Տարվա մարզական ամփոփում. Բարի կամքի դեսպան Հենրիխ Մխիթարյան

2016 թվականի վերջին 2 ամիսները հագեցած էին մարզական բազմապիսի իրադարձություններով եւ արձանագրվեցին աննախադեպ իրավիճակներ տարբեր մարզաձեւերում: Նոյեմբերի 28-ը դարձավ համաշխարհային սպորտի պատմության հերթական սեւ օրը՝ ավիաաղետի զոհ դարձան բրազիլական «Շապեկոենսե» թիմի գրեթե բոլոր ֆուտբոլիստները: Հայկական սպորտում էլ եղան տեղական նշանակության ցնցումներ. իր ելույթները Ռուսաստանի առաջնությունում դադարեցրեց բասկետբոլային «Ուրարտու» թիմը, ծանրորդ Հռիփսիմե Խուրշուդյանն էլ «վառվեց» դոպինգի վրա:

Բայց հայկական սպորտի համար ամենանշանակալի իրադարձությունները այդ ամիսներին կապված էին Հենրիխ Մխիթարյանը հետ, որը նախ դարձավ ՅՈՒՆԻՍԵՖ-ի բարի կամքի դեսպան առաջին մարզիկը, ապա Անգլիայի առաջնությունում գոլ խփած առաջին հայաստանցին: Վերհիշենք 2016 թվականի նոյեմբեր - դեկտեմբերի ամիսներին միջազգային եւ հայկական սպորտում արձանագրված առավել նշանակալի մարզական իրադարձությունները: 

Միջազգային

Սլովակիայի ներկայացուցիչ Դոմինիկա Ցիբուլկովայի եւ շոտլանդացի Էնդի Մարեյի հաղթանակներով ավարտվեցին թենիսի տարվա «Ամփոփիչ» մրցաշարերը, ընդ որում 2-ն էլ նման հաջողության հասան պատմության մեջ առաջին անգամ:

Թենիսի տղամարդկանց աշխարհի ոչ պաշտոնական առաջնություն համարվող «Davis Cup»-ի եզրափակչում հաղթելով Խորվաթիայի հավաքականին 3-2 հաշվով, Արգենտինան «Davis Cup»-ի խաղարկության 116-ամյա պատմության ընթացքում առաջին անգամ նվաճեց պատվավոր տիտղոսը:

Նյու Յորքում կայացած շախմատի աշխարհի չեմպիոնի կոչման համար մրցախաղում գործող չեմպիոն, նորվեգացի Մագնուս Կառլսենը առավելության հասավ ռուս Սերգեյ Կարյակինի նկատմամբ եւ պահպանեց աշխարհի չեմպիոնի կոչումը:

Նոյեմբերի 28-ին Կոլումբիայի երկնքում աղետի ենթարկվեց «Լամիա» ավիաընկերությունը պատկանող ինքնաթիռը. 77 ուղեւորներից միայն 6-ը ողջ մնացին: Ավիաաղետի զոհերի թվում էին բրազիլական «Շապեկոենսե» թիմի գրեթե բոլոր ֆուտբոլիստները: «Շապեկոենսեն» Կոլումբիա էր մեկնում՝ մասնակցելու իր նշանակությամբ Հարավային Ամերիկայի ակումբային 2-րդ մրցաշարի՝ «Copa Sudamericana»-ի եզրափակիչին: Խաղը, բնականաբար, չկայացավ, եւ մրցակցի՝ կոլումբիական «Ատլետիկո Նասիոնալի» առաջարկով մրցաշարի հաղթող ճանաչվեց «Շապեկոենսեն»: 

Ֆրանսիական «France Football» հեղինակավոր ամսագրի կողմից կատարված քվեարկության արդյունքում Պորտուգալիայի հավաքականի եւ Մադրիդի «Ռեալի» հարձակվող Կրիշտիանու Ռոնալդուն արժանացավ 2016 թվականի աշխարհի լավագույն ֆուտբոլիստի կոչմանը՝ «Ոսկե գնդակ» մրցանակին:

Դեկտեմբերին Ճապոնիայում կայացած ֆուտբոլի աշխարհի ակումբային առաջնության ժամանակ ֆուտբոլի պատմության մեջ առաջին անգամ մրցավարը օգտվեց կրկնապատկերը դիտելու հնարավորությունից եւ փոխեց որոշումը: Նույն մրցաշարի եզրափակիչում հաղթանակ տոնելով ճապոնական «Կաշիմայի» նկատմամբ 4-2 հաշվով, Աշխարհի ակումբային առաջնության հաղթող ճանաչվեց Մադրիդի «Ռեալը»:

Հայկական

Իսրայելում կայացած մրցաշարում ֆուտբոլի Հայաստանի մինչեւ 17 տարեկանների հավաքականը հաղթահարեց Եվրոպայի առաջնության նախնական փուլի արգելքը եւ նվաճեց էլիտ փուլի ուղեգիր:

Նոյեմբերի 9-ին Հայաստանի ֆուտբոլի ազգային հավաքականի եւ «Մանչեսթեր Յունայթեդի» կիսապաշտպան Հենրիխ Մխիթարյանը նշանակվեց Հայաստանում ՅՈՒՆԻՍԵՖ-ի բարի կամքի դեսպան: Մխիթարյանի եւ ՅՈՒՆԻՍԵՖ-ի համագործակցությունը նախատեսված է 2 տարով:

Աշխարհի 2018 թվականի առաջնության ընտրական մրցաշարի հերթական տուրում, նոյեմբերի 11-ին, Երեւանի «Հանրապետական» ստադիոնում կայացած խաղում ֆուտբոլի Հայաստանի ազգային հավաքականը 3:2 հաշվով հաղթեց Մոնտենեգրոյին:

Երեւանում կայացած ֆուտբոլի Եվրոպայի մինչեւ 19 տարեկանների առաջնության նախնական խմբային փուլում Հայաստանի թիմը կրեց 3 պարտություն եւ դուրս մնաց հետագա պայքարից:

Նոյեմբերի 22-ին Միջազգային օլիմպիական կոմիտեն պաշտոնապես հայտարարեց, որ 2012թ. Լոնդոնի Օլիմպիական խաղերի բրոնզե մեդալակիր, հայաստանցի ծանրորդ Հռիփսիմե Խուրշուդյանը       զրկվել է մեդալից եւ պարտավոր է հնարավորինս արագ վերադարձնել այն: ՄՕԿ-ի հայտարարության մեջ ասվում էր, որ 2012 թ. Օլիմպիական խաղերի ծրագրով ծանրամարտի կանանց գերծանր քաշային կարգի մրցման ժամանակ Հռիփսիմե Խուրշուդյանի հանձնած դոպինգ նմուշի մեջ հայտնաբերվել է արգելված՝ «Տուրինաբոլ» եւ «Ստանոզոլ» դեղամիջոցներ: Հաջորդ օրը կայացած մամուլի ասուլիսի ընթացքում Խուրշուդյանը, ինչպես նաեւ ծանրամարտի Հայաստանի ֆեդերացիայի գլխավոր քարտուղար Փաշիկ Ալավերդյանը հայտարարեցին, որ դոպինգ ընդունում են գրեթե բոլոր ծանրորդները: «Եթե նրանք օգտագործում են, ես ոչ՝ 30-40 -րդ տեղերը կզբաղեցնեմ: Եթե ուզում ես հաղթել պատերազմում, պետք է իրենց զենքով կռվես: Եղանով չես կարող ռումբի դեմ կռվել»,- հայտարարեց Խուրշուդյանը

Դեկտեմբերի 2-ին Ռուսաստանի «Սուպերլիգա 1» մրցաշարում իր ելույթները դադարեցրեց Երեւանի «Ուրարտու» բասկետբոլի թիմը: «Ուրարտուն» անցկացրած 9 խաղերում կրեց միայն պարտություններ, իսկ մրցաշարից դուրս գալու պաշտոնական պատճառը ֆինանսների բացակայությունն էր:

Դեկտեմբերի 11-ին կայացած «Մանչեսթեր Յունայթեդ» - «Տոտենհեմ» խաղում մանչեսթերյան ակումբը հաղթեց 1-0 հաշվով Հենրիխ Մխիթարյանի խփած գոլի շնորհիվ: Մխիթարյանը դարձավ  առաջին հայաստանցին, որը գոլ խփեց Անգլիայի Պրեմիեր լիգայում, եւ Հայաստանն էլ դարձավ 96-րդ երկիրը, որի քաղաքացին գոլի հեղինակ դարձավ Անգլիայի առաջնություններում:

Լոնդոնում կայացավ շախմատային «Grand chess tour 2016»-ի մեջ մտնող վերջին մրցաշարը՝ «London Chess Classic»-ը: Մրցաշարի հաղթող դարձավ ամերիկացի Ուեսլի Սոն, որը հռչակվեց նաեւ «Grand chess tour 2016»-ի չեմպիոն: Հայկական շախմատի առաջատար Լեւոն Արոնյանը «Grand chess tour 2016»-ում ի վերջո հայտնվեց 4-րդ տեղում: