Ճամբար` Արցախում. դպրոցականներին տանում են բանակ

Այս տարի արդեն չորրորդ անգամ Երեւանի «Մխիթար Սեբաստացի» կրթահամալիրում սովորող պատանիները մեկնելու են Արցախի «Ասպետ» ռազմամարզական ճամբար, որը տեղակայված է հենց զորամասում եւ որտեղ ամբողջ տասը օր նրանք կճաշակեն բանակային կյանքը` իր բոլոր առանձնահատկություններով ու խստագույն ռեժիմով:

Կրթահամալիրը Արցախի հանրակրթության համակարգի հետ իրականացնում է լայնածավալ համագործակցություն, որը նրանք անվանում են հանրակրթական կամուրջներ: «Ասպետ» ճամբարը նույնպես համատեղ իրականացվող հերթական նախագիծն է, որի շրջանակներում էլ կրթահամալիրի ավագ դպրոցի` 10-րդ, 11-րդ եւ 12-րդ դասարանների 60 պատանիների՝ իրենց երեք ուսուցիչների հետ միասին, ՀՀ պաշտպանության նախարարության` զորակոչիկների համար նախատեսված ավտոբուսը կհասցնի Ասկերանի շրջան` Այգեստան գետի ափին գտնվող զորամաս: «Մենք, ելնելով նրանից, որ մեր պատանիների մի մասը, միեւնույն է, պարտադիր ժամկետային զինծառայությունն իրականացնում է Արցախում, որոշեցինք որպեսզի խորթությունը հաղթահարվի, որպեսզի Արցախն իրենց համար նույնքան հարազատ ու հայրենիք լինի, որքան Հայաստանի Հանրապետությունը, ուսումնական պլանով նախատեսված մեր դաշտային ռազմական պարապմունքները անցկացնել արցախցիների հետ: Արցախի կրթության նախարարությունը սիրով ընդառաջեց»,- երեկ մեզ հետ զրույցում ասաց «Մխիթար Սեբաստացի» կրթահամալիրի տնօրեն Աշոտ Բլեյանը:

Այցելությունը «Ասպետ» ռազմամարզական ճամբար իրականացվելու է նախնական զինվորական պատրաստության (ՆԶՊ) առարկայի շրջանակներում, պարզապես փակ դասասենյակների փոխարեն ընտրվել է այս տարբերակը: «Մենք ստեղծում ենք պատանու թրծման, կոփման, հայրենիքի պաշտպանությանը պատրաստող առողջ, հետաքրքիր, գրավիչ համակարգ, եւ դա  անում եք, իհարկե, ինչպես ՀՀ ՊՆ-ի եւ ԼՂՀ ՊԲ-ի, այնպես էլ ԼՂՀ կրթության նախարարության հետ համատեղ: Բանակում պատանուն երկու տարվա ընթացքում կսովորեցնեն ճիշտ քայլել, զենքը ճիշտ բռնել: Այստեղ կարեւոր է, որ նա չվախենա, չխուսափի, կամային հատկանիշներ ունենա, խաղաղ նայի այդ ծառայությանը, դժբախտություն չհամարի, ունենա ինքնավստահություն, իր կյանքի մասը համարի: Ես կարծում եմ` սրանք են կարեւոր: Մնացածը կսովորեն բանակում: Պարզ է, մեզ համար դա չարչարանք է, բայց պիտի չարչարվենք, արդյունքում հայրենիքին տանք սահմանադրական պարտականության կատարմանը ֆիզիկապես, կամային որակներով պատրաստ պատանիներ»,- շարունակեց Աշոտ Բլեյանը: Ռազմագիտության դասաժամերը, այսպիսով, հենց այնպես չեն վատնվում, որ հետո սովորողին մի գնահատական նվիրեն ու վերջ:

Նշենք, որ «Ասպետ» ռազմամարզական ճամբարը «Մխիթար Սեբաստացի» կրթահամալիրում սովորողների համար պարտադիր է, բացառությամբ այն դեպքերի, երբ պատանիների մոտ առողջական խնդիրներ են ծագում: Ճամբարը, ինչպես նշեցինք, ուսումնական պլանով նախատեսված դասընթացի մի մասն է` կազմակերպման այլ ձեւով: Այն անվճար է:

Ինչ վերաբերում է այլ դպրոցներին, ապա Աշոտ Բլեյանի փոխանցմամբ, «Ասպետ» ճամբար են մեկնելու նաեւ Մեծամորի ավագ դպրոցի մի խումբ պատանիներ: Դա կլինի արդեն երկրորդ անգամ:

ՀՀ կրթության եւ գիտության նախարարությունից երեկ հետաքրքրվեցինք, թե Հայաստանում կա՞ն այլ դպրոցներ եւս, որոնց աշակերտները ռազմագիտություն առարկան սերտելիս լինում են արցախյան զորամասում տեղակայված ճամբարում: Հանրակրթության վարչության պետ Նարինե Հովհաննիսյանն ասաց, որ տեղյակ չէ այդ ճամբարի մասին` միեւնույն ժամանակ հավելելով, որ ուսումնական պլանով թույլատրելի է ռազմագիտության դասերն անցկացնել ճամբարում: Այդպիսի մի ճամբար, ի դեպ, ըստ Նարինե Հովհաննիսյանի, ունի Երեւանի «Քվանտ» վարժարանը: Հետաքրքրվեցինք նաեւ, թե հնարավո՞ր է այստեղ եւս նախատեսվում է հետեւել Լեռնային Ղարաբաղի հանրապետության փորձին, որտեղ «Ասպետ» ռազմամարզական ճամբարը պարտադիր է 10-րդ դասարանցիների համար, եւ առաջիկայում նմանատիպ նախագիծ իրականացնել պետական մակարդակով: Հովհաննիսյանն առաջարկեց դիմել նախարարության մարզառազմական եւ արտաուսումնական դաստիարակության վարչության արտաուսումնական դաստիարակության բաժնի պետ Արմինե Բարսեղյանին: Վերջինս հայտարարեց, թե ԿԳ գերատեսչությունն առաջնորդվում է  միմիայն իրավական ակտերով եւ վկայակոչեց ՀՀ վարչապետի 2014 թվականի մայիսի 15-ի թիվ 433 Ա որոշումը, համաձայն որի` դպրոցականների 2014 թվականի ամառային հանգստի նպատակով ստեղծվել է միջգերատեսչական հանձնաժողով, եւ այդ հանձնաժողովը համակարգում է դպրոցականների այս տարվա ամառային հանգիստը: Այս պատասխանից պետք է ենթադրել, որ խնդրո առարկա՝ ճամբարի ստեղծում գոնե առայժմ չի նախատեսվում: