Հաց բերող Արթուր Սարգսյանին ամեն օր ցավազրկում են. բողոքի ակցիաներ կլինեն

Հուլիսյան դեպքերի ժամանակ ոստիկանության պարեկապահակային ծառայության գունդ սեփական մեքենայով խմբի անդամներին սնունդ հասցրած ազատամարտիկ Արթուր Սարգսյանին ազատ արձակելու պահանջով change. org կայքում սկսված ստորագրահավաքին միացել է արդեն 2000-ից ավելի քաղաքացի:

Ըստ ստորագրահավաքի մասնակիցների՝ «Արթուր Սարգսյանը խղճի բանտարկյալ է»: «Խղճի բանտարկյալն անձ է, որի ֆիզիկական ազատությունը սահմանափակվել է բանտարկությամբ կամ այլ միջոցով` իր քաղաքական, կրոնական կամ այլ համոզմունքների համար: Միաժամանակ խղճի բանտարկյալ չի համարվում մարդը, որը բռնություն է գործադրում կամ քարոզում է բռնություն եւ թշնամություն»,- ասված է հայտարարության մեջ։

Ստորագրահավաքը, սակայն, կտեւի մինչեւ հոկտեմբերի 31-ը, որին կհաջորդեն բողոքի ակցիաներ: Այս մասին մեր զրույցում ասաց Արթուր Սարգսյանին սատարող Դավիթ Սանասարյանը: «Ստորագրահավաքի կազմակերպիչներն այս ստորագրություններով դիմելու են Սերժ Սարգսյանին, նորանշանակ վարչապետ Կարեն Կարապետյանին, որը մշտապես մարդու, օրենքի մասին է այս վերջերս խոսել եւ այլն:

Այնուհետեւ այդ ստորագրությունները կներկայացնեն դատարան՝ միջնորդելով փոխել Արթուր Սարգսյանի խափանման միջոց կալանավորումը: Արթուր Սարգսյանը խղճի բանտարկյալ է եւ պետք է րոպե առաջ ազատության մեջ գտնվի: Չհաշված նաեւ այն, որ նա առողջական լուրջ խնդիրներ ունի, պատերազմի ժամանակ հաց տանելիս վիրավորվել է: Եթե ներպետական ատյանները որեւէ քայլ չանեն, չազատեն Արթուր Սարգսյանին, ապա միջազգային ատյանների հետ արդեն պայմանավորվածություն կա այս հարցով զբաղվելու»,- մանրամասնեց Սանասարյանը՝ հավելելով, որ ամբողջ հոկտեմբեր ամիսը ի պաշտպանություն Արթուր Սարգսյանի բողոքի ակցիաներ են լինելու:

Խոսելով ակցիաների բնույթի մասին, նա նշեց. «Արթուրի անունից «Սասնա ծռեր» խմբի անդամներին հաց տանելու գործընթաց է լինելու, այնուհետեւ կլինեն ֆլեշմոբեր: Առաջիկայում կլինի նաեւ բարեգործական համերգ, սա ինչ որ շարք է Արթուրի համար ազատություն ձեռք բերելու, որը կազմակերպիչներն իրականացնում են»:

Դիտարկմանը՝ սպասելիքներ կա՞ն Սերժ Սարգսյանից, հաշվի առնելով այն հանգամանքը, որ Արթուրին բոլորը քաղբանտարկյալ են համարում, Սանասարյանն ասաց, որ դա կազմակերպիչների ստրատեգիան է: Նա ասաց, որ ստորագրահավաքի կազմակերպիչներն առաջիկայում դիմելու են ընդդիմադիր պատգամավորներ Նիկոլ Փաշինյանին, Զարուհի Փոստանջյանին, Թեւան Պողոսյանին եւ մյուսներին, որոնք դիրքորոշում կհայտնեն Արթուր Սարգսյանի վերաբերյալ:

«Սասնա ծռեր» խմբի անդամներին սնունդ հասցրած Սարգսյանի պաշտպան Տիգրան Եգորյանը մեր զրույցում ասաց, որ երեկ Վերաքննիչ բողոք են ներկայացրել իր պաշտպանյալի կալանքը երկարաձգելու՝ դատարանի որոշման դեմ: Պաշտպանական կողմը, սակայն, ինչպես առաջին ատյանի այնպես էլ Վերաքննիչ դատարանից որեւէ հույս չունի: Ինչ վերաբերում է կազմակերպված ստորագրահավաքին,ապա Եգորյանն ասաց, որ առաջին ատյանի դատարանում նույնիսկ պատգամավորների երաշխավորագրերը չօգնեցին՝ դատարանը կրկին անհիմն երկարաձգեց Արթուրի կալանքը: Եգորյանն ասաց, որ երաշխավորագրին միացել էր 5-6 պատգամավոր:

Մեր հարցին, թե նրա մասնակցությամբ քննչական գործողություններ նախաքննական մարմինը կատարո՞ւմ է, պաշտպանը բացասական պատասխան տվեց՝ հավելելով, որ իրենց քննչական գործողությունների մասին դեռ որեւէ բան չեն հայտնել: Պաշտպանը մեր հարցին ի պատասխան ասաց, որ բանտային պայմաններում Արթուր Սարգսյանի վիճակն էլ ավելի է վատացել, նրան ամեն օր ցավազրկում են:

Նրա առողջական վիճակի վերաբերյալ բոլոր փաստաթղթերը ներկայացվել են դատարան, սակայն անօգուտ, 2-րդ կարգի հաշմանդամը շարունակում է գտնվել կալանքի տակ: Արթուր Սարգսյանն ունի տեղաշարժման, կանգնելու, նստելու հետ կապված խնդիրներ, երկրորդ կարգի հաշմանդամ է: Կարող է բարձրացնել մինչեւ 1 կգ կշռող իրեր: Այսինքն՝ Արթուրի առողջական վիճակն անհամատեղելի է կալանքի կրման հետ: Մեր հարցին, թե Սարգսյանը դատարանի այս որոշումների հետ կապված որեւէ հայտարարություն չի՞ արել, Տիգրան Եգորյանն ասաց, որ իր պաշտպանյալը առաջիկայում հանդես կգա հայտարարությամբ:

Հիշեցնենք, որ Արթուր Սարգսյանի կալանքը եւս երկու ամսով երկարաձգվել է սեպտեմբերի 24-ին: Նրան ի սկզբանե առաջադրվել էր նույն մեղադրանքը, ինչ «Սասնա ծռեր» խմբի մյուս անդամներին: Ապա մի քանի օր անց այն փոփոխվել էր՝ դառնալով օժանդակություն (ՔՕ 38-218 եւ 38-235 հոդվածներ): Այսինքն՝ ըստ մեղադրանքի, նա օժանդակել է բժիշկներին պատանդ պահելուն եւ ապօրինի զենք-զինամթերք փոխադրելուն ու կրելուն:

Արթուր Սարգսյանը առաջադրված  մեղադրանքը չի ընդունել, իրեն մեղավոր չի համարում: Պաշտպանական կողմի պնդմամբ՝ միակ բանը, որ արել է Արթուրը, մարդասիրական գործողությունն է, փորձել է սննդի փոխադրման միջոցով բացառել անձանց նկատմամբ կիրառվող անմարդկային վերաբերմունքը, ինչը քրեական օրենսգրքով նախատեսված որեւէ հանցակազմի չի համապատասխանում: Նշենք, որ Արթուր Սարգսյանը մասնագիտությամբ մանկավարժ է, սակայն 27 տարի է՝ զբաղվում է փորագրությամբ: Արթուրը տարբեր ոճի գործեր է փորագրում՝ զարդատուփեր, փայտե փորագրությամբ ժամացույցներ, արեւային ժամացույցներ, մրգամաններ, որոնք Վերնիսաժում վաճառվում են: