Եվրոպական ֆուտբոլ. Մենք ենք, մեր սարերը

Երեկ կայացել են ֆուտբոլի Չեմպիոնների եւ Եվրոպա լիգաների առաջիկա՝ 2016-17թթ. խաղարկության որակավորման 1-ին եւ 2-րդ փուլերի վիճակահանությունները. հայտնի դարձան հայկական 4 թիմերի մրցակիցները:Ուղիղ մեկ շաբաթից՝ հունիսի 28-ին, հայկական առաջին թիմը կսկսի պայքարը եվրագավաթների նոր խաղարկությունում: Ֆրանսիայում ընթացող Եվրոպայի առաջնությունը դեռ նոր-նոր թեւակոխում է հիմնական՝ փլեյ-օֆ փուլ, իսկ ահա ոչ առաջատար ֆուտբոլային երկրների, այդ թվում՝ Հայաստանի ֆուտբոլասերների համար բացվում է «ֆուտբոլային երկրորդ ճակատը»՝ արդեն մեր թիմերի մասնակցությամբ: Աշխարհը «տառապում է» Եվրոպայի առաջնությունով, Ամերիկայի գավաթի խաղարկությունով, իսկ մենք մեր սեփական «տառապանքի» ուղին ու չափը ունենք:

Հայաստանի չեմպիոն «Ալաշկերտը» Չեմպիոնների լիգայի որակավորման 1-ին փուլում մրցելու է Անդորայի չեմպիոն «Սանտա Կոլոմայի» հետ: Առաջին խաղը կայանալու է մրցակցի հարկի տակ հունիսի 28-ին, պատասխան խաղը՝ Երեւանում հուլիսի 6-ին: «Ալաշկերտը» ընդամենը 2-րդ անգամ է մասնակցելու եվրագավաթների խաղարկությանը, առաջին անգամ էլ՝ Չեմպիոնների լիգային: Անցյալ տարի եվրագավաթների նորեկ «Ալաշկերտը» կարողացավ հաջողության հասնել՝ Եվրոպա լիգայում անցավ որակավորման 1 փուլ: Իսկ ահա մեր թիմի մրցակից «Սանտա Կոլոման» 13-րդ անգամ է մասնակցելու եվրագավաթների խաղարկությանը եւ այդ ընթացքում ընդամենը 1 անգամ է կարողացել հաղթահարել որակավորման 1-ին փուլը. Անդորայի չեմպիոնի համար այդ պատմական հաղթանակը, ցավալիորեն, կապված է հայկական ֆուտբոլի հետ: 2014-15 թթ. խաղաշրջանում «Սանտա Կոլոման» մրցեց մեր երկրի չեմպիոն «Բանանցի» հետ եւ 2 խաղերի արդյունքում (1-0 եւ 2-3) կարողացավ հաղթահարել որակավորման 1-ին փուլը:

Մեծ հաշվով այդ մրցակցությունում ավելի շատ պարտվեց լրջագույն կադրային խնդիրներ ունեցող «Բանանցը», եւ անկախ այդ արդյունքից՝ նշեմ, որ «Սանտա Կոլոման» ամբողջապես սիրողական մակարդակի թիմ է. «Ալաշկերտը» ուղղակի պարտավոր է հաղթահարել այս թիմի արգելքը: Որակավորման 2-րդ փուլում «Ալաշկերտ» - «Սանտա Կոլոմա» զույգի հաղթողը մրցելու է Վրաստանի չեմպիոն Թբիլիսիի «Դինամոյի» հետ: Իհարկե, հայ-վրացական այս հանդիպումը Չեմպիոնների լիգայի շրջանակներում կարող է լրջագույն ֆուտբոլային իրադարձություն դառնալ 2 երկրների ֆուտբոլասերների համար, բայց դրա համար «Ալաշկերտին» նախ եւ առաջ անհրաժեշտ է հաղթել Անդորայի չեմպիոնին:

Ամեն դեպքում հայ - վրացական ֆուտբոլային դիմակայություն առաջիկա օրերին լինելու է. Եվրոպա լիգայի որակավորման առաջին փուլում Հայաստանի փոխչեմպիոն Գյումրիի «Շիրակը» մրցելու է Գորիի «Դիլայի» հետ: Առաջին խաղը կայանալու է Գորիում հունիսի 30-ին, պատասխան խաղը՝ Գյումրիում, հուլիսի 7-ին: Հետաքրքիր է, որ այս թիմերը Եվրոպա լիգայի խաղարկության նախապատրաստական շրջանում որոշել էին ընկերական խաղ անցկացնել իրար հետ եւ այդ խաղը պետք է կայանար հուլիսի 23-ին, Գորիում: Բնականաբար, այն արդեն չեղյալ է հայտարարվել, եւ «Շիրակն» ու «Դիլան» մրցելու են Եվրոպա լիգայի շրջանակներում:  «Դիլան» 3-րդ անգամ է մասնակցելու Եվրոպա լիգային: Վրաստանի վերջին առաջնության բրոնզե մեդալակիրները նախկինում կարողացել են հասնել անգամ Եվրոպա լիգայի որակավորման վերջին՝ 4-րդ փուլ, բայց պարտվել են ավստրիական «Ռապիդին» եւ չեն կարողացել նվաճել խմբային փուլի ուղեգիր:

Հայաստանի գավաթակիր «Բանանցը» Եվրոպա լիգայի որակավորման 1-ին փուլում մրցելու է Կիպրոսի «Օմոնիայի», իսկ «Փյունիկը»՝ Ջիբրալթարի «Եվրոպայի» հետ: Առաջին խաղերը կայանալու են Երեւանում հունիսի 30-ին, պատասխան խաղերը՝ հուլիսի 7-ին: Ջիբրալթարի «Եվրոպան» նախկինում 2 անգամ մասնակցել է Եվրոպա լիգայի խաղարկություններին եւ կրել միայն պարտություններ գնդակների 0-13 հարաբերությամբ: Հույս ունենանք, որ «Փյունիկը» իր կազմում ունենալով մեր ազգային հավաքականի մի քանի ֆուտբոլիստների, կկարողանա «չփչացնել» Ջիբրալթարի թիմի 0-ներից բաղկացած շարքը: Ընդհանուր առմամբ հայկական 4 թիմերի մրցակիցներից ամենափորձառուն Կիպրոսի «Օմոնիան» է: «Բանանցի» մրցակիցը 1965 թվականից մասնակցում է եվրագավաթների խաղարկությունների, թեեւ երբեւէ չի կարողացել լուրջ արդյունքներ գրանցել՝ հայտնվել խմբային փուլում: Անցյալ տարի «Օմոնիան» Եվրոպա լիգայի որակավորման 1-ին փուլում զիջեց Բաթումիի «Դինամոյին»:

Ընդհանուր առմամբ վիճակահանությունը բավական բարեհաջող կարելի է համարել հայկական թիմերի համար եւ կարելի է ակնկալել առնվազն անցյալ տարվա արդյունքների կրկնություն. մեր թիմերից 3-ը, հիշեցնեմ, հաղթահարեցին որակավորման 1-ին փուլը: