Պահանջում են Արմեն Բաբախանյանի հրաժարականը. սկանդալ կոնսերվատորիայում

Երեւանի Կոմիտասի պետական կոնսերվատորիայի ուսանողներն ու դասախոսները ստորագրահավաք են սկսել ընդդեմ կոնսերվատորիայի դաշնամուրային ֆակուլտետի դեկան Արմեն Բաբախանյանի: Նրանք պահանջում են պաշտոնից ազատել Արմեն Բաբախանյանին: Նախաձեռնության անդամները մեր զրույցում ասացին, որ նման կերպ փորձում են Կոնսերվատորիայում արդարությունը վերականգնել եւ վախի մթնոլորտը կոտրել:

Բողոքավոր ուսանողները պնդում են, որ Արմեն Բաբախանյանն օժտված չէ մարդկային ոչ մի որակով: Նշում են, որ վերջինիս կողմից բազմիցս իրականացվել է պաշտոնեական դիրքի չարաշահում եւ որ այսօր էլ Բաբախանյանը շարունակում է նույն աշխատաոճը: «Դաշնամուրային ֆակուլտետում տիրում է վախի մթնոլորտ, դասախոսների մեծ մասն ու ուսանողները չեն կարողանում իրենց կարծիքը հայտնել: Դասախոսները վախենում են, որ աշխատանքից կհեռացվեն, իսկ ուսանողները՝ անվճարից կզրկվեն»,- ասում են նրանք:

Նրանք չեն բացառում, որ Բաբախանյանը բավական լավ մասնագետ է, սակայն փաստում են մեկ այլ արատավոր երեւույթ, այն է. «Եթե Բաբախանյանն է մի բան ասում է, ապա դա քննարկման ենթակա չէ եւ միաբերան ընդունվում է»:

Ասում են՝ անկախ նրանից, թե Կոնսերվատորիայի դաշնամուրի բաժնի ուսանողները լավ կնվագեն, թե՝ վատ, միեւնույն է՝  իրենց գնահատականները նախապես արդեն ֆիքսված են. «Գումարային պահեր էլ կան, մենք հստակ գիտենք, որ այնտեղ որոշները հավելյալ գումար են տալիս եւ բոլոր հարցերը լուծում: Քննական հանձնաժողովներում էլ յուրաքանչյուր տարի նույն մարդիկ են: Սակայն օրենքը սահմանում է, որ հանձնաժողովի կազմը պետք է փոփոխվի, նոր մասնագետներով համալրվի»:

Ուսանողները վստահեցնում են՝ Կոնսերվատորիայում մեծամասնությունն է դեմ Բաբախանյանին, սակայն վախենում են բարձրաձայնել: Նրանց խոսքով՝ Բաբախանյանի կողմից պաշտոնի չարաշահում է կատարվում բոլոր առումներով, վերջինս ներկա է գտնվում տարբեր քննությունների ժամանակ, որոնք դաշնամուրային ֆակուլտետին չեն վերաբերվում՝ փորձում է անտեղի միջամտություններ անել, քննական շրջանում ուսանողների վրա ճնշում գործադրել:

Ուսանողները վստահեցնում են, որ Բաբախանյանի կողմից նման քայլերը հավելյալ գումար ստանալու ակնկալիք են հետապնդում: Նրանց խոսքով՝ Կոնսերվատորիան կոռումպացված է, ուսանողներն ու դասախոսները պարբերաբար բախվում են անարդարության եւ խտրականության:

Արմեն Բաբախանյանի դեմ բողոքի ալիք բարձրացրածները հայտարարում են, որ դաշնամուրային բաժնի դեկանի կողմից պաշտոնը չարաշահելու եւ նրա կողմից բուհ ներմուծած արատավոր երեւույթների մասին խոսում են երկար տարիներ, սակայն մինչ այս, խոսակցությունները հիմնականում կոնսերվատորիայի պատերի ներսում են մնացել: Դեկանի խտրական վերաբերմունքի պատճառով ուսանողների միջեւ առաջացել է պառակտում, որն իրենց համար ցանկալի չէ: «Փորձում ենք անկախ ամեն ինչից մարդկային հարաբերությունները պահպանել, բայց միեւնույն է՝ հակասական բաներ են առաջանում հաճախ»,- ասում են նրանք:

Ուսանողները կետերով հիմնավորում են իրենց բողոքը՝ ընդդեմ Արմեն Բաբախանյանի. վախի եւ անվստահության մթնոլորտ, շահադիտական նկատառումներից ելնելով՝ որոշ ուսանողների ստիպողաբար ներգրավումն սեփական դասարան, քննական հանձնաժողովների մշտական անփոփոխ կազմ, մասնագիտական դասախոսների ներգրավման դիմումի մերժում, արհամարհական հեգնական վերաբերմունք եւ ուսանողների բարեւին չպատասխանել, Բաբախանյանի կողմից քննական ընթացքի խոչընդոտում ՝ նվագելու ընթացքում բարձր ծիծաղ, աղմուկ եւ այլն: Մրցույթներին մասնակցելու հնարավորություն է տրվում միայն այն ուսանողներին, որոնք Արմեն Բաբախանյանի սաներն են:

Ուսանողների ստորագրահավաքի եւ բողոքների մասին ՀԺ-ն զրուցեց սկանդալի կենտրոնում հայտնված հայտնի դաշնակահարի հետ: Արմեն Բաբախանյանը վստահեցրեց, որ ուսանողների հետ նմանատիպ կոնֆլիկտ երբեւէ չի ունեցել, եղել են գնահատականների եւ դասապրոցեսի հետ կապված մասնավոր հարցեր, սակայն նմանատիպ դեպք դեռ չէր եղել:

Բաբախանյանը տեղյակ էր ուսանողների ստորագրահավաքից, բողոքներից, նշեց, որ տեղյակ է նաեւ, որ ստորագրահավաքին են միացել դասախոսները եւս: Արմեն Բաբախանյանին առավել զարմացրել է այն, որ  ստորագրահավաքին մասնակից են ոչ միայն դաշնամուրային ֆակուլտետի ուսանողները, այլեւ մյուս ֆակուլտետներինը: Ստորագրահավաքին դասախոսների մասնակցությունը Բաբախանյանին չէր զարմացրել. «Սպասում էի, որոշ պատճառներ միանշանակ կան: Ուսումնական պրոցեսում, արվեստի ոլորտում շատ հարցեր կան՝ կապված գնահատականի եւ այլնի հետ»:

Մեր դիտարկմանը, թե ուսանողները դժգոհում են, որ Բաբախանյանն իրենց նորմալ չի վերաբերվում, անգամ իրենց բարեւին չի պատասխանում, դեկանը չժխտեց՝ ասելով. «Բարեւելու խնդիրը իմ ողջ կյանքի ընթացքում է եղել, դա նոր բան չէ: Նախ, լավ չեմ տեսնում: Հաճախակի, երբ մտքերով եմ ընկնում, ես ընդհանրապես չեմ ընկալում արտաքին շարժը»:

Բաբախանյանն ասաց, որ տաքսի նստելիս էլ, երբ վարորդը ռաբիս երաժշտություն է միացնում, պարզապես անջատում է լսողությունն ու չի լսում, որովհետեւ չի սիրում: Ասում է՝ ուսանողներից բացի, մտերիմներն էլ են նեղանում: Մեզ հայտնի դարձավ, որ բուհում ծագած սկանդալից հետո Կոնսերվատորիայի ռեկտոր Շահեն Շահինյանն իր մոտ է հրավիրել Արմեն Բաբախանյանին:  

Ռեկտորն ասել է, որ կա խնդիր եւ պետք է դրան լուծում տրվի: Որոշվել է առաջիկա մի քանի օրը հանդիպում կազմակերպել ուսանողների եւ դեկանի միջեւ: «Ես չգիտեմ՝ դա ինչ ձեւով կարվի, ըստ ռեկտորի կաղապարի՝ պետք է լինի մի խումբ ուսանողների, իհարկե դաշնակահարների հետ, որովհետեւ նախաձեռնությունն առաջին հերթին իրենցն է»:

Մեր հարցին՝ պատրա՞ստ է ուսանողների կողմից հնչեցրած բողոքների եւ ուսումնական պրոցեսում որոշ առաջարկների շուրջ բանակցությունների գնալ, Բաբախանյանը պատասխանեց. «Միանշանակ, բայց նայած, թե ինչին է դա վերաբերվում, եւ նայած, թե ինչ ձեւով կներկայացնեն խնդիրը»:

Արմեն Բաբախանյանն անդրադարձավ ուսանողներին հուզող երկու հիմնական հարցերին եւս, այն է՝ բոլոր քննություններին իր պարտադիր ներկայությունը եւ հանձնաժողովի կազմի չփոփոխվելը. «Մենք ունենք երկու ամբիոն, ամեն ամբիոնից ընդգրկվում է մեկ կամ երկու հոգի եւ մեկ-երկու դասախոս, որոնց ինքս եմ ընտրում»:

Մեր հարցին՝ լուրեր են շրջանառվում, որ Կոնսերվատորիայի դաշնամուրային բաժնում ուսանողներից շատերը, ովքեր հավելյալ գումար չեն վճարում դասախոսներին, դասաժամերին անուշադրության են մատնվում՝ Արմեն Բաբախանյանը չժխտեց. «Ես գիտեմ, որ նման խնդիր կա, եւ կարող եմ ասել, որ դեմ եմ, դա սխալ է:

Լսել եմ այս խնդրի մասին, միանշանակ կա, բայց այս խնդիրը միայն Երեւանի պետական կոնսերվատորիայում չէ, սա մեր ամբողջ կրթական համակարգում է, բուհերում, դպրոցներում: Դասախոսները ունեն լիմիտ, եթե նշված լիմիտը սպառվում է, տվյալ դասախոսը կարող է ուսանողին վերցնել իր խումբ, սակայն հավելյալ վճարի դեպքում: Ես չեմ ասում, թե դա լավ է կամ վատ, բայց գուցե նման ձեւով է եղել:

Մեր հարցին՝ եթե ստորագրահավաքին ավելի շատ ուսանողներ միանան եւ պահանջեն վերջինիս հրաժարականը, ապա պատրա՞ստ է գնալ այդ քայլին. դեկանը պատասխանեց. «Հույս ունեմ, որ ուսանողության հետ հանդիպման ընթացքում կփորձենք գտնել ինչ-որ մի եզր եւ իրար կհասկանանք»:

Հ.Գ. Նյութը պատրաստ էր հրապարակման, երբ տեղեկություն ստացանք, որ Արմեն Բաբախանյանը հանդիպել է ուսանողների հետ եւ նրանց հետ զրույցում հայտարարել, որ հրաժարական կտա: Հրաժարականի պաշտոնական դիմում, սակայն այս պահին ռեկտորատը չի ստացել:

Տպել
5019 դիտում

Դատարանը երկու ամսով երկարաձգել է Ղրղըզստանի նախկին նախագահի կալանքը

Համակարգչային տեխնիկայի օգնությամբ այլ անձանց բանկային քարտերից հափշտակություն են կատարել. մեղադրանք է առաջադրվել 3 անձի

Բաղրամյան պողոտայում ստիպված ուժ կիրառվեց, ոչ թե բռնի, այլ համաչափ ֆիզիկական ուժ. ոստիկանություն

Հարեւանիս 30 խոզը կոտորվան, իմոնց բան չեղավ. Վիետնամական ցեղատեսակի խոզերը պահանջարկ ունեն Տավուշում (լուսանկարներ)

Սուրիկ Խաչատրյանը Փարիզում սրտի շատ ծանր վիրահատություն է տարել, մինչեւ այժմ կոմայի մեջ է․ Սեյրան Սարոյան

Պատկերացնո՞ւմ եք, երեխան ասում ա՝ պապա 1-ն ու պապա 2-ը եկան․ Սեյրան Սարոյանը՝ Ստամբուլյան կոնվենցիայի մասին

Չեմ հավատում, որ տենց բան կարա լինի, սութի շուխուռ ա․ Սարոյանը՝ Սերժ Սարգսյանի հնարավոր ձերբակալության մասին

Վարչապետը գաղտնազերծեց արվեստի գլուխգործոցները դպրոցներ տանելու գաղափարի մանրամասները

Ալիկ Սարգսյանը եւ այլք զբաղված են եղել հետին թվով նոր զեկուցագրեր պատրաստելով. Սեդա Սաֆարյան

Արդարադատության նախարարը խոսել է ցմահ դատապարտյաների հետ. նրանք բարձրաձայնել են մի շարք խնդիրներ

Սեյրան Սարոյանը համաձայն է, որ Մանվել Գրիգորյանի օրոք Էջմիածնում վախի մթնոլորտ է եղել

Նախարար Ֆելիքս Ցոլակյանը մանրամասներ է ներկայացրել հրդեհի և հրդեհաշիջման աշխատանքների ընթացքի վերաբերյալ. տեսանյութ

Հարթաշեն և Քարահունջ համայնքներում արձանագրվել են խոզերի անկման դեպքեր. ԱԻՆ

Դադարում եմ լինել առողջապահության նախարարության ուռուցքաբանության գծով խորհրդատու. Գեւորգ Թամամյանի խոսքը՝ նախարարին

Խնդրում եմ ազատել ինձ Շիրակի պետական համալսարանի հոգաբարձուների խորհրդի անդամ լինելու պաշտոնից. Գայանե Շագոյան

Նիկոլի հետ խոսել եմ Մանվելի մասին, որ հանկարծ էդ մարդը չմեռնի բերդերում, խայտառակ լինենք․ Սեյրան Սարոյան

«Քո գիտությունը դպրոցում». գալիք ուսումնական տարում դպրոցներում կիրագործվի նոր ծրագիր

ԱԱԾ-ն էներգետիկ համակարգի խափանման գործով լրացուցիչ փորձաքննության անհրաժեշտություն է տեսել

Ինչքան ճանաչված մարդ կա, պիտի պախարակեն․ սուտ տարածում ա, թե գեներալ Սեյրանին պառկացրին գետնին․ Սեյրան Սարոյան

Էջմիածնի քաղաքապետ Դիանա Գասպարյանի դեմ ներկայացված հայցը վարույթ է ընդունվել