Անգամ իրականության զգացումը կորցրած Կրեմլում հասկանում են՝ Հայաստանը հնարավոր չէ վերադարձնել. Ադամյան

Դե ֆակտո 2020-ից հետո Կրեմլի հույսը հեղաշրջումն էր:

Այս մասին սոցցանցի իր էջում գրել է «Հանրապետություն» կուսակցության քաղաքական խորհրդի անդամ Անահիտ Ադամյանը՝ մանրամասնելով Հայաստանի պետականության վերացման քայլերը:

«ՀԱՅԱՍՏԱՆԻ ՊԵՏԱԿԱՆՈՒԹՅԱՆ ՎԵՐԱՑՄԱՆ ՔԱՅԼԵՐԸ՝
1.1998-2008՝ Ռոբերտ Քոչարյանի նախագահության տարիներ
2.1999-ի հոկտեմբերի 27
3.2008-ի մարտի 1
4.2013-ին ՀՀ անդամակցություն Մաքսային միությանը, ապա՝ ԵԱՏՄ-ին
5.2016-ի քառօրյա
6.2020-ի 44-օրյա
7.2021-ին Ռոբերտ Քոչարյանի՝ մեծ քաղաքականություն վերադարձ
8.2022-ին հարձակում ՀՀ տարածքի վրա
9.2023-ի Արցախի հայաթափում
10.2018-2020, 2020-2022, 2023-25՝ Կրեմլի վկաներ+Կրեմլի հիբրիդային պատերազմ Հայաստանի դեմ
11.2026-ից առաջ հիբրիդային պատերազմի ԲՈԼՈՐ գործիքների ներառում, որպեսզի 2026-ին ԺՈՂՈՎՐԴԱՎԱՐԱԿԱՆ ԸՆՏՐՈՒԹՅՈՒՆՆԵՐՈՎ իշխանության գան գուբերնիստները:

…Դե ֆակտո 2020-ից հետո Կրեմլի հույսը հեղաշրջումն էր: Մեդվեդևը իզուր չէր ասում, որ մենք գժվել ենք. նման պարտությունից հետո 2021-ին գնալ ու Նիկո՞լ ընտրել… Փողոց դուրս բերվեցին բոլոր քաղաքական հանգուցյալները. դա ԱՌԱՋԻՆ ու երկարատև փուլն էր՝ ձախողված փորձարկումների:

ԵՐԿՐՈՐԴ փուլում, երբ ակնհայտ էր աշխարհիկների անզորությունը, խաղարկվեց հոգևորականների տարբերակը թեմերի «հայրենասեր» առաջնորդների: Հաջողությունը մեծ չէր: Փորձ արվեց նաև բռնի տեղահանված արցախցիներին հեղաշրջման գործիք դարձնել՝ խոստանալով Արցախ վերադարձի պայմանների ստեղծում: Դարձյալ ձախողում:

ԵՐՐՈՐԴ փուլում Կրեմլը ներդրեց օլիգարխներին՝ փորձելով ստեղծել ՀԱՄԱԿՑՎԱԾ ՊԱՅՔԱՐԻ տպավորություն: Ստիպված էր նաև «արտահանել» ռուսաստանաբնակ հայերին, որովհետև տեղացիները տարբեր պատճառաբանություններով հապաղում են: «Ապստամբություն» չստացվեց, ժողովուրդը կրիտիկական զանգվածով փողոց դուրս չեկավ, ինչպես անընդհատ հաշվարկում ու սխալվում են Կրեմլում: Այս մեթոդը փորձվեց ու չաշխատեց Մոլդովայում վիթխարի ֆինանսական ներարկումներով անգամ Շորը տապալվեց ընտրություններում: Կիսաստացվեց Վրաստանում ի դեմս Բիձինա Իվանիշվիլիի «Վրացական երազանքի», որի հիմքում շատ էլ ռուսական է:

Տրամաբանորեն ՉՈՐՐՈՐԴ փուլում թիրախը լինելու են ուժային կառույցներն ու հատկապես բանակը, խաղը դրվելու է ռուսական դպրոցն անցած սպաների վրա: Հաջողության երաշխիք չկա դարձյալ, բայց բանակի վերակազմավորումը դանդաղեցնելու ու Հայաստանը դեռ խոցելի պահելու ապահով միջոց է:

ՀԻՆԳԵՐՈՐԴ տարբերակը լինելու է լույսը, գազը, Լարսը խաղարկելը հենց 2026-ի ընտրություններից առաջ՝ սոցիալական բունտ հարուցելու նպատակով: Հաշվարկի հիմքում «Մարդը նաև գրպանով է քվեարկում» բանաձևն է: Սա էլ չի անցնելու:

ՎԵՑԵՐՈՐԴ փուլում փորձելու են ընտրությունները ձախողել՝ վերջապես համոզելով Ալիևին ագրեսիա սկսել 2026-ի հունիսին: ՅՈԹԵՐՈՐԴ փուլը լինելու է հետընտրական գործընթացներ հարուցելու ու քաղաքացիական պատերազմի մղելու փորձը, որովհետև անգամ իրականության զգացումը կորցրած Կրեմլում հասկանում են՝ 20-րդ Հայաստանը հնարավոր չէ վերադարձնել:

Հ.Գ. Վերացարկվեք օրընթաց իրադարձություններից, փորձեք նույն այդ իրադարձությունները գնահատել կողքից կամ դրսից հայացքով, և ամեն ինչ հստակ ու պարզ կուրվագծվի՝ ով ով է, ով ուր է տանում, ում ուր են տանում: Ու շաաաաատ շիտակ ինքներդ ձեզ պատասխանեք՝ ում հետ եք՝ Երևանի սրտում Եռաբլուրի հեղինակների՞, Արցախի հայաթափման հեղինակների՞, Հայաստանի ինքնիշխանության վերացման հեղինակների՞, թե՞ ՀԵՂԻՆԱԿՆ եք դժվար, բարդ, բայց հաստատուն ու վերջնական ինքնիշխանության…

Ինձ համար վաղուց հարցեր չկան, կա անսակարկ պատասխան՝ 21-ՐԴ ԴԱՐՈՒՄ ՀԱՅԱՍՏԱՆԸ ԻՆՔՆԻՇԽԱՆ ՊԵՏՈՒԹՅՈՒՆ Է…»: