Հյուրանոցում մզկիթ չի լինի

Վերջերս հայտնի դարձավ, որ Երեւանի սրտում` «Մոսկվա» կինոթատրոնի եւ «Գոլդեն Թուլիփ» հյուրանոցի հարեւանությամբ, պետք է կառուցվի 50 հարկանի պարսկական աշտարակ:

Հետո այդ տեղեկությունները հերքվեցին, եւ արդեն խոսվում էր 25 հարկանի շինության մասին, որը կառուցելու է իրանական «Դիդաս ինտերնեյշնլ» ընկերությունը: Երեկ այս թեմայով զրուցեցի ընկերության տնօրեն Փեյման Շայեգան Ռադի հետ:

- Պարոն Ռադ, դուք շարունակելո՞ւ եք ձգտել, որպեսզի պարսկական աշտարակն, այնուամենայնիվ, կառուցվի, չնայած այն բանին, որ արդեն իսկ հանրային բողոք կա դրա դեմ:
- Հանրային բողոքը հիմնված է սխալ տեղեկատվության վրա: Ոչ մի պարսկական աշտարակ գոյություն չունի: Ինչպես 50 հարկ չի եղել եւ չի լինի, ճիշտ այնպես էլ չի լինի պարսկական աշտարակ: Պետք է 5 աստղանի բրենդային հյուրանոց կառուցվի: Բարձրահարկ հյուրանոց, որ կկոչվի այն բրենդի անունով, որը այնտեղ կաշխատի: Ենթադրենք, եթե «Կոնտինենտալը» լինի, կառույցը հենց այդպես էլ կկոչվի` հյուրանոց «Կոնտինենտալ» եւ ոչ` այլ կերպ:

- Դեռ չե՞ք որոշել` հատկապես ինչ բրենդ է լինելու:
- Յուրաքանչյուր բիզնես ունի իր գաղտնիքները: Իհարկե, մենք որոշել ենք եւ բրենդ կլինի, բայց թե հատկապես որը, դա անակնկալ է: Առայժմ անակնկալ պետք է լինի նաեւ, թե հյուրանոցն ինչ տեսք կունենա, ինչպիսի ներդաշնակություն` հարակից տարածքների հետ: Սակայն այն լուսանկարները, որոնք հրապարակվել են, որեւէ կերպ մեզ չեն առնչվում` ոչ հարկայնության իմաստով, ոչ արտաքին տեսքի:

- Իսկ քանի՞ հարկ կունենա ձեր կառուցելիք հյուրանոցը:
- Այդ հարցը շատ հետաքրքիր է: Դա բիզնես է, ճի՞շտ է: Ենթադրենք` ես ուզում եմ կառուցել ինչպես որ գրված էր` 50 հարկ, սակայն յուրաքանչյուր բիզնեսմեն, յուրաքանչյուր մասնագետ կվկայի, որ 50 հարկանի հյուրանոց կառուցելը շահավետ չէ: Այդքան այցելու չկա եւ չի լինի: Մեր նախագծողին մենք ընտրել ենք աշխարհի 200 լավագույն նախագծողներից: Հաղթել է առաջին 5-ից մեկը: Այսինքն, հնարավոր է` լավագույնը, հնարավոր է` 5-րդը: Նա մարդ է, որը ոչ միայն աշխատանքի իր ոճն ունի, այլեւ հասկանում է շրջապատող միջավայրը, հասկանում է տեղական ճարտարապետությունը: Այստեղ մի կողմում «Մոսկվա» կինոթատրոնն է, մյուս կողմում` «Գոլդեն Թուլիփ» հյուրանոցը: Այնտեղ է նաեւ նկարիչների միության շենքը, որը ճարտարապետական նշանակություն չունի: Հնարավոր է` ինչ-որ այլ նշանակություն ունի, ես մեծ հարգանքով եմ վերաբերվում դրան:

- Ուզում եք ասել, որ կարելի է եւ քանդե՞լ նկարիչների միության շենքը:
- Ոչ: Մենք տնօրինում ենք միայն մեր տարածքը: Եթե ինչ-որ մեկը կարծում է, որ կարող է ինչ-որ բան փոխել այնտեղ, օրինակ` ֆասադը, պատրաստ ենք օգնել` ներդաշնակություն ստեղծելու համար… Իսկ ինչո՞ւ ենք մենք առայժմ դադար վերցրել: Այսինքն` ոչ թե դադար է, այլ հետեւում ենք իրադարձություններին: Կարճ ժամանակամիջոցում արդեն 3-րդ քաղաքապետն է փոխվում: Նրանք սկզբում լուծում են առաջնահերթ խնդիրները, հետո անպայման ձեռնամուխ կլինեն շինարարական նորմերին: Ձեր հայկական շինարարական նորմերը շատ հեռու են միջազգային եւ, իմ կարծիքով, ամենալավ` ճապոնական նորմերից: Դա ներդրումների համար մեծ ռիսկ է, եթե այս նորմերով կառուցենք, եւ Աստված մի արասցե, մի փոքր երկրաշարժ լինի: Պետք է ճնշում գործադրել քաղաքային իշխանությունների վրա ոչ թե շինարարություն թույլ տալու կամ թույլ չտալու համար, այլ որպեսզի շինարարական նորմերը փոխվեն: Այն նորմերը, որոնք կան, իրենք են խոստովանում, որ բավարար չեն: Ճապոնական նորմերը այստեղ ոչ մի կերպ չեն անցնում, մինչդեռ աշխարհում լավագույնն են համարվում: 

- Կարելի՞ է ասել, թե քանի որ դուք սպասում եք այդ նորմերը փոխվելուն, եւ քանի որ դա կարող է շատ երկար տեւել, հետեւաբար հայտնի չէ, թե երբ է կառուցվելու ձեր հյուրանոցը:
- Ոչ: Հանձնարարություն եմ տվել իմ նախագծողին, եւ նա արդեն աշխատում է: Եթե այդ հարցը գլոբալ լուծում չգտնի Հայաստանում, անհատական կարգով կփորձենք լուծել. այստեղ կան ինստիտուտներ, համալսարաններ, քաղաքաշինական խորհուրդ, թող մեր նախագիծը անհատական փորձաքննություն անցնի: Բայց քաղաքային իշխանությունները դեռ իմ ժամանակը չունեն: Նշանակվում են, գնում են, գալիս են, իրենց խնդիրները կան, բունտեր եւ այլն: Պետք է համբերատար լինել: Բայց ես չեմ դադարեցնելու աշխատանքները, ինչ է թե` այդ նորմերը չկան: Ասում եմ` ես իմ աշխատանքը ուրիշ ստանդարտներին համապատասխան կիրականացնեմ, ինչքան կարող եմ, կհետեւեմ տեղական նորմերին, որովհետեւ դա արդեն ռիսկ է շինության ամրության հետ կապված: Դա պետք է համապատասխանեցնել: Այդ հարցը ես ոչ մեկի հետ չկարողացա համաձայնեցնել:

- Բայց դուք կարծես դեռ ավելի վաղ էիք ցանկանում կառուցապատել այդ տարածքը, երբ դեռ քաղաքապետը Երվանդ Զախարյանն էր, եւ անընդհատ փոփոխություններ չէին լինում:
- Ուրեմն, խնդիրներն ինչպես եղել են, այնպես էլ մնացել են: Բայց մեր գործի ընթացքն է փոխվել: Այն ժամանակ մենք ցանկանում էինք, օրինակ, տեղական նախագծողների հետ աշխատել: Սակայն 50 հարկանի հյուրանոցի խնդիր չկա: Դա կառուցես, գումարներդ չես վերադարձնի երբեք, ոչ մի բիզնես պլանով:

- Իսկ այնուամենայնիվ` որքա՞ն հարկայնություն է ունենալու հյուրանոցը:
- Ես ճարտարապետական առաջադրանք ունեմ 25 հարկի համար, բայց հարկայնության հարցում չեմ բռնելու մասնագետների ձեռքերը, չեմ հրամայելու` ինչպես անել, պետք է մասնագետների կարծիքը լսեմ: Հաշվարկները ցույց կտան: Գործող նորմերով բարձրահարկ շենքեր Հայաստանում ոչ մի տեղ հնարավոր չէ կառուցել: Նորմերի փոփոխությունները պետք է կատարվեն: Ես կարծում եմ` հայերը բավականին խելացի են, բավականին կրթված են, լավ մասնագետներ այստեղ կան, պարզապես նրանց պետք է օգնել: Շատ քաղաքաշինական խնդիրներ կան այստեղ: Իհարկե, ես հասկանում եմ` եղել են պատերազմ, երկրաշարժ, ճգնաժամ, դժվարին իրավիճակ, հաճախ ստիպված էին եկամուտներ ապահովել` կառուցապատման իրավունք տալով եւ այլն: Այդ ժամանակ քաղաքի դեմքը սկսեցին գիտակցաբար աղավաղել: Բայց, փառք Աստծո, Հայաստանը հիմա այնպիսի իրավիճակում է, որ ես կարծում եմ` կարելի է շատ բան փոխել:

- Ըստ ձեզ` ձեր հյուրանոցը չի՞ աղավաղելու քաղաքի դեմքը:
- Ես ընդհանրապես հենց դրա համար էլ ամեն ինչ անում եմ, որպեսզի ոչինչ չաղավաղվի:

- Իսկ ճի՞շտ է, որ շենքի ներսում մզկիթ է լինելու:
- Երեւանում մզկիթ արդեն կա: Ես աշխարհում ոչ մի տեղ չեմ տեսել մզկիթ` հյուրանոցի մեջ: Այդպիսի նպատակներ չեն եղել, այդ մասին երբեք խոսք չի եղել: Տուրիստական վայրն ու մզկիթը բացարձակ տարբեր բաներ են: Ոչ մի եկեղեցի, ոչ մի մզկիթ այնտեղ չպետք է լինի: Եթե ինչ-որ մեկը ցանկանում է, խնդրեմ, կառուցվելիք հյուրանոցի մի կողմում եկեղեցի է, մյուսում` մզկիթ:

- Պարոն Ռադ, թեկուզ շատ մոտավոր, կարո՞ղ եք ասել` երբ եք նախատեսում ավարտին հասցնել հյուրանոցի կառուցման աշխատանքները:
- Մաքսիմում երեք տարի է հարկավոր, որպեսզի ավարտենք: Այն պահից սկսած, երբ մեր խնդիրները կլուծվեն` նորմերի հետ կապված, առավելագույնը երեք տարի հետո:

Խմբ. կողմից - Պարոն Ռադը «ՀԺ»-ի թղթակցին թույլ չի տվել լուսանկարել իրեն: