Փորձ արվեց Ձեզ համոզել, որ Դուք վաղը արձակուրդ եք գնալու. Քոչարյանի գործով մեղադրող դատախազը՝ դատավորին

«Ես չեմ լսել որեւէ փաստարկ, որը կարող է կապվել Ձեր՝ սույն գործով որեւէ կանխակալ դիրքորոշման հետ»:

Վերաքննիչ քրեական դատարանում այսօր այս մասին հայտարարեց Երեւան քաղաքի դատախազ Գեւորգ Բաղդասարյանը՝ առարկելով Մարտի 1-ի գործով ամբաստանյալ Ռոբերտ Քոչարյանի պաշտպանների՝ դատավորին ներկայացրած ինքնաբացարկի միջնորդության դեմ:

Միջնորդությունը որակելով անհիմն՝ մեղադրող դատախազը նշեց. «Ինչպես շատ հաճախ եմ հանդիպում, պաշտպանները միջնորդության հիմքերին մոտենում են հակառակ կողմից: Խոսքը Ձեր արձակուրդի մասին է, որի շրջանակում փորձ արվեց Ձեզ համոզել, որ Դուք վաղը արձակուրդ եք գնալու: Ես վստահ եմ, որ պաշտպանության կողմի բոլոր ներկայացուցիչները տարվա սկզբում իրենց պլանավորածի պես չեն կարողանում արձակուրդ գնալ, ինչպես բոլորիս հետ է պատահում, եւ դա շատ նորմալ աշխատանքային պրոցես է, ուստի այն հանգամանքը, որ Ձեր արձակուրդ գնալը հետաձգվել է որեւէ պատճառով, փորձ արվեց ներկայացնել, թե հետաձգվել է, որպեսզի սույն բողոքը Ձեզ մակարգվի: Դա անտրամաբանական է»,- ասաց մեղադրող դատախազը:

Ինչ վերաբերում է դատավորի եղբոր եւ սույն գործով տուժողների իրավահաջորդների նախկին ներկայացուցիչ այժմ ՍԴ դատավոր Վահե Գրիգորյանի հարաբերություններին, Գեւորգ Բաղդասարյանը նշեց՝ տպավորությունն այնպիսին էր, թե նրանց միջեւ աշխատանքային հարաբերություններ են, անգամ համատեղ ներկայացուցչություն է եղել Եվրոպական դատարանում. «Սրա հետ կապված չեմ կարող ասել՝ այո կամ ոչ, բայց չեմ կարողանում հասկանալ, թե ինչ կապ ունի դա Ձեզ հետ: Ես վստահ եմ, որ բոլորի եղբայրները ու քույրերը իրավունք ունեն ունենալու սեփական կարծիք, կիսվելու դրանով կամ չկիսվելու, տխրելու ինչ-որ իրադարձությամբ կամ ուրախանալու, եւ դա չի կարող որեւէ կերպ կապվել այդ անձի ազգակցական կապերի հետ»:

Բաղդասարյանի խոսքով՝ միակ փաստարկը, որն այդքան էլ պարզ չէր, այն է, որ դատավորի ֆեյսբուքյան էջից հավանություն է եղել Վահե Գրիգորյանի հրապարակումներից մեկին, «Բայց կարծեմ՝ դա կապված է Ձեր եղբոր՝ Եվրոպական դատարանում ունեցած աշխատանքային հաջորղության հետ, եւ սույն գործի հետ առնչություն ունենալ չի կարող, իսկ այն հանգամանքը, որ Ձեր եղբայրը տարածել է Սերժ Թանկյանի նշված գրառումը, դեռ չի նշանակում, որ դատավոր Լուսինե Աբգարյանը կանխակալ վերաբերմունք ունի Ռոբերտ Քոչարյանի խափանման միջոցի վերաբերյալ»,- նկատեց Բաղդասարյանը:

Երեւան քաղաքի դատախազը  պնդեց՝ իր լսած փաստարկները հիմք չեն տալիս կասկածելու դատավորի անաչառության մեջ. «Ըստ իս՝ դատավարական յուրաքանչյուր սուբյեկտ անձամբ պիտի որոշի՝ ինքը կաշկանդված է ինչ-որ բանով թե՝ ոչ, ներկայացված փաստարկները, համենայն դեպս, ինձ հիմք չեն տվել ենթադրելու, թե Դուք կաշկանդված եք, որովհետեւ Ձեր հետ կապվող որեւէ գործողության մասին մենք այստեղ չլսեցինք»:

Մեղադրող դատախազն Պետրոս Պետրոսյանն էլ, միանալով հնչած տեսակետին, ասաց, որ ներկայացված միջնորդությունը փաստական հիմքեր չէր պարունակում. «Կանխակալության վերաբերյալ տեղեկատվություն ունենալու պայմաններում դատարանն ինքը կբարձրաձայներ եւ կողմերին կհայտներ այդ մասին՝ առաջարկելով իր  բացակայության պայմաններում դրա անտեսման հարցը քննարկել կամ միանգամից ինքնաբացարկ կհայտներ»,-ընդգծեց Պետրոսյանը:

Վերջինս, անդրադառնալով դատավորի՝ արձակուրդին վերաբերող փաստարկին, ասաց, որ դա կապվեց այն հանգամանքին, որ դատավոր Պապոյանի ինքնաբացարկ հայտնելուց հետո ինքն այս բողոքը ընդունել է վարույթ, այդ իսկ պատճառով արձակուրդը տարաժամկետվել է. «Եթե մեկը մյուսի հետ կապված լիներ, ապա արդեն իսկ դեկտեմբերի 7-ին, այդ 10-օրա ժամկետով պայմանավորված, Ձեր անունը պետք է բաշխման ցուցակից հանված լիներ, բայց ամսի 7-ին որեւէ պայծառատես չէր կարող իմանալ, որ ամսի 9-ին դատավոր Պապոյանը պետք է ինքնաբացարկ հայտներ, եւ այդ տրամաբանության լույսի ներքո էլ Դուք ընդունեիք այս բողոքի քննարկումը: Ինչ վերաբերում է Ձեր եղբոր կողմից իր անձնական էջում որեւէ գործողություն կատարելուն, սլացիկ, հպանցիկ ցույց տալը, թե այդպիսի գործողությունները կապվում են նաեւ Ձեր անձի հետ, փոքրիկ հնարք էր»,-նշեց մեղադրողը՝ միջնորդելով մերժել պաշտպանների ինքնաբացարկի միջնորդությունը: