Ստուգում. աշխատում են իրենց չխնայելով

Տպագրվել է «Հայկական Ժամանակ» օրաթերթի՝ 2003 թվականի դեկտեմբերի 6-ի համարում

Շուրջ մեկ ամիս առաջ կոալիցիոն սկզբունքով նշանակվեցին 8 փոխնախարարներ: Նշանակման գործընթացը մամուլի ուշադրության կենտրոնում էր, բայց շուտով մոռացվեց:

Այս բացը լրացնելու նպատակով ստուգայց կատարեցինք մի քանի նախարարություններ՝ ուսումնասիրելու, թե ինչպես է կյանքի կոչվում վարչապետի՝ շուրջ երկու ամիս առաջ արած հայտարարությունը. «Մեքենան եւ քարտուղարուհին պարտադիր են լինելու (նոր) փոխնախարարների համար»:

Քաղաքաշինության նորանշանակ փոխնախարար, դաշնակցական Կառլեն Գեւորգյանն իրեն պետք է որ վատ չզգա: Նրան որպես ծառայողական ավտոմեքենա է հատկացվել «քշած» ԳԱԶ 31: Աշխատասենյակն ընդարձակ է, տաք, բայց կա մի մինուս՝ պրն Գեւորգյանի համար աշխատասենյակ չի գտնվել կառավարության երրորդ շենքի նորակառույց թեւում, եւ նա ստիպված է իր աշխատանքային ծանր օրն անցկացնել շենքի հին, հալումաշ եղած հատվածում տեղակայված իր աշխատասենյակում: Աշխատասենյակը, նկատենք, քիչ բանով է տարբերվում ընդհանուր շենքի վիճակից: Բայց փոխնախարարը կարող է մխիթարվել նրանով, որ ընդունարանում միշտ կա գործավարուհի եւ իր դռան վրա էլ՝ ցուցանակ:

Այս ամենով չի կարող հպարտանալ Գեւորգյանի կուսակից, բնապահպանության նորանշանակ փոխնախարար Հակոբ Մաթիլյանը: Վերջինս ստիպված է աշխատել եւ ստեղծագործել պարզապես անմարդկային պայմաններում՝ չկա քարտուղարուհի, չկա մեքենա, չկա ցուցանակ, աշխատասենյակի չափերն էլ հիշեցնում են խրուշչովկաների ննջասենյակների չափերը՝ մի գրասեղան, եւ վերջ՝ սենյակում այլեւս շարժվել չի լինում: Բայց Մաթիլյանի աշխատասենյակում կա ավելի քան մեկ հեռախոս, այսինքն, երկուսը. մեկը՝ քաղաքային, մյուսը՝ ներքին: Բայց հեռախոսները դրված են աթոռին՝ դրանց միացման տեղն այնպես է ընտրած, որ եթե հեռախոսները դրվեն սեղանին, Մաթիլյանը ստիպված է լինելու դրանց լարերի վրայով թռչել սենյակից դուրս գալու համար:

Պրն Մաթիլյանն ընտրել է չթռչելու տարբերակը: Ի դեպ, նախարարութունից տեղեկացրին, որ քարտուղարուհի կնշանակվի դեկտեմբերի 8-ին: Քանի հեռախոս կա գյուղատնտեսության նորանշանակ փոխնախարար, «ՕԵԿ»-ական Տիգրան Պետրոսյանի աշխատասենյակում՝ անհայտ մնաց: Նրա աշխատասենյակ մտնել մեզ չհաջողվեց. նա տեղում չէր, ու տպավորություն ստեղծվեց, որ փոխնախարարն այնքան էլ հաճախ չի գալիս աշխատանքի: Դա, թերեւս, այն պատճառով, որ նրան դեռեւս ծառայողական ավտոմեքենա չի հատկացվել: Քարտուղարուհի էլ կարծես թե չկա: Կամ՝ եթե կա, ապա աշխատանքի է գալիս, երբ շեֆն էլ է գալիս: Շահեկանորեն տարբերվում են ՀՀԿ-ի կողմից մշակույթի փոխնախարար նշանակված Լիլիթ Ասատրյանի աշխատանքային պայմանները:

Աշխատասենյակը կահավորված է ճաշակով՝ հիմնականում նոր կահույքով: Սենյակն ընդարձակ է, նոր նորոգված: Կա քարտուղարուհի: Ակնհայտ է, որ համատեղվել են տկն Ասատրյանի ճաշակը եւ մի շատ կարեւոր հանգամանք՝ ազդեցիկ ամուսին: Լ.Ասատրյանը հանրապետական կուսակցության ազդեցիկ անդամ, Ռ.Քոչարյանի նախընտրական հանրահավաքը վարած Վազգեն Խաչիկյանն է: Սակայն տկն Ասատրյանին դեռ չեն հատկացրել ծառայողական մեքենա, եւ ցուցանակի վրա էլ ընդամենը գրված է «փոխնախարար», իսկ ազգանունը նշված չէ:

Դաշնակցական Մուշեղ Միքայելյանը, որը նշանակվել է ԿԳ փոխնախարար, ընդհանրապես ցուցանակ չունի, ծառայողական մեքենա չունի, աշխատասենյակն էլ փոքր է, բայց մեր աղբյուրները պնդում են, որ նա, ի տարբերություն մյուս նորանշանակների, անընդհատ աշխատում է՝ ինչ-որ մարդկանց է ընդունում, թղթեր է տանում-բերում: Ինչքանով է նրա ակտիվ գործունեությունը կապված նախարարության հետ՝ դժվար է ասել: Կապի եւ տրանսպորտի փոխնախարար, դաշնակցական Դավիթ Երիցյանն ունի ամեն ինչ, կամ՝ գրեթե ամեն ինչ, չունի միայն ծառայողական մեքենա, որի հատկացումը, ինչպես տեղեկացանք, օրերի խնդիր է:

Էներգետիկայի նորանշանակ փոխնախարար, ՕԵԿ-ական Արտակ Դավթյանն ունի ամեն ինչ: Նրա աշխատասենյակում անգամ հեռուստացույց ու երաժշտական կենտրոն կան: Սակայն չնայած արդեն մեկ ամիս է, ինչ նա նշանակվել է իր պաշտոնում, բայց նախարարության աշխատակիցների մեծ մասը նրան հազիվ է տեղը բերում: «Էդ ո՞վ ա»,-այս հարցով էին պատասխանում պրն Դավթյանի աշխատասենյակը գտնելուն ուղղված մեր հարցերին եւ նրան ճանաչում էին միայն որպես նոր նշանակված փոխնախարար:

Ամենասարսափելին, սակայն, սոցապ փոխնախարար, ՀՀԿ-ական Ֆիլարետ Բերիկյանի վիճակն է: Նրա աշխատասենյակի ցուցանակի փոխարեն գրված է «325»: Սենյակի դուռն էլ, ի տարբերություն մյուս բոլոր փոխնախարարների, ոչ թե փայտից է, այլ մետաղապլաստիկից: Սենյակի կահույքը հին է, սենյակը՝ փոքր: Մի խոսքով, վիճակն այնպիսին է, որ, թերեւս, դրանով պետք է զբաղվի նրա կուսակցության ղեկավարը՝ Անդրանիկ Մարգարյանը: Պատկերացնու՞մ եք, նրան արդեն հատկացրել են ծառայողական մեքենա, բայց համապատասխան ձեւակերպումներ դեռ չեն արել: Ո՞ւր է նայում վարչապետը:

Հայկ Գեւորգյան