցել A տեսակի H3N2 ենթատեսակը, որն էլ «Հոնկոնգ» անվանումն ունի:

Ու թեպետ դեռ գրիպի սեզոնի սկզբում «Հոնկոնգի» վերաբերյալ կային որոշակի մտավախություններ, այդուհանդերձ, «խոզագրիպի» համեմատությամբ այն բավական «մարդասեր» է: Հայտնի է, որ նախորդ տարվա նույն այս ժամանակահատվածում գրիպի հետ կապված իրավիճակն էապես լարված էր: Մասնավորապես, Հայաստանում նույնիսկ մահվան դեպքեր գրանցվեցին: Ընթացիկ սեզոնին, բարեբախտաբար, չեն արձանագրվել անդառնալի ելքով հիվանդացություններ:

ՀՀ առողջապահության նախարարության հիվանդությունների վերահսկման եւ կանխարգելման ազգային կենտրոնի հատուկ վտանգավոր եւ օդակաթիլային վարակների բաժնի պետ Լիանա Թորոսյանը, մեր զրույցում ներկայացնելով հանրապետությունում առկա համաճարակային իրավիճակը, նշեց. «Շաբաթ-կիրակի օրերին պոլիկլինիկաներն աշխատում են, բայց բնակչությունը հիմնականում միանգամից դիմում է հիվանդանոցներ: Այսօրվա դրությամբ հիվանդանոցային բաժանմունքներում դիմելիության մի փոքր աճ է գրանցվել, սակայն դրա հաշվին նվազել են պոլիկլինիկական կազմակերպություններ դիմելիությունը եւ շտապօգնության կանչերը` կապված շնչառական վարակների եւ թոքաբորբերի հետ»: 

«Եթե մեր տվյալները համեմատելու լինեմ նախորդ տարվա միեւնույն ժամանակահատվածի հետ, ապա եռակի քիչ են արձանագրվում թե՛ շտապ օգնության կանչերը եւ թե՛ պոլիկլինիկական դիմելիությունը: Նույն իրավիճակն է նաեւ հիվանդանոցների բաժանմունքներում»,- հավելեց նախարարության մասնագետը: Լիանա Թորոսյանի տեղեկացմամբ, երեկվա դրությամբ սուր շնչառական վարակների կապակցությամբ  պոլիկլինիկաներ այդ օրը դիմել է շուրջ 600 մարդ: Հիվանդանոցների վերաբերյալ տվյալներն, ըստ նրա, դեռ ամփոփված չէին:

Գրիպի A տեսակի H3N2 ենթատեսակը որքան էլ ագրեսիվ չէ, կարող է բարդություններ առաջացնել հատկապես վաղ մանկական հասակի երեխաների, ինչպես նաեւ 60-ն անց տարիքի մարդկանց շրջանում: H1N1-ի դեպքում այդ վտանգին առավել շատ ենթակա էին երիտասարդները:

Նախորդ տարվա աշնանը Ռուսաստանի Դաշնության պատկան մարմինները որոշակի անհանգստությամբ էին սպասում H3N2-ին: Նշվում էր, որ իրենց երկրին է մոտենում գրիպի «Հոնկոնգ» տեսակը, որին երկար ժամանակ չեն հանդիպել: Հայտարարվել էր, որ այն ավելի ինտենսիվ տարածված է եղել 1960-ականների վերջին, ու հնարավոր է՝ այժմ մարդիկ դրա նկատմամբ իմունիտետ չունեն, ինչն էլ որոշակի ռիսկեր է առաջացնում: Իսկ Ռուսաստանում շրջանառվող հարուցիչներն, ինչպես հայտնի է, մեկ-երկու ամիս անց հասնում են Հայաստան:

ՀՀ առողջապահության նախարարության հիվանդությունների վերահսկման եւ կանխարգելման ազգային կենտրոնի հատուկ վտանգավոր եւ օդակաթիլային վարակների բաժնի պետ Լիանա Թորոսյանը, անդրադառնալով «Հոնկոնգի» նկատմամբ իմունիտետի հնարավոր բացակայության մասին հարցին, ասաց. «50-60-ական թվականներից մարդկությունը ճանաչում է այս հարուցիչը, եւ դրանով է պայմանավորված, որ այն, կարելի է ասել, նվազ ագրեսիվ է, ու բարդությունների առումով բավականին հանգիստ սեզոն ունենք այս տարի, քան նախորդ տարի միեւնույն ժամանակահատվածում: Ցանկացած գրիպի ենթատեսակի իմունիտետը վեց ամսից մեկ տարի է: Ուղղակի ցանկացած հարուցիչ ունի գլուխ բարձրացնելու իր օրինաչափ պարբերականությունը` 3-5 տարի: Նախորդ տարիներին, հիշում եք, անընդհատ H1N1-ն էր շրջանառվում, եւ դա էր պատճառը, որ արդեն ձեւավորվել է այն քանակակազմը, որն արդեն ծանոթ չէ այդ հարուցչին, դրա համար այս ենթատեսակը սկսեց գլուխ բարձրացնել եւ արձանագրվել լայնածավալ բնակչության մեջ»:

Երեկվա դրությամբ գրիպի բարդությունների հետեւանքով առաջացած թոքաբորբերի պատճառով վերակենդանացման բաժանմունքում է գտնվել հինգ հիվանդ: Լիանա Թորոսյանի խոսքով, վերջիններս ներկայացնում են տարբեր տարիքային խմբեր: «Նրանք ունեն բավականին թեթեւ եւ հեշտ բուժման դինամիկա»,- ասաց մասնագետը: «Հոնկոնգ» վիրուսը, Լիանա Թորոսյանի վստահեցմամբ, չունի որեւէ առանձնահատկություն եւ, ինչպես գրիպի մյուս ենթատեսակները, կարող է ընթանալ թեթեւ, միջին ծանրությամբ կամ ծանր:

Դպրոցներում ձմեռային արձակուրդից հետո դասերը վերսկսվել են մեկ շաբաթ առաջ: Բայց կրթական այդ հաստատություններում պատշաճ ջերմություն ապահովելու խնդիր կա: Մեր տեղեկություններով, հաճախ մեկ-երկու օր ցուրտ դասասենյակներում դաս անելուց հետո երեխաները սկսում են դպրոց ներկայանալ հիվանդացած: Առողջապահության նախարարությունը, սակայն, գոնե առայժմ վերլուծություններ չունի, թե հանրակրթական հաստատությունները վերաբացվելուց հետո գրիպի տարածվածության պատկերն ինչ փոփոխություն է կրել:

«Վերլուծությունը բոլոր տարիքային խմբերի համար է, բայց այսօր հիվանդացությունը գերակշռում է հիմնականում 0-5 տարեկան երեխաների շրջանում: Դասերը մեկ շաբաթ է՝ ինչ վերսկսվել են, մենք հետամուտ ենք, նայում ենք հիվանդացությանը, ըստ անհրաժեշտության արդեն կանցնենք համապատասխան գործողությունների: Բայց էլի զգոնությունը չկորցնելու կոչ է արված ե՛ւ գործատուներին, ե՛ւ ծնողներին, ե՛ւ բոլորին»,- պատասխանեց Լիանա Թորոսյանը: