ՀՀԿ-ի շտաբը պետք է դատի տար տնօրեններին` իրենց զրպարտելու համար. Արթուր Սաքունց

«Ինչ-որ չափով դպրոցի տնօրենները զոհեր են, ինչպես այն քաղաքացիները, որոնք կաշառքը վերցրած՝ գնացին ընտրության: Երկրում ստեղծվել է մի իրավիճակ, որ ուսուցիչները, տնօրենները դրվել են այդպիսի իրավիճակում իրենց աշխատանքը չկորցնելու համար, եթե հաշվի առնենք, որ տնօրեններն ու ուսուցիչները պաշտոն ստանալու եւ իրենց պաշտոնը պահելու համար որոշակի գումար են տալիս»,- այս մասին «Մեդիա կենտրոն»-ում այսօր կազմակերպված քննարկման ժամանակ ասաց Հայաստանի Հելսինկյան Կոմիտեի նախագահ Ավետիք Իշխանյանը՝ անդրադառնալով «Իրազեկ քաղաքացիների միավորում» հասարակական կազմակերպության ներկայացուցիչ Դանիել Իոաննիսյանի դեմ դատական հայցերին:

Ավետիք Իշխանյանի կարծիքով՝ պետք է հիմնական սլաքները ուղղվեն տնօրեններին եւ ուսուցիչներին ՀՀԿ-ի համար ցուցակագրում կատարելու ուղղորդողների դեմ, որոնք ՀՀԿ-ից են: «Պատահական չէ, որ այդ ցուցակները պետք է ներկայացնեն մարզպետարան, շտաբներ: Ես չեմ ուզում արդարացնել դպրոցների տնօրեններին, բայց պետք է հիշել ստալինյան շրջանը, թե ինչպես էին մարդիկ մատնում: Ես չեմ ասում, որ այդ մարդիկ սրիկաներ էին, այլ մթնոլորտն է նրանց դարձրել այդպիսին»,- հայտարարեց Ավետիք Իշխանյանը:

Հելսինկյան Կոմիտեի նախագահը «Իրազեկ քաղաքացիների միավորման» կատարած գաղտնի ձայնագրությունների մեջ որեւէ քրեական կամ քաղաքացիական ոչ օրինական արարք չի տեսնում, այլ ընդամենը՝ լրագրողական հնարք է իրականացվել: «Քաղաքակիրթ երկրներում դա լինում է սկանդալ, որին հետեւում են հրաժարականներ, իրավապահների կողմից հետաքննություն, պատվիրողների նկատմամբ՝ խիստ պատիժ: Հիմա այդ դպրոցի տնօրեններին երկրորդ անգամ են նվաստացնում՝ բերելով դատական գործերը: Եթե նրանց ինքնասիրությունը վիրավորվել է, նրանք պետք է դատի տային մարզպետարանների աշխատակիցներին, որոնք իրենց այդ իրավիճակում էին դրել»,- ասաց նա:

Դանիել Իոաննիսյանի դեմ դատական հայցերը, Ավետիք Իշխանյանի կարծիքով, վտանգավոր նախադեպ կարող է դառնա: «Միջազգային ճնշում պետք է կիրառել, որ այս հարցը փակվի»,- ասաց Իշխանյանը:

Հելսինկյան Քաղաքացիական Ասամբլեայի Վանաձորի գրասենյակի ղեկավար Արթուր Սաքունցն էլ կարծում է, որ խնդրի բուն էությունը կայանում է նրանում, որ տնօրենները չպետք է դիմեին դատարան՝ զրպարտության հիմքով, այլ պետք է զրպարտության հայցով դիմեին քաղաքապետարանները, մարզպետարանները, համայնքապետարանները եւ ՀՀԿ-ի կենտրոնական շտաբն ընդդեմ տնօրենների, որ այն՝ ինչ տնօրեններն ասում են, թե ցուցակներ են պահանջել այդ մարմինները, դա չի համապատասխանում իրականությանը եւ դա զրպարտություն է:

«Ո՞րն է շարժառիթը: ՀՀԿ-ի փոխնախագահը, եւ ղեկավարությունը հասկանում է, որ իրապես իրենք այդտեղ ուղղակի պատասխանատվություն ունեն, բայց չունեն խիզախություն ընդունեն այդ պատասխանատվությունը: Պատասխանատվությունը կրելու քաջություն պետք է ունենան: Սա խոսում է այն մասին, որ հանրության առաջ պատասխանատվություն վերցնելու քաջություն չունենալով՝ փորձում են տնօրենների միջոցով սեփական երեսը պարզել»,- ասաց Արթուր Սաքունցն ու նկատեց, որ քաղաքական ուժերը պետք է հայտարարություններով հանդես գան, պետք է քաղաքական գնահատական տան Դանիել Իոաննիսյանի դեմ սկսված գործընթացին, եթե չտան գնահատական, ապա նշանակում է, որ իրենք համաձայն են այս դատական հայցերի հետ եւ համագործակցում են ՀՀԿ-ի հետ:

Լրագրողների «Ասպարեզ» ակումբի ղեկավար Լեւոն Բարսեղյանն էլ այն կարծիքին է, որ իշխանությունն աճեցնում է իր հերթական սերունդը: «Ծնողը ահաբեկված է, ազդված, մանկավարժները տարեկան պայմանագրեր ունեն, տնօրեններն ազդված են վարչության պետից, որոնք էլ մարզպետից եւ այլն: Սա կոռուպցիոն, պետության զավթման բուրգի մի փունջն է: Եթե այս մարտահրավերը չենք ընդունում, ուրեմն պետությունը սպառվել է: Սա նեղ քաղաքական, իշխանության խնդիր չէ, սա խոշոր խնդիր է: Յուրաքանչյուրս մեր գործի մեջ փորձենք քանդել այս «չուգուն գլուխները» եւ պետք է բարեխիղճ մարդիկ լինեն նման պաշտոններում»,- ասաց Լեւոն Բարսեղյանը:

Նրա խոսքով՝ Դանիել Իոաննիսյանի դեմ դատական հայցեր ներկայացրած անձինք անհարմար դրութան մեջ են հայտնվելու: «Հայցվորները քաշվելու են շատ գեշ, հետո գնալու են հրահանգիչներին ասեն՝ ինչ մի կրակի մեջ գցեցիք մեզ: Անհեթեթ հայցեր են, անապացուցելի բան է, մարդը չի զրպարտել: Խոսել ենք բազմաթիվ փաստաբանների, իրավաբանների, փորձագետների հետ»,- ընդգծեց Լեւոն Բարսեղյանը՝ նշելով, որ առաջիկայում հայտարարությամբ հանդես կգան եւ կոչ կանեն այլ անձանց միանալ դրան:

Մարտի 24-ին «Իրազեկ քաղաքացիների միավորման»` ապատեղեկատվության դեմ պայքարող SUT.am կայքը հրապարակեց 84 դպրոցի եւ 30 մանկապարտեզի տնօրենների հեռախոսային խոսակցությունների ձայնագրությունները, որոնք վկայում էին այն մասին, որ տնօրենները զբաղված են ՀՀԿ-ի համար ընտրողների ցուցակագրմամբ: