Հայկական ֆուտբոլ. Կրքեր Հենրիխի շուրջ

«Հենոն մնո՞ւմ է «Բորուսիայում», եթե ոչ, ապա ո՞ւր է գնում» - այս հարցը վերջին ժամանակներս ամենաշատն է քննարկվում Հայաստանում. հասկանալի է, որ խոսքը մեր ազգային հավաքականի եւ Դորտմունդի «Բորուսիայի» ֆուտբոլիստ Հենրիխ Մխիթարյանի մասին է: Արդեն այս տարվա սկզբներին որոշակի տեղեկություններ եղան, որ Մխիթարյանը չի ցանկանում երկարաձգել պայմանագիրը «Բորուսիայի» հետ: Հիշեցնեմ, որ 2013 թվականին հայ ֆուտբոլիստը Դորտմունդ տեղափոխվեց Դոնեցկի «Շախտյորից» կնքելով 4 տարվա պայմանագիր: «Բորուսիան» չի էլ թաքցրել, որ ցանկանում է երկարաձգել Մխիթարյանի հետ գործող պայմանագիրը եւ ընթանում էին բանակցություններ: Անցած ժամանակահատվածում եղան բազմաթիվ, իրարամերժ հրապարակումներ, տեղեկություններ, հարցազրույցներ, եւ կարծես մոտ է հանգուցալուծումը: Նախօրեին Դորտմունդի «Բորուսիայի» գլխավոր տնօրեն Հանս-Յոախիմ Վացկեն գերմանական «Bild»-ին տված հարցազրույցում հայտարարել է. «Մենք 4 ամիս բանակցել ենք Հենրիխ Մխիթարյանի հետ պայմանագրի երկարաձգման շուրջ: Հիմա մենք հաստատ գիտենք, որ այն չի երկարաձգվելու, սակայն դա չի նշանակում, որ ֆուտբոլիստը պայմանագրի ժամկետի ավարտից շուտ է հեռանալու թիմից»:

Մխիթարյանի պայմանագիրը «Բորուսիայի» հետ ավարտվում է 2017 թվականի ամռանը, եւ Վացկեն փաստորեն բացահայտ հայտարարում է, որ պատրաստ են ամեն ինչի, միայն թե Հենրիխը 1 տարի էլ հանդես գա Դորտմունդի թիմում: Համաշխարհային տրանսֆերային շուկայում շատ քիչ են հանդիպում նման դեպքերը, երբ թիմերը հրաժարվում են վաճառել իրենց ֆուտբոլիստներին այն դեպքում, երբ ավարտվում է պայմանագիրը: 1 տարի հետո Մխիթարյանը կարող է հեռանալ «Բորուսիայից» առանց որեւէ փոխհատուցման: «Բորուսիան» պատրաստ է կորցնել մոտ 30-35 միլիոն եվրո (Հենրիխի տրանսֆերային մոտավոր արժեքը), միայն թե Մխիթարյանը չգնա, 1 տարի էլ խաղա Դորտմունդում: Վացկեի հայտարարությանը բավական խիստ ու կոշտ տոնով է արձագանքել Մխիթարյանի գործակալը՝ Մինո Ռայոլան: «Մի քանի ամիս առաջ Մխիթարյանը զրույց ունեցավ «Բորուսիայի» ղեկավարների հետ: Նրանք ամենայն պատասխանատվությամբ խոստացան, որ Հենրիխը կարող է հեռանալ ակումբից ամռանը, եթե պաշտոնական առաջարկ ստանան նրա տրանսֆերի վերաբերյալ: Հիմա, սակայն, դորտմունդյան թիմի ղեկավարները վախենում են սեփական երկրպագուների արձագանքից եւ Մխիթարյանին համոզում են եւս 1 մրցաշրջան անցկացնել: Հաջորդ ամառ «Բորուսիան» պատրաստ է անվճար բաց թողնել Հենրիխին, միայն թե այս տարի նա մնա: Նրանք իրենց ավագ Հումելսին վաճառեցին թշնամի «Բավարիային», իսկ հիմա չեն թողնում, որպեսզի Մխիթարյանը հեռանա: Ես դա չեմ հասկանում»,- նույն «Bild»-ի հետ զրույցում հայտարարել է Ռայոլան՝ ավելացնելով, որ անձամբ Մխիթարյանը ցանկանում է տեղափոխվել անգլիական «Մանչեսթեր Յունայթեդ», եւ սա հայ ֆուտբոլիստի համար ուղղակի ունիկալ հնարավորություն է եւ որին խանգարում է «Բորուսիան»: 

«Բորուսիայի» ղեկավարների եւ Հենրիխ Մխիթարյանի գործակալ Մինո Ռայոլայի «փոխհրաձգությունը» առայժմ ավարտվել է, եւ առաջիկա օրերին հայտնի կդառնա վերջնական տարբերակը: Վերջին շրջանում Մխիթարյանի շուրջ տեղի ունեցող իրադարձությունները որոշակի նմանություն ունեն ուղիղ 3 տարի առաջ՝ 2013 թվականի ամռանը տեղի ունեցածին. հիշեցնեմ, հենց այդ ժամանակ Հենրիխը Ուկրաինայում նվաճելով լավագույն ֆուտբոլիստի, լավագույն ռմբարկուի կոչումները, «Շախտյորից» տեղափոխվեց «Բորուսիա»: Այն ժամանակ էլ «Շախտյորը» չէր ցանկանում բաց թողնել Մխիթարյանին, եւ անգամ հայ ֆուտբոլիստը Հայաստանի ազգային հավաքականում անցկացրած խաղերից հետո չվերադարձավ Դոնեցկ՝ պարտադրելով «Շախտյորին» համաձայնվել տրանսֆերին: Հիմա Մխիթարյանը նվաճել է Գերմանիայի լավագույն ֆուտբոլիստի կոչումը եւ ցանկանում է հեռանալ «Բորուսիայից». այդ մասին հայտնի է վաղուց: Հայ ֆուտբոլիստը երբեւէ չի թաքցրել, որ Անգլիայում հանդես գալը իր երազանքներից մեկն է եւ ներկայումս անգլիական թոփ ակումբներից «Մանչեսթեր Յունայթեդը», «Չելսին» եւ «Արսենալը» պատրաստ են «Բորուսիային» վճարել համարժեք փոխհատուցում հայ ֆուտբոլիստի համար:

Բայց: Կա մի շատ մեծ բայց, որը ազդում է նաեւ Մխիթարյանի որոշման կայացման վրա եւ ինչ-որ տեղ բացառում Դոնեցկից հեռանալու պատմության կրկնությունը: Շատ եմ հանդիպել մարդկանց, որոնք ուղղակի զարմացած են այն ահռելի մասսայականության վրա, որ վայելում է հայ ֆուտբոլիստը Դորտմունդում: Մեր Հենոյին սիրում են, հարգում եմ, անգամ պաշտում են Դորտմունդում՝ մի քաղաքում, որի ֆուտբոլասերների անունը թնդում է ամբողջ աշխարհում: «Բորուսիայի» ֆաները համարվում են աշխարհի լավագույն երկրպագուներից, եւ նրանցից բաժանվելը ծանր է յուրաքանչյուր ֆուտբոլիստի, առավել եւս՝ նրանց կողմից ընդունված ու սիրված Մխիթարյանի համար: Ընդ որում, «Բորուսիայի» ֆաները, որոնք ինչ- որ տեղ հանդուրժեցին իրենց թիմի տարբեր տարիների առաջատարներ Մարիո Գյոտցեի, Ռոբերտ Լեւանդովսկու, Մաթս Հյումելսի, Իլկայ Գյունդողանի վաճառքը, կարծես ոչ մի կերպ չեն ցանկանում համակերպվել Մխիթարյանի, կամ ինչպես իրենք են ասում՝ «Միկիի» վաճառքին: Հայաստանի ազգային հավաքականում անցկացրած հանդիպումներից հետո Մխիթարյանը վերադարձել է Գերմանիա եւ հիմա գտնվում է Դորտմունդում: Առաջիկա օրերին մեր ֆուտբոլիստը պետք է կայացնի միգուցե կարիերայի ամենածանր ու պատասխանատու որոշումը. մնա՞լ ինչ-որ տեղ արդեն հարազատ դարձած Դորտմունդում, թե՞ գնալ առաջ՝ ինչ-որ առումով անգամ դեպի անհայտություն, դեպի Անգլիա: Սա կյանքի այն բացառիկ իրավիճակներից է, երբ խորհուրդներ պետք չեն. որոշումը պետք է կայացնի անձամբ Հենրիխ Մխիթարյանը: