Գաղտնի ձայնագրությունները պահվում են Երեւանում. «Ռուսթավի 2»-ն ու գաղտնալսումները

«Украïнська революцiя» տեղեկատվական-վերլուծական հարթակը փետրվարի 6-ին ձայնագրություն է հրապարակել: Պարբերականի պնդմամբ` ձայնագրությունում զրուցում են Վրաստանի արդարադատության նախկին նախարար Զուրաբ Ադեիշվիլին եւ «Ռուսթավի 2» հեռուստաընկերության գլխավոր տնօրեն Նիկա Գվարամիան: Զրույցը ենթադրաբար «Ռուսթավի 2»-ի դատական գործին է վերաբերում: Նրանք խոսում են երկու դատավորի` Ալավիձեի եւ Ախվլեդիանիի մասին: Վրաստանի գերագույն դատարանի դատավոր Բեսարիոն Ալավաձեն հեռուստաընկերության դատական գործի դատավորն է: Ձայնագրության համաձայն` խոսքը նշված դատավորներին 3 միլիոն փոխանցելու մասին է: Գվարամիան նշում է. «Ախվլեդիանին Ալավիձեից ավելի շատ գործ է արել»:

«Միացյալ ազգային շարժում» կուսակցության եւ մասնավորապես Միխեիլ Սահակաշվիլիին սատարող «Ռուսթավի 2» հեռուստաընկերության շուրջ դատական գործընթացը շարունակվում է 2015 թվականի օգոստոսից: Նոյեմբերին քաղաքային դատարանը գործարար Կիբար Խալվաշիին է հանձնել հեռուստաընկերության 60 տոկոս բաժնեմասը, իսկ 40 տոկոսը` նրան պատկանող «Պանորամա» բաց բաժնետիրական ընկերությանը: Բացի այդ, դատարանը հեռուստաընկերության ժամանակավոր ղեկավարներ էր նշանակել: Ավելի ուշ վերաքննիչ դատարանը չեղարկեց ժամանակավոր ղեկավարների հետ կապված որոշումը` վերականգնելով հեռուստաընկերության գլխավոր տնօրեն Նիկա Գվարամիայի եւ ֆինանսական տնօրեն Կախա Դամենիայի լիազորությունները:

«Ռուսթավի 2»-ի վրա ճնշումների մասին են խոսել նաեւ Եվրախորհրդարանում: Եվրոպայի Ժողովրդական կուսակցության փոխնախագահ Իացեկ Սարիուշ-Վոլսկին նախորդ տարվա նոյեմբերի 30-ին հայտարարել է, որ վիզայի ազատականացում ստանալու հետաձգման պատճառներից մեկը հենց վերոնշյալ հեռուստաընկերության գործ է: Ռուսթավի 2»-ի գործը տեղ է գտել նաեւ Եվրամիության` Վրաստանի վերաբերյալ հաշվետվությունում, որի համաձայն` «Ռուսթավի 2»-ի տերերի վերաբերյալ բարձր հետաքրքրության արժանացած դատական պայքարը առաջացրել է քաղաքական տարաձայնություն` կապված պոտենցիալ քաղաքական միջամտության հետ: Հարցի մասին Վրաստանի արտգործնախարար Միխեիլ Ջանելիձեն նշել էր, որ տեղի է ունեցել «փաստերի կոնստանցիա»:

Նիկա Գվարամիայի եւ Զուրաբ Ադեիշվիլիի ենթադրյալ զրույցի ձայնագրության հրապարակման վերաբերյալ Վրաստանի ներքին գործերի նախարարությունը հետաքննություն է սկսել: Նախարարությունից տեղեկացրել են, որ հետաքննության հիմք է հանդիսացել հանրային տարածքում տարածված ձայնագրությունը: Նիկա Գվարամիայի խոսքերով, նշված ձայնագրությունը խմբագրված (մոնտաժված) է: «Առնվազն 2 տարի է` հեռախոսով չեմ խոսել Ադեիշվիլիի հետ: Ձայնագրությունը մոնտաժված էր, ձայնս վերցրել են մի քանի հեռախոսազրույցներից: Դա իմ եւ Ադեիշվիլիի հեռախոսազրույցը չէ»,- հայտարարել է Գվարամիան:

Այնուհետեւ Գվարամիան հայտարարություն էր տարածել, որի համաձայն` Բիձինա Իվանիշվիլիի գաղտնալսված զրույցների ձայնագրությունները պահվում են Երեւանում: Նշված ձայնագրությունները գլխավոր դատախազի նախկին տեղակալ Լաշա Նացվլիշվիլին մի քանի միլիոն դոլարի դիմաց հենց իրեն է առաջարկել: Հեռուստաընկերության տնօրենը նաեւ պատրաստակամություն է հայտնել դատախազությանը փոխանցել ողջ տեղեկատվությունն այն մասին, թե ինչպես է Նացվլիշվիլին նյութերը (լսումները) տեղափոխել Երեւան: Ավելի ուշ, «Ռուսթավի 2»-ը արհեստականորեն ստեղծված ձայնագրություն է հրապարակել, որտեղ իբր խոսում են Գվարամիան եւ Վրաստանի նախկին վարչապետ Բիձինա Իվանիշվիլին: Հեռուստաընկերության ուղերձը հետեւյալն էր` շատ հեշտ է արհեստական ձայնագրություններ ստեղծել:

«Պատկերացրեք այս ձայնագրությունը ոչ թե իմ էջում հրապարակեի եւ ասեի, որ արհեստական ստեղծված է, այլ հրապարակեի անհասկանալի կայքում, եւ լրատվամիջոցները սկսեին խոսել այդ մասին: Դա այն է, ինչ անում է Վրաստանի պետական անվտանգության ծառայությունը»,- հայտարարել է Գվարամիան: Նրա խոսքերով, պետական անվտանգության ծառայությունը անօրինական կերպով լսում եւ ձայնագրում է մարդկանց հեռախոսազրույցը: Ի դեպ, «Transparancy International  Վրաստան» կազմակերպության ներկայացուցիչ Լիկա Սաջաիյան երկրի խորհրդարանում հայտարարել է, որ պետանվտանգության ծառայությունը ուղիղ եւ անվերահսկելի հասանելիություն ունի մարդկանց անձնական կյանքին վերաբերող տեղեկատվությունների վրա:

«Հենց այս փորձից է հրաժարվել ժամանակակից աշխարհը եւ հաստատել վերահսկողություն, որի համաձայն, պետանվտանգությանը միայն այն դեպքում է հասանելի մարդու անձնական կյանքին վերաբերող տեղեկատվությունը, եթե առկա է դատարանի որոշում: Ցավոք, ներկա օրենսդրությամբ ոչինչ չի փոխվում: Այս հարցով զբաղվող համապատասխան վարչությունը իրավական այդ կարգավիճակը կստանա, սակայն կշարունակի հանդիսանալ պետանվտանգության բաղկացուցիչ: Սա նշանակում է, որ մեր հեռախոսազրույցներն ու անձնական կապերը վերահսկվելու եւ լսվելու են»,- հայտարարել է Լիկա Սաձաիյան:

Նշնենք, որ Վրաստանի խորհրդարանը սկսել է գաղտնի հետախուզական գործողությունների հետ կապված սահմանադրական նախաձեռնության քննարկումը: 18 օրինագծից բաղկացած սահմանադրական փաթեթն ի սկզբանե կքննարկվի պաշտպանության եւ անվտանգության ու մարդու իրավունքների պաշտպանության հանձնաժողովների միավորված նիստին, որից հետո կուսումնասիրի նաեւ իրավաբանական հարցերի հանձնաժողովը:

Խորհրդարանի մարդու իրավունքների պաշտպանության հանձնաժողովի ղեկավար Սոփիո Կիլաձեն գտնում է, որ գաղտնի ձայնագրությունների հետ կապված օրինագիծը մարդու իրավունքների եւ անվտանգության միջեւ բացարձակապես պահպանում է հավասարակշռությունը: Ինչպես ասել է Կիլաձեն լրագրողների հետ զրույցում, եթե խորհրդարանում ընթացիկ քննարկումների ժամանակ որեւէ նոր եւ էական հարց ներկայացվի, մեծամասնությունը կքննարկի այն:

Նորայր Գասպարյան
Թբիլիսի