Ֆուտբոլ. Եվրոպայի առաջնություն. Գնացեք ձեր գործերին

2015 թվականի հունիսի 12-ին Ուելսի մայրաքաղաք Կարդիֆում ֆուտբոլի Եվրոպայի 2016 թվականի առաջնության ընտրական մրցաշարի շրջանակներում հանդիպեցին խմբի առաջատարներ Ուելսը եւ համաշխարհային վարկանիշային աղյուսակում 2-րդ տեղը զբաղեցնող Բելգիան: 1 տարի առաջ կայացած այդ խաղում տանտերերի հարձակվող Գարեթ Բեյլի խփած միակ գոլը հաղթանակ ապահովեց Ուելսի ընտրանուն, որը դարձավ խմբի միանձնյա առաջատար, հետագայում էլ նվաճեց Եվրոպայի եզրափակիչ առաջնությունում հանդես գալու իրավունք: Պատմության մեջ առաջին անգամ Ուելսը նվաճեց «Եվրոյի» ուղեգիր ու հիմա կարելի է փաստել, որ Ուելսը ոչ միայն առաջին անգամ է հանդես գալիս «Եվրոյում», այլ նաեւ 1-ին գոլն ու հաղթանակն է տոնել, 1-ին անգամ անցել է փլեյ-օֆ եւ վերջապես առաջին անգամ հայտնվել է Եվրոպայի լավագույն 8 թիմերի շարքում՝ ինչպես Իսլանդիան:

Եվ ահա Ուելսը, «Եվրո 2016»-ի քառորդ եզրափակիչում կրկին հանդիպելու է Բելգիայի ընտրանու հետ: Այսօր Լիլի 50 հազարանոց «Պիեռ Մորուա» ստադիոնում, Երեւանի ժամանակով 23:00-ին Հայաստանից քիչ ավելի բնակչություն ունեցող Ուելսը (մոտ 3 միլիոն) «Եվրո 2016»-ի քառորդ եզրափակիչում մրցելու է Հայաստանի չափ տարածք ունեցող (30 հազար քառակուսի կմ) ու կրկին համաշխարհային վարկանիշային աղյուսակում 2-րդ տեղը զբաղեցնող  Բելգիայի հետ: Իր կազմում համաշխարհային մակարդակի մի քանի ֆուտբոլիստներ ունեցող Բելգիան այս խաղում ակնհայտ ֆավորիտ է: Բայց Ուելսի հավաքականի գլխավոր մարզիչ Քրիս Կոուլմենի կատարած հայտարարություններից մեկը դարձել էր տեղի մամուլի առաջին էջերի գլխավոր միտքը՝ «Մենք չենք վախենում Բելգիայից»:

«1 տարի առաջ բելգիացիներին խփած գոլս հաստատապես ամենակարեւորն էր հավաքականի կազմում: Այն մեզ հույս ու վստահություն տվեց, որ կարող ենք դուրս գալ «Եվրո 2016»: Հիմա մենք քառորդ եզրափակիչում ենք ու ամեն ինչ կանենք կիսաեզրափակիչ դուրս գալու համար: Շատ լավ հասկանում ենք Բելգիայի ու նրա ֆուտբոլիստների ուժը: Հաճույքով դուրս կգանք մրցելու նրանց հետ»,- նախախաղային մամուլի ասուլիսի ժամանակ էլ հայտարարել է Ուելսի հարձակման առաջատար, «Եվրո 2016»-ի լավագույն ռմբարկուներից Գարեթ Բեյլը: Բելգիական մամուլը մրցակցի կազմում առանձնացնում է Բեյլին՝ միեւնույն ժամանակ նշելով, որ Բելգիայի պաշտպանությունը՝ դարպասապահ Տիբու Կուրտուայի գլխավորությամբ, կարող է չեզոքացնել Ուելսի առաջատարին: «1-ին տուրում Իտալիայից կրած պարտությունից հետո մեր թիմը գոլ բաց չի թողել, եւ սա լրացուցիչ վստահություն է հաղորդել ֆուտբոլիստներին:

Պետք չէ վախենալ Բեյլի պտտեցրած հարվածներից, չէ՞ որ մեր դարպասում կանգնած է Կուրտուան»,- գրել է բելգիական «Het Laatste Nieuws» պարբերականը: Բելգիական մամուլը նաեւ կատակով նշել է, որ քառորդ եզրափակիչում Ուելսի հայտնվելը արդեն խառնել է թիմի պաշտպան Նիլ Թեյլորի ծրագրերը (վերջինս կնոջ հետ պատրաստվում էր հունիսի 30-ին Կարդիֆում ներկա լինել հանրահայտ երգչուհի Բեյոնսեի համերգին), իսկ կիսաեզրափակիչ դուրս գալը կարող է արդեն խառնել մյուս պաշտպանի՝ Քրիս Գանտերի ծրագրերը, քանի որ այդ դեպքում վերջինս չի կարողանա ներկա գտնվել եղբոր հարսանիքին: «Պարտվեք ու հանգիստ գնացեք ձեր գործերին»,- Ուելսի հավաքականի ֆուտբոլիստներին կոչ են արել բելգիացի լրագրողները:

Ուելս - Բելգիա հանդիպումը կրկնակի կարեւորություն ունի Բելգիայի ընտրանու առաջատար եւ ավագ Էդեն Ազարի համար: Այս ֆուտբոլիստը մինչ անգլիական «Չելսի» տեղափոխվելը երկար ժամանակ հանդես էր գալիս հենց «Լիլում», այս թիմում է ստացել իր ֆուտբոլային կրթությունը եւ հիմա վերադառնում է գրեթե տուն: «Իրոք այս խաղը հատուկ է Ազարի համար: Նա այստեղ է եկել 14 տարեկանում, «Լիլում» է ձեւավորվել որպես պրոֆեսիոնալ ֆուտբոլիստ: Այս քաղաքում նա դեռ շատ ընկերներ ունի: Բացի այդ Լիլը Բելգիայի սահմանից ընդամենը 15 կմ է հեռու», - ասել է Բելգիայի հավաքականի գլխավոր մարզիչ Մարկ Վիլմոտսը: Ընդ որում, տեղեկություններ կային, որ վնասվածքի պատճառով Ազարը հնարավոր է բաց թողնի Ուելսի հետ հանդիպումը: Գլխավոր մարզիչը հաստատել է, որ Ազարը պատրաստ է խաղին: «Ազարը մկանային խնդիրներ ուներ Հունգարիայի հետ խաղից հետո: Բայց հիմա ամեն ինչ նորմալ է եւ նա ամբողջապես պատրաստ է», - հայտարարել է Վիլմոտսը:

Ավելացնեմ, որ մինչ այժմ Բելգիան ու Ուելսը հանդիպել են բացառապես պաշտոնական խաղերում՝ Աշխարհի կամ Եվրոպայի ընտրական մրցաշարերի շրջանակներում: Փոքր առավելություն ունի Բելգիան. 10 խաղում 4 հաղթանակ, 3-ական ոչ-ոքի եւ պարտություն: