Տարվա մարզական ամփոփում (մարտ - ապրիլ). Մեդալներ Եվրոպայից

2016 թվականի մարտ-ապրիլ ամիսներին միջազգային եւ հայկական սպորտի տարեգրությունում արձանագրվեցին մարզական բազմատեսակ նշանակալի իրադարձություններ: Այդ ամիսների ընթացքում «մեկնարկեց» ռուսական դոպինգային սկանդալը, որի վերջը մինչ այսօր անգամ չի երեւում, իսկ հայ մարզիկներից 4-ը հռչակվեցին Եվրոպայի չեմպիոններ: Վերհիշենք մարտ-ապրիլ ամիսներին տեղի ունեցած բոլոր կարեւոր իրադարձությունները:   

Միջազգային

Մարտի 6-ին համաշխարհային հակադոպինգային կազմակերպությունը հայտարարեց, որ ռուսաստանցի մի շարք հայտնի մարզիկների, այդ թվում՝ թենիսիստուհի Մարիա Շարապովայի օրգանիզմում հայտնաբերվել է «Միլդրոնատ» արգելված դեղամիջոց: «Դժոխային 48 ժամեր»՝ նման բնորոշում ստացավ ռուսաստանցի մարզիկների հետ կապված սկանդալային բացահայտումը: Շարապովան հրապարակավ ընդունեց իր մեղքը եւ ներողություն խնդրեց, նաեւ՝ ներողամտություն հայցեց:

Լվովում կայացած մրցամարտում հաղթելով աշխարհի գործող չեմպիոն ուկրաինուհի Մարիա Մուզիչուկին 6-3 հաշվով, Հոու Յիֆանը (Չինաստան) 4-րդ անգամ նվաճեց կանանց շախմատի աշխարհի չեմպիոնի կոչումը:

Մարտի 24-ին 68 տարեկան հասակում վախճանվեց հոլանդացի լեգենդար ֆուտբոլիստ Յոհան Կրուիֆը: «Թռչող հոլանդացի» մականունը ստացած Կրուիֆը այն եզակի ֆուտբոլիստներց էր, որ կարողացավ փոխել, նոր երանգներ հաղորդել ֆուտբոլին:

Չինաստանի կառավարությունը հաստատել է մի ծրագիր, համաձայն որի՝ 2050 թվականին Չինաստանի ֆուտբոլի ազգային հավաքականը դառնալու է Աշխարհի չեմպիոն: Ըստ հաստատված ծրագրի, Չինաստանում պետք է տարեցտարի ընդլայնվի երկրում ֆուտբոլ խաղացողների թիվը եւ 2020 թվականին նրանց թիվը պետք է կազմի 50 միլիոն: Ծրագրի կարեւորագույն կետերն են երկրում ֆուտբոլային ենթակառուցվածքների զարգացումը. առաջիկա 6 տարիների ընթացքում Չինաստանում պետք է կառուցվի 70 հազար ֆուտբոլային խաղադաշտեր եւ 20 հազար ակադեմիաներ, 2030 թվականին Չինաստանի յուրաքանչյուր 10 հազար բնակչին պետք է հասնի 1 ֆուտբոլային խաղադաշտ: Աշխարհի ոչ մի երկրում դեռ չի ընդունվել նման լայնամասշտաբ ծրագիր, այն էլ մի մարզաձեւի վերաբերյալ:

Հրապարակվեցին մարզաշխարհում ամենահեղինակավոր՝ «Laureus World Sports Awards» մրցանակաբաշխության 2015 թ. հաղթողների անունները: Սպորտային «Օսկար» համարվող մրցանակաբաշխության արարողությունը կայացավ Բեռլինում: 2015 թվականի լավագույն մարզիկի եւ մարզուհու տիտղոսներին արժանացան թենիսիստներ Նովակ Ջոկովիչը (Սերբիա) եւ Սերենա Ուիլյամսը (ԱՄՆ):

Հայկական

Էստոնիայի մայրաքաղաք Տալինում ավարտվեց տղամարդկանց աշխարհի ոչ պաշտոնական առաջնության՝ «Davis Cup»-ի որակավորման 3-րդ գոտու մրցաշարը, որին մասնակցում էր Հայաստանի հավաքականը: 15 թիմերի պայքարում Հայաստանը զբաղեցրեց 10-րդ տեղը:

Մարտի 11-ին Մոսկվայի գլխավոր փոստատան շենքում մեկնարկեց շախմատի աշխարհի չեմպիոնի կոչման հավակնորդների մրցաշարը, որին մասնակցելու իրավունք էին ստացել 8 ուժեղագույն շախմատիստներ, այդ թվում՝  հայկական շախմատի առաջատար Լեւոն Արոնյանը: Ցավոք, մեր շախմատիստն անհաջող հանդես եկավ՝ կիսեց 4-7 տեղերը: Իսկ աշխարհի չեմպիոն նորվեգացի Մագնուս Կառլսենին ձեռնոց նետելու իրավունք նվաճեց ռուսաստանցի Սերգեյ Կարյակինը: 

Ռիգայում կայացած ըմբշամարտի Եվրոպայի առաջնությունում հայաստանցի մարզիկները նվաճեցին 1-ական ոսկե, բրոնզե եւ 2 արծաթե մեդալներ՝ բոլորը հունահռոմեական ոճում: Եվրոպայի չեմպիոնի կոչումը նվաճեց Վարշամ Բորանյանը (71 կգ), արծաթե մեդալների արժանացան Արթուր Ալեքսանյանը (98 կգ), Ռոման Ամոյանը (58 կգ), բրոնզե մեդալ նվաճեց Կարապետ Չալյանը (75 կգ):

Մարտի 25-ին տարվա ընթացքում առաջին հանդիպումն անցկացրեց ֆուտբոլի Հայաստանի ազգային հավաքականը. մեր ընտրանին Վարուժան Սուքիասյանի գլխավորությամբ Երեւանում ոչ ոքի՝ 0-0 խաղաց Բելառուսի հետ: Այս հանդիպումը մեր թիմի դարպասապահ եւ ավագ Ռոման Բերեզովսկու հրաժեշտի խաղն էր նաեւ:

Ապրիլի 9-ին Լաս Վեգասում կայացած մենամարտում պրոֆեսիոնալ բռնցքամարտի WBO վարկածով աշխարհի չեմպիոն Արթուր Աբրահամը միավորներով պարտվեց մեքսիկացի Ժիլբերտո Ռամիրեսին եւ զրկվեց տիտղոսից: Կողային բոլոր 3 մրցավարներն էլ արձանագրել էին Ռամիրեսի մեծ առավելությունը եւ հաղթանակը շնորհել մեքսիկացուն:

Նորվեգիայի Ֆյորդե քաղաքում կայացած ծանրամարտի Եվրոպայի առաջնությունում հայաստանցի ծանրորդները նվաճեցին բոլորից շատ մեդալներ եւ թիմային ոչ պաշտոնական հաշվարկում զբաղեցրին 1-ին տեղը: 3 ծանրորդ՝ Անդրանիկ Կարապետյանը (77 կգ), Նազիկ Ավդալյանը (75 կգ) եւ Հռիփսիմե Խուրշուդյանը (գերծանր քաշ) երկամարտի արդյունքում նվաճեցին Եվրոպայի չեմպիոնի կոչումը, Տիգրան Մարտիրոսյանը (77 կգ) եւ Գոռ Մինասյանը (գերծանր քաշ) արժանացան արծաթե, Սիմոն Մարտիրոսյանն էլ (105 կգ)՝ բրոնզե մեդալներ: Ընդհանուր առմամբ հայ ծանրորդները Եվրոպայի առաջնությունում նվաճեցին (հաշվի առնելով նաեւ առանձին վարժություններում նվաճած մեդալները) 8 ոսկե, 7 արծաթե եւ 3 բրոնզե մեդալներ, ինչը լավագույն ցուցանիշն էր ավարտված մրցաշարում:

Ռուսաստանի Կազան քաղաքում կայացած ձյուդոյի Եվրոպայի առաջնությունում հայաստանցի Հովհաննես Դավթյանը (60 կգ) բրոնզե մեդալ նվաճեց:

Ֆուտզալի Հայաստանի առաջնության ավարտից 1 տուր առաջ Հայաստանի պետական տնտեսագիտական համալսարանի (ՀՊՏՀ) թիմը՝ գլխավոր մարզիչ Կարեն Միքայելյանի գլխավորությամբ, անհասանելի դարձավ մրցակիցների համար եւ 2-րդ տարին անընդմեջ նվաճեց չեմպիոնի կոչումը:

Ներվեգիայի Ստավանգեր քաղաքում կայացած «Norway Chess» շախմատային գերմրցաշարում  Լեւոն Արոնյանը զբաղեցրեց 2-րդ տեղը՝ ետ մնալով միայն աշխարհի գործող չեմպիոն Մագնուս Կառլսենից: