Ամառային 31-րդ Օլիմպիական խաղեր. Սա սառը պատերազմ է

Ընդամենը 4 օր է մնում Ռիո դե Ժանեյրոյի ամառային Օլիմպիական 31-րդ խաղերի մեկնարկից, բայց կրքերն այս խաղերում Ռուսաստանի մասնակցության շուրջ չեն մարում: Հիշեցնեմ, որ չնայած այն հանգամանքին, որ Ռուսաստանում պետական մակարդակով տարիներ շարունակ իրականացվել է սպորտային, Օլիմպիական արժեքներին հակասող դոպինգային ծրագիր եւ սրա հետեւանքով  աշխարհի շատ երկրներ դեմ էին Օլիմպիական խաղերին Ռուսաստանի մասնակցությանը, Միջազգային օլիմպիական կոմիտեն (ՄՕԿ) չգնաց ծայրահեղ քայլի՝ չորակազրկեց Ռուսաստանին: ՄՕԿ-ի նախագահ Թոմաս Բախը հայտարարեց, որ Օլիմպիական խաղերին ռուսաստանցի մարզիկների մասնակցության հարցը որոշելու են մարզաձեւերի միջազգային ֆեդերացիաները: Օլիմպիական խաղերի մեկնարկից 5 օր առաջ տարբեր մարզաձեւերի միջազգային ֆեդերացիաների որոշմամբ ռուսաստանցի 260 մարզիկի թույլատրվել է մասնակցել Օլիմպիական խաղերին, իսկ 127-ը որակազրկվել են:

Ռիո չեն մեկնելու ռուսաստանցի, գրեթե, բոլոր տիտղոսակիր մարզիկները, որոնց թվում են նախկինում օլիմպիական խաղերի 15 չեմպիոն, 34 մրցանակակիր, աշխարհի 13 չեմպիոն, 17 մրցանակակիր, ովքեր զրկվել են նաեւ իրենց նախկին տիտղոսներից: Բայց անգամ նման իրավիճակը չի գնահատվում որպես բավարար եւ նախօրեին աշխարհի առաջատար 13 հակադոպինգային ծառայություն հատուկ հայտարարություն են տարածել՝ ՄՕԿ-ից պահանջելով որակազրկել Ռուսաստանին ընդհանրապես, թույլ չտալ Օլիմպիական ավանում ռուսական դրոշի ծածանումը: «Մենք աշխատում ենք սպորտում ընդունված արժեքների տարածման համար: Սպորտը պետք է լինի ազնիվ մարդկանց պայքար, իսկ այլ ճանապարհներով հաղթանակի համար պայքարողների առջեւ այն պետք է փակ լինի: ՄՕԿ-ն այս պայքարում պետք է լինի առաջնորդող, իսկ պատասխանատվությունը ֆեդերացիաների վրա գցելով՝ ՄՕԿ-ը ցույց է տալիս իր քաղաքական եւ կոմերցիոն կախվածությունը Ռուսաստանից»,- մասնավորապես, նշված է այդ հայտարարությունում:

Սպորտի հետ առնչություն ունեցող գրեթե բոլոր կազմակերպությունները ՄՕԿ-ի որոշումը համարում են սխալ եւ պահանջում են կրկին անդրադառնալ Ռուսաստանի հարցին, թեեւ Օլիմպիական խաղերի մեկնարկից մնացել է ընդամենը 4 օր, տարբեր մարզաձեւերի համար կայացել են արդեն բազմաթիվ վիճակահանություններ: ՄՕԿ-ի նախագահ Թոմաս Բախը, որը համարվում է Ռուսաստանին շահերի գլխավոր պաշտպանը, կիրակի օրը ստիպված է եղել նոր որոշում կայացնել, հրավիրված մամուլի ասուլիսի ընթացքում էլ պատասխանել լրագրողների սուր հարցերին, որոնք վերաբերվել են, բացառապես, ռուսական դոպինգ սկանդալին: Նախ՝ Բախը հայտարարել է, որ օլիմպիական խաղերին մասնակցելու համար ռուսաստանցի մարզիկները պետք է 3 տարբեր «ֆիլտրերով» անցնեն. 1-ինը՝ մարզական ֆեդերացիաների որոշումն է, 2-րդը՝ երբեւէ հակադոպինգային կանոնադրությունը խախտած մարզիկները չեն մասնակցի խաղերին, եւ 3-րդը՝ ՄՕԿ-ի հատուկ հանձնախմբի որոշումն է: Հատկապես, Բախի հնչեցրած «ֆիլտրերի» 3-րդ կետը անակնկալ էր, քանի որ այն 1-ին անգամ է հնչեցվում:

Ինչեւէ. արդեն հայտնի է ՄՕԿ-ի հատուկ հանձնախմբի կազմը, որը մինչեւ օգոստոսի 5-ը կայացնելու են վերջնական որոշում Օլիմպիական խաղերին Ռուսաստանի մասնակցության վերաբերյալ: Հանձնախմբի կազմում են 3 անձ. նախագահ՝ ՄՕԿ-ի բժշկական հանձնաժողովի ղեկավար Ուգուր Էրդեներ (Թուրքիա), անդամներ՝ ՄՕԿ-ի մարզիկների հանձնաժողովի նախագահ Կլաուդիա Բոկել (Գերմանիա) եւ Խուան Անտոնիո Սամարանչ-կրտսեր (Իսպանիա)՝ ՄՕԿ-ի նախկին նախագահի որդին: Թոմաս Բախը կայացած մամուլի ասուլիսի ընթացքում տեղեկացրել է, որ օգոստոսի 21-ին ՄՕԿ-ը վերջնական որոշում կկայացնի այն մարզիկների մասին, որոնք խթանիչներ են ընդունել 2008 եւ 2012 թվականներին կայացած Օլիմպիական խաղերի ժամանակ:

Հիշեցնենք, որ այդ մարզիկների թվում են նաեւ հայաստանցի ծանրորդներ Տիգրան Մարտիրոսյանը եւ Հռիփսիմե Խուրշուդյանը: Հարց ու պատասխանի ժամանակ Բախը մեծ հաշվով խուսափել է լրագրողների հարցերին ուղիղ պատասխանել, բայց մի քանի ուշագրավ պատասխաններ ամեն դեպքում հնչել է: «Ընդունո՞ւմ եք, որ Ռուսաստանին թույլատրելով մասնակցել Օլիմպիական խաղերին, ՄՕԿ-ը խայտառակ, ամոթալի որոշում է ընդունել» հարցին Բախը պատասխանել է. «Ոչ, պատասխանատվությունը մերը չէ: Թող մարզական ֆեդերացիաները պատասխան տան»: Ասուլիսն ավարտվել է հետեւյալ հարց-պատասխանով՝ «Համաձա՞յն եք, որ այն, ինչ հիմա կատարվում է աշխարհում՝ սառը պատերազմի նոր դրսեւորում է, որը ներխուժել է մարզաշխարհ»: «Հիմա վերլուծությունների ժամանակ չէ: Վերլուծությունները պետք է կատարվեն ստեղծված իրավիճակի հանգուցալուծումից հետո»: Ինչ-որ շատ ծանոթ միտք է, որը վերջին օրերին թեւածում էր Հայաստանում: