Հայկական ֆուտբոլ. Լույս՝ ավետյաց երկրից

Հայաստանի ֆուտբոլային տարբեր տարիքային հավաքականների վերջին տարիների համատարած անհաջողությունների ֆոնին վերջապես ուրախալի լուր, անգամ՝ պատմական իրադարձություն է արձանագրվել: Ֆուտբոլի Հայաստանի մինչեւ 17 տարեկանների հավաքականը Եվրոպայի առաջնությունում հաղթահարել է նախնական փուլի արգելքը եւ նվաճել էլիտ փուլի ուղեգիր: Հատկանշական է, որ այս իրադարձությունը տեղի է ունեցել Ավետյաց երկրում՝ Իսրայելում: Մինչ այժմ ընդամենը 1 անգամ՝ 2004 թվականի առաջնության ընտրական մրցաշարում էր մեր 17 -երի հավաքականին հաջողվել հաղթահարել ընտրական նախնական փուլի արգելքը:

Իսրայելում կայացած խմբային փուլի մրցաշարում մեր թիմը նախ ոչ ոքի՝ 1-1 է խաղացել Լեհաստանի հետ, ապա պարտվել տանտերերի հավաքականին 0-2 հաշվով: Վերջին՝ Իսլանդիայի հետ խաղից առաջ բավական ուշագրավ իրավիճակ էր ստեղծվել: Կանոնակարգի համաձայն, հաջորդ՝ էլիտ փուլի ուղեգրեր էին նվաճում 13 խմբերում 1-2 տեղեր զբաղեցրած, ինչպես նաեւ 3-րդ տեղեր գրաված 5 լավագույն թիմերը: Հավասար միավորների դեպքում հաշվի էին առնվում եւ ըստ հերթականության առավելություն էին ստանում այն թիմերը, որոնք ունեին.

1. խփած եւ բաց թողած գոլերի լավ տարբերություն
2. ավելի շատ խփած գոլեր
3. ավելի քիչ դեղին, կարմիր քարտեր
4. ավելի բարձր վարկանիշ

Ընդ որում, 3-րդ տեղեր գրաված թիմերի պայքարում չէր հաշվարկվում վերջին տեղը զբաղեցրած թիմի հետ արդյունքը: Հենց այս կանոնի շնորհիվ մեր թիմը հրաշալի հնարավորություն ստացավ ձեռք բերել հաջորդ փուլի ուղեգիր՝ Իսլանդիայի հետ խաղում Հայաստանի հավաքականին կարող էր բավարարել անգամ ոչ-ոքի արդյունքը: Կար անգամ տարբերակ, որ Հայաստանը զբաղեցներ խմբում 2-րդ տեղը եւ ուղղակի՝ առանց լրացուցիչ հաշվարկների, անցներ հաջորդ փուլ. անհրաժեշտ էր, որ Լեհաստանը պարտվեր Իսրայելին 2 ու ավելի գնդակների տարբերությամբ, մեր թիմն էլ պետք է չպարտվեր Իսլանդիային: Հայաստանը «գերակատարեց» իր առաջադրանքը՝ հաղթեց 3-2 հաշվով, իսկ Լեհաստանը իր «պատվերը» կատարեց մասնակի՝ պարտվեց Իսրայելին 1-3 հաշվով:

Հայաստանը եւ Լեհաստանը վաստակեցին 4-ական միավոր, իրար մեջ հանդիպումն ավարտել էին ոչ-ոքի՝ 1-1 հաշվով, 2 թիմն էլ ունեին գնդակների նույն տարբերությունը՝ -2, սակայն խփած մեկ ավելի գոլի շնորհիվ Լեհաստանը զբաղեցրեց 2-րդ տեղը եւ ստացավ էլիտ փուլի ուղեգիր: Հայաստանն էլ խմբում զբաղեցրեց 3-րդ տեղը եւ սկսվեց լրացուցիչ ցուցանիշների հաշվարկը: 3-րդ տեղեր զբաղեցրած 13 թիմերից 6-ը՝ այդ թվում Հայաստանը, իրենց խմբերում 1-2 տեղերում հայտնված թիմերի հետ խաղերում վաստակել էին 1-ական միավոր: 4 թիմեր գնդակների առավել լավ տարբերության շնորհիվ անցան հաջորդ փուլ, իսկ վերջին ուղեգիրը պետք է բաժին հասներ գոլերի հաշվարկով բացարձակապես նույն ցուցանիշներն ունեցող Հայաստանին կամ Մակեդոնիային: Հաջորդ ցուցանիշը, ըստ կանոնակարգի, համարվում է կարգապահությունը՝ դեղին կամ կարմիր քարտերի քանակը:

Մեր թիմի ֆուտբոլիստները անցկացրած 3 խաղերում ստացել էին 2 դեղին քարտեր, իսկ Մակեդոնիան՝ 3, ընդ որում 3-րդը՝ վերջին խաղի վերջին րոպեներին: Հենց այդ քարտի շնորհիվ Հայաստանը առաջ անցավ Մակեդոնիայից եւ նվաճեց էլիտ փուլի վերջին ուղեգիրը: Ավելացնենք, որ Հայաստանի մինչեւ 17 տարեկանների հավաքականի գլխավոր մարզիչը «Բանանցը» գլխավորող Արթուր Ոսկանյանն է, որը օրեր առաջ նշանակվել է նաեւ մեր երիտասարդական հավաքականի գլխավոր մարզիչ, թիմի կազմում ընդգրկված 18 ֆուտբոլիստներից 10-ը ներկայացնում են «Բանանցը», 5-ը՝ «Փյունիկը», 2-ը՝ Ավանի ակադեմիան եւ 1 ֆուտբոլիստ էլ հանդես է գալիս գերմանական «Քյոլնում»:

Ընտրական փուլի արդյունքով 32 թիմեր, այդ թվում՝ Հայաստանը, իրավունք են ստացել հանդես գալու Եվրոպայի առաջնության էլիտ փուլում: Ետխորհրդային երկրներից Հայաստանի հետ միասին էլիտ փուլի ուղեգրեր են ձեռք բերել Ռուսաստանը, Ուկրաինան եւ Բելառուսը: Մրցակարգի համաձայն 32 թիմերը բաժանվելու են 8 խմբի: Հաղթողները եւ 2-րդ տեղեր գրաված լավագույն ցուցանիշն ունեցող 7 թիմերը կնվաճեն Եվրոպայի առաջնության եզրափակիչ մրցաշարի ուղեգրեր: Խորվաթիան, որպես Եվրոպայի առաջնության կազմակերպիչ երկիր, այդ իրավունքը նվաճել է առանց ընտրական խաղերի: Էլիտ փուլի վիճակահանությունը կայանալու է դեկտեմբերի 13-ին, իսկ խաղերը՝ հաջորդ տարի գարնանը: