Ո՞րն է Կարեն Կարապետյանի և Իշխան Զաքարյանի տարբերությունը

 ԱԺ սոցիալական հարցերի մշտական հանձնաժողովի նախագահ, ՀՀԿ խմբակցության պատգամավոր Հակոբ Հակոբյանը երեկ մեզ հետ զրույցում հայտարարեց, թե նորանշանակ վարչապետ Կարեն Կարապետյանին պետք է շնորհակալություն հայտնել՝ իրականությունը ճիշտ ներկայացնելու համար:

- Պարոն Հակոբյան, ՀՀԿ-ի մոտ մեկուկես տասնամյա իշխանության ընթացքում առաջին անգամ է, որ ՀՀ վարչապետը հայտարարում է, թե մեր տնտեսությունը չափազանց ծանր վիճակում է, թեեւ առաջին տարին չէ, որ նման վիճակ է: Այդպիսով՝ Կարեն Կարապետյանը, փաստորեն, մարտահրավեր է նետել ձեր ողջ իշխանությանը՝ նախկինում տված այն գնահատականների համար, թե մեր երկիրը զարգանում է, եւ կա այսքան առաջընթաց:

- Ես կարծում եմ, որ հարկավոր է գնահատել ԱԺ ամբիոնից վարչապետի արած այդ հայտարարությունը: Նա ասաց, թե ես ձեզ հետ կաշխատեմ ազնիվ եւ կլինեմ պարզ: Եվ նա ազնվորեն ներկայացրեց գոյություն ունեցող վիճակը: Ճիշտ խոսելու համար վարչապետին, պարզապես, պետք է շնորհակալություն հայտնել:

- Բոլոր նախկին վարչապետներն այդ պաշտոնին նշանակվելուց անմիջապես հետո տնտեսության զարգացման համար շատ անհրաժեշտ հավասար խաղի կանոններ ստեղծելու, ստվերը կրճատելու մասին հայտարարություններ են արել: Նույնը նաեւ՝ նոր վարչապետը: Իսկ նման փոփոխություններ կատարելու համար իշխանությունն ունի՞ քաղաքական կամք:

- Վարչապետը հայտարարեց, որ առանց դրա հնարավոր չէ տնտեսություն զարգացնել: Հետեւաբար, պետք է սպասել գործողությունների ընթացքին:

- Ձեր գնահատմամբ՝ ՀՀ-ում գործարար միջավայրում խաղի կանոնները շա՞տ են անհավասար, ստվերը շա՞տ է:

- Ստվերը չի մասնակցում տնտեսության զարգացմանը, քանի որ հարկման դաշտ չի գալիս, բայց ցանկացած բիզնես մարդու համար է: Բայց պետության մեջ ապրելու կանոններ կան՝ ՀՀ-ն հայտարարել է, որ մեր երկրում աշխատող ցանկացած քաղաքացի՝ իրավաբանական կամ ֆիզիկական անձ, պարտավոր է վճարել ԱԱՀ, եկամտահարկ, շահութահարկ եւ այլն: Եթե կա մի պետություն, որտեղ չեն վճարում, բիզնեսմեններն այնտեղ կձգտեն, ինչպես ձգտում են օֆշորային գոտիներում:

- Կարեն Կարապետյանը կառավարության նիստի ժամանակ նախարարներին կոչ արեց վերջ տալ «պրիմիտիվ գողությանը»: Ճիշտ է, այդ հայտարարությունը վերաբերում էր ավիատոմսերի գնմանը, բայց պետական գնումների ոլորտում չարաշահումները համատարած են: Հիշեցնենք, որ 2013 թվականի հաշվետվությունը ներկայացնելիս Վերահսկիչ պալատի նախագահ Իշխան Զաքարյանը հայտարարեց, թե բյուջեի 70 տոկոսը կոռուպցիոն վտանգի տակ է: Իշխանությունը նրան այդ հայտարարության համար սուր քննադատության ենթարկեց, մինչդեռ Կարապետյանին արդարացնում է:

- Ես դրանք չէի համեմատի, քանի որ վարչապետը միայն մանր գողությունների մասին էր խոսում: Իշխան Զաքարյանը խոսում էր երեւույթի մասին: Իսկ ես հետեւյալ թվերը կասեմ՝ մեր բյուջեում աշխատավարձը կազմում է 40 տոկոսը, այսինքն այդ 70 տոկոսը արդեն չեղավ: Իհարկե, կոռուպցիա կա, բայց ես ավելի կարեւոր հարց եմ դնում՝ ինչպե՞ս անենք, որ մեր պետության մեջ ոչ թե ծախսենք, հետո գնահատենք՝ արդյունավետ էր, թե՝ ոչ, այլ մինչ ծախսերը գնահատենք դրա արդյունավետությունը: Բոլոր խելոք մարդիկ, ովքեր գործարար են, տնտեսության կամ պետության ղեկավար, սկզբում փող են ծախսում, որ իմանան՝ ծախսը արդյունավետ է, թե՝ ոչ:

- Պարոն Հակոբյան, Կարեն Կարապետյանը որոշեց փոխել մի քանի նախարարությունների անուններ: Դա՞ էր խանգարում, որ ՀՀ-ում տնտեսությունը չէր զարգանում: Իսկ եթե մեր երկրի անունը փոխենք եւ Շվեյցարիա կամ Սինգապուր դնենք, մեր տնտեսությունը շատ արագ կնմանվի՞ այդ երկրների տնտեսությանը:

- Ոչ, պետք է համբերել: Կա կառավարություն, որը ցանկանում է ունենալ հետեւյալ սահմանված նախարարները եւ վերջ:

 - Ինչքա՞ն ժամանակ է պետք տնտեսության մեջ այս փոփոխությունների դրական արդյունքը զգալու համար:

- Դուք շատ խիստ եք հարցը դնում: Եթե մենք ուզում ենք փոխել մեր կենսաթոշակային ուղղվածությունը, երկար ժամանակ է պետք, եթե ուզում ենք կենսաթոշակներն ավելացնել, շատ երկար ժամանակ պետք չէ: Եթե ուզում ես պայքարել ստվերի դեմ, ժամանակ մի սահմանիր, քանի որ դա անընդհատ պայքար է: Բայց եթե դուք ուզում եք հասկանալ, թե նոր վարչապետի ու կառավարության գործունեությանը ժողովուրդն ինչ գնահատական կտա, ես կասեմ՝ սպասեք կառավարության ծրագիրը գա ԱԺ, հետո կխոսենք:

- Կարելի՞ է ասել, որ ապրիլյան պատերազմից ու «Սասնա ծռերի» դեպքերից հետո իշխանությունը վարչապետի ու կառավարության այս փոփոխությունն արեց, որ հասարակության մեջ առկա սթրեսային իրավիճակը թուլացնի կամ, ինչպես ասում են, գոլորշի բաց թողնի:

- Հասարակության մեջ կատարվող ցանկացած փոփոխություն, անկախ այն հանգամանքից, թե իշխանության արձագանքն ինչպիսին կլինի, իշխանությանը վերաբերող խնդիր է: Եվ պետության, իշխանության խնդիրը հասարակության մեջ կատարվող փոփոխություններին արձագանք տալն է: Եթե հարցնում եք, թե այդ իրադարձություններն ազդե՞լ են, կասեմ՝այո, ազդել են: Եթե հարցնում եք, թե այս փոփոխությունները ձեւակա՞ն են, կասեմ՝ ոչ, դա անհրաժեշտություն է: Եթե վարչապետը հայտարարում է, որ տնտեսությունը ծանր վիճակում է, ես չեմ կարող ասել, թե նա ձեւ է թափում, մեր տնտեսությունը լավ վիճակում է: