Հայկական ֆուտբոլի «հարվածային» ժամանակաշրջանը մեկնարկել է

Յուրաքանչյուր տարի՝ հոկտեմբեր կամ նոյեմբեր ամիսների սկզբին, տեղի են ունենում մի շարք կարեւորագույն ֆուտբոլային մրցաշարեր, հանդիպումներ, որոնք կարծես թե, կանխանշում, ուրվագծում են, մասնավորապես, հայկական ֆուտբոլի գալիք ամբողջ տարին: Անցյալ տարի նման իրադարձություններ տեղի ունեցան հոկտեմբերի առաջին 10 օրերի ընթացքում: Հիշեցնեմ, որ այդ ժամանակահատվածում Հայաստանի ազգային, երիտասարդական, 19 եւ 17 տարեկանների հավաքականները Եվրոպայի առաջնությունների որակավորման փուլում, ընդհանուր առմամբ, 10 հանդիպում անցկացրին. 8 պարտություն՝ գնդակների 0-31 տարբերությամբ եւ 2 ոչ- ոքի՝ եվրոպական մակարդակով գաճաճ երկրների՝ Սան Մարինոյի ու Լյուքսեմբուրգի թիմերի հետ:

Այսպիսին էր մղձավանջային այդ օրերի ընդհանուր պատկերը, իսկ հետագայում մեր ֆուտբոլը ցնցվեց մի քանի սկանդալային իրադարձությունների պատճառով՝ հավաքականի մի քանի ֆուտբոլիստներ մեղադրվեցին Ալբանիայի հետ խաղում «դավաճանական» պահվածքի համար, տեղի ունեցան ցույցեր՝ ՀՖՖ նախագահի հրաժարականի պահանջով, կաշառք ստանալու, կազմակերպված խաղեր անցկացնելու համար կալանավորվեցին «Ուլիսի» ղեկավարները, թիմն էլ ֆինանսական խնդիրների պատճառով դուրս եկավ բարձրագույն խմբի առաջնությունից, ամռանը լուծարվեց մեր ֆուտբոլի տիտղոսակիր թիմերից «Միկան» եւ այլն: Ինչպես ավարտեցինք աշնանային այդ «հարվածային» ժամանակաշրջանը. այնպես էլ շարունակվեց հետագա ամբողջ տարին:

2016 թվականին մեր ֆուտբոլի համար նման «հարվածային» ժամանակաշրջան է նոյեմբերի առաջին 2 շաբաթը. Եվրոպայի առաջնության որակավորման փուլերում իրենց հանդիպումներն են անցկացնում ազգային, 19 եւ 17 տարեկանների հավաքականները: 17-երը պատվով կատարեցին իրենց խնդիրը. Արթուր Ոսկանյանի գլխավորությամբ հանդես եկող մեր 17 տարեկանների հավաքականը հաղթահարեց նախնական փուլի արգելքը եւ նվաճեց էլիտ փուլի ուղեգիր: Նոյեմբերի 10-ին էլ պայքարը սկսում է մեր 19 տարեկանների հավաքականը: Ընդ որում, Եվրոպայի առաջնության ընտրական նախնական փուլի մրցաշարը կայանալու է Երեւանում: Մեր թիմի հետ նույն խմբում ընդգրկված են այս տարիքային խմբում Եվրոպայի փոխչեմպիոն Իտալիան, մշտապես պատանեկան ուժեղ հավաքականներ ունեցող Շվեյցարիան եւ Հունգարիան:

Անգամ նման մրցակիցների պարագայում Հայաստանի հավաքականից հաջողություն է ակնկալվում: Արամ Ոսկանյանի գլխավորությամբ հանդես եկող մեր 19-երի հավաքականը տարվա ընթացքում մեծ թվով հավաքներ, ընկերական խաղեր է անցկացրել, հայկական ակումբներում հանդես եկող ֆուտբոլիստների հետ մեկտեղ թիմում ընդգրկված են Հունաստանում, Գերմանիայում, Ավստրիայում, Ռուսաստանում հանդես եկող ֆուտբոլիստներ: Վաղը մեր թիմը մրցելու է Շվեյցարիայի, նոյեմբերի 12-ին՝ Իտալիայի (2 խաղերն էլ կայանալու են «Բանանց» ստադիոնում, սկիզբը՝ 15:00-ին), իսկ 3-րդ խաղը անցկացնելու է Ավանի ակադեմիայում Հունգարիայի դեմ (սկիզբը՝ 15:00-ին): Մրցակարգի համաձայն, հաջորդ՝ էլիտ փուլ են դուրս գալիս խմբում 1-2 տեղեր գրաված թիմերը:

19 տարեկանների հավաքականի հանդիպումների ազատ օրը՝ նոյեմբերի 11-ին, կայանալու է այս «հարվածային» ժամանակաշրջանի կարեւորագույն հանդիպումը. Հայաստանի ազգային հավաքականը Աշխարհի 2018 թվականի առաջնության ընտրական փուլի շրջանակներում հյուրընկալելու է մեր խմբի առաջատար Չեռնոգորիային: Ընտրական մրցաշարերում վերջին անգամ մեր ընտրանին հաղթել է 2013 թվականի հոկտեմբերի 11-ին՝ Երեւանում Բուլղարիային (2-1): Այդ խաղից հետո 3 մարզիչների՝ Բեռնար Շալանդի, Սարգիս Հովսեփյանի, Վարուժան Սուքիասյանի գլխավորությամբ Հայաստանի ազգային հավաքականը Եվրոպայի եւ Աշխարհի առաջնությունների ընտրական մրցաշարերում անցկացրել է 12 խաղ. 3 ոչ- ոքի եւ 9 պարտություն, խփած եւ բաց թողած գնդակների 8-24 տարբերությամբ՝ այսպիսին են ցուցանիշները: Եթե ավելացնենք, որ մեր ընտրանին Երեւանում կայացած խաղերում գոլ չի կարողացել խփել 2015 թվականի հունիսի 13-ից սկսած (Հայաստան - Պորտուգալիա՝ 2-3), ապա այս մռայլ պատկերը կամբողջանա:

Հայաստանի ազգային հավաքականի նոր գլխավոր մարզիչ Արթուր Պետրոսյանը բոլոր առումներով ծանր ժառանգություն է ստացել: Բայց մեկ լավ խաղը, հաղթանակը, մեր 19 տարեկանների հավաքականի հաջող ելույթները կարող են փոխել մթնոլորտը մեր ֆուտբոլում, դառնալ ապագա զարգացման եւ հաջողությունների գրավական: