Պայթյուն Հյուսիսային պողոտայում. կա 8 վիրավոր, 5-ը երեխաներ են (լուսանկարներ) թարմացվող

10:35- «Բուրգեր Քինգ» արագ սննդի կետի պայթյունի դեպքի առթիվ հարուցվել է քրեական գործ։ Այդ մասին Ֆեյսբուքյան իր էջում հայտնել է Քննչական կոմիտեի նախագահի խորհրդական Սոնա Տռուզյանը։ Ըստ Տռուզյանի, քրեական գործը հարուցվել է Քրեական օրենսգրքի 279-րդ հոդվածի 2-րդ մասի 2-րդ կետով, այն է՝ անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը, որն անզգուշությամբ վնաս է պատճառել երկու կամ ավելի անձանց առողջությանը։

08:40- Ամենածանր վիճակում գտնվում էր 8-ամյա Ռուբինա Մարկոսյանը: Նրան վիրահատել էին, վիրահատությունը տեւել էր 1,5 ժամից ավելի:

Բժիշկների փոխանցմամբ, երեխայի մոտ կոնքազդրային շրջանում մեծ չափի սալջաարդ կար՝ պատռված, արնահոսող վերքերով: Արնահոսության դադարեցում է կատարվել, բոլոր պատռվածքները կարվել են, երեխայի վիճակը գնահատվում է ծանր, բայց կյանքին վտանգ չի սպառնում: Հիվանդանոցի բժիշկների փոխանցմամբ, բոլոր տուժածների մոտ սալջարդեր ու պատռված վերքեր են, հիմնականում դրանք կարելու անհրաժեշտություն է եղել:

08:15- Ժամը 07:45-ին, ԱԻՆ հասարակայնության հետ կապի եւ լրատվության վարչության փոխանցմամբ, «Սուրբ Գրիգոր Լուսավորիչ» ԲԿ հերթապահ բժշկից ճշտվել է, որ տուժածներից Զեյնաբ Հուսեինին դուրս է գրվել, Ռուբինա մարկոսյանի առողջական վիճակը գնահատվել է ծանր, իսկ մյուսներինը` բավարար: Պայթյունի հետևանքով վնասվել են խոհանոցը (60 քմ), սպասարկման տաղավարը՝ մոտ 2 քմ, սրահի կախովի առաստաղը՝ մոտ 8 քմ, 2 գարեջրի տարա (40 լ) և սպասքի պարագաներ:

23:00- Հայաստանի ԱԻ նախարարությունը հրապարակել է պայթյունից տուժած ՌԴ, ԻԻՀ, ՀՀ քաղաքացիների անունները: Նրանցից 3-ը 15 տարեկան են, մյուսները՝ 6, 8, 19, 24, 24: 8-ամյա Ռուբինա Մարկոսյանի առողջական վիճակը գնահատվել է ծայրահեղ ծանր, իսկ մյուսներինը՝ ծանր կայուն: Վիրահատվող երեխան կոնքազդրային հոդի հատվածում ունի բարդ, խորը վնասվածքներ:

22:22- Տեղում աշխատող մեր թղթակցին ԱԻՆ ներկայացուցիչն ասել է, որ տուժածներն ընդհանուր առմամբ 8-ն են, որոնցից մեկը սննդի կետի աշխատակիցն է՝ մենեջերը:

Վիրավորները տեղափոխվել են Սուրբ Գրիգոր Լուսավորիչ բժշկական կենտրոն, 2-ի վիճակն է հիմա ավելի ծանր, մեկը 8 տարեկան երեխա է, որի կյանքին վտանգ է սպառնում, նրան վիրահատում են:

Վիրավորների թվում Ռուսաստանի Դաշնության 3 քաղաքացիներ են, 2-ը՝ Իրանի Իսլամական հանրապետության, 3-ը՝ Երեւանի բնակիչներ:

Մեր թղթակցին նաեւ հայտնել են, որ պայթյունը հրդեհատեխնիկական անվտանգության խնդիրների հետ կապ չունի, ռուսաստանյան վերջին դեպքի հետ կապված անվտանգության խստացված ստուգումներ են կատարվում բոլոր տեղերում:

22:00- Հայտնի են նոր մանրամասներ, համաձայն որոնց, Գրիգոր Լուսավորիչ բժշկական կենտրոնում 8 վիրավոր կա, որոնցից 5-ը անչափահասներ են, մեկը՝ 16 տարեկան, մյուս երկուսը՝ 19, 25 տարեկան:

21:45- Վիրավորներից մեկը տեղափոխվել է թիվ 1 համալսարանական հիվանդանոց:

21:40- Նախնական տեղեկություններով, 7 վիրավոր տարբեր աստիճանի վնասվածքներով տեղափոխվել են հիվանդանոց, վիրավոր երեխաները երկուսն են:

Պայթել է գարեջրի ճնշումը պահող բալոնը, այս մասին տեղում աշխատող մեր թղթակցին հայտնել է ՀՀ ոստիկանության հասարակայնության հետ կապերի եւ լրատվության վարչության պետ Աշոտ Ահարոնյանը:

21:35- ԱԻՆ լրատվական ծառայության փոխանցմամբ, Նախնական տվյալներով խոհանոցում պայթել է թթվածնի բալոն, կա 9 տուժած, (այդ թվում օտարերկրյա քաղաքացիներ), ովքեր տեղափոխվել են «Սուրբ Գրիգոր Լուսավորիչ» ԲԿ: Թե քանիսն են երեխաներ՝ ճշտվում է:

21:09- Ապրիլի 2-ին, ժամը 20:44-ին ՀՀ ԱԻՆ-ում ահազանգ է ստացվել, որ Երևան քաղաքի Հյուսիսային պողոտայում տեղի է ունեցել պայթյուն, կան տուժածներ. անհրաժեշտ է փրկարարների օգնությունը:

Դեպքի վայր են մեկնել չորս մարտական հաշվարկ, Ճգնաժամային կառավարման ազգային կենտրոնի արտակարգ իրավիճակների արձագանքման և օպերատիվ խմբերը:

Պայթյունը տեղի է ունեցել «Քինգ Բուրգերում»,  տուժել է 3 երեխա:

լուսանկարները՝ Araratnews-իՊայթյունի մասին հայտնել է նաեւ ֆեյսբուքյան օգտատեր Գեղամ Այդյանը՝ հրապարակելով լուսանկար