«Էնթերփրայզ Արմենիա»-ի աշխատակիցները այցելել են Ֆիլիպ Մորրիսի՝ տարածաշրջանում եզակի PMI Science Գիտահետազոտական կենտրոն

Հոկտեմբերի 28-ին PMI Science (Փի Էմ Այ Սայնս) Գիտահետազոտական կենտրոն էին այցելել «Էնթերփրայզ Արմենիա» հիմնադրամի աշխատակիցները: Նպատակը ծանոթանալն էր Կենտրոնի գործունեության ուղղություններին, առկա մարտահրավերներին և խնդիրներին, ուրվագծելը հետագա հնարավոր համագործակցության հեռանկարները: 

PM Science Գիտահետազոտական կենտրոնը Հայաստանում հիմնադրվել է 2018 թվականին: Այն Ֆիլիպ Մորրիս Ինթերնեյշնլ վերազգային կորպորացիայի կողմից ամբողջ աշխարհում հիմնված խոշոր գիտահետազոտական կենտրոններից մեկն է՝ Շվեյցարիայի, Չինաստանի ու Իտալիայի կենտրոնների հետ միասին։

Կենտրոնն ակտիվորեն ընդլայնվում է, իսկ գիտնականներն աշխատում են երեք հիմնական ուղղություններով՝

-Ինովացիաների կառավարում,

-Էքսպերիմենտալ ինժեներիա,

-Մաթեմատիկայի գերազանցության կենտրոն:

Գիտահետազոտական կենտրոնը, բացի հիմնական 3 ուղղություններով աշխատանքից, նաև զարգացնում է գիտական-կրթական էկոհամակարգը, ֆինանսավորում ամենատարբեր պրոյեկտներ, իսկ որոշ ուսանողների համար վարձավճարի փոխհատուցման տեսքով ստեղծում պայմաններ մագիստրատուրայում և ասպիրանտուրայում սովորելու համար: Նրանցից շատերը հետագայում դառնում են գիտահետազոտական կենտրոնի պրակտիկանտներ, ապա՝ նաև գիտնականներ: Այս կերպ Գիտահետազոտական կենտրոնը գիտելիքը դարձնում է հասանելի և հետաքրքիր, իսկ գիտությունը՝ նորաձև:

«Էնթերփրայզ Արմենիա»-ն, որի նպատակն է ներգրավել օտարերկրյա ուղղակի ներդրումներ և խթանել վերաներդրումները՝ ապահովելով Հայաստանի կայուն տնտեսական աճն ու զարգացումը, Ֆիլիպ Մորրիս Ինթերնեյշնլ վերազգային կորպորացիայի PMI Science Գիտահետազոտական կենտրոնի շնորհիվ ուզում է ցույց տալ, որ ՀՀ-ում կան վերազգային ընկերություններ, որոնք հաջողել են և իրենց նպաստն ու ներդրումն ունեն համաշխարհային գիտության, IT, և այլ ոլորտների զարգացման գործում:

«Էնթերփրայզ Արմենիա» հիմնադրամի գլխավոր տնօրեն Լևոն Օհանեսյանը, «Հայկական ժամանակ»-ի հետ զրույցում կիսվելով Գիտահետազոտական կենտրոնում կատարած շրջայցի տպավորություններով, ասում է՝ իր համար  բացահայտում էր, որ ՀՀ-ում այդպիսի մեծ թիմ է աշխատում համաշխարհային հռչակավոր կազմակերպությունների հետ:

Օհանեսյանին հաճելիորեն զարմացրել է նաև այն, որ տեղի լաբորատորիաներում արված ամենատարբեր հետազոտություններ օգտագործվում են համաշխարհային Ֆիլիպ Մորրիսի արտադրանքում, ինչը խոսում է այն մասին, որ ՀՀ-ն ունի այդ ներուժը, իսկ հայ գիտնականներն ու IT համայնքը այնքան են գնահատվում միջազգային ասպարեզում, որ նրանց բացահայտումներն ու մտքի արգասիքներն օգտագործվում են աշխարհի խոշոր ընկերությունների գործունեության մեջ:

««Էնթերփրայզ Արմենիա»-ն սերտ համագործակցում է ՀՀ-ում գործող օտարերկրյա կապիտալով ընկերությունների հետ, որպեսզի նրանք իրենց ավելի ապահով ու կայուն զգան, զգան, որ Կառավարությունն ու պետությունն իրենց կողքին են: Ամեն կերպ աջակցելու ենք իրենց գործունեությանը ՀՀ-ում, որը մեզ համար շատ կարևոր է այն տեսանկյունից, որ միջազգային բրենդները ներկայացված լինեն Հայաստանում, ինչն էլ իր հետ բերելու է մուլտիպլիկատիվ էֆեկտներ: Մենք պարբերաբար այցելում ենք օտարերկրյա կապիտալով գործող ընկերություններ, և մեր նպատակն է՝ այդ ընկերությունները տանել դեպի վերաներդրման ու ընդլայնման»,- ասում է Լևոն Օհանեսյանը:

PMI Science Գիտահետազոտական կենտրոնի ղեկավար Գուրգեն Մարդոյանն էլ «Հայկական ժամանակ»-ի հետ զրույցում նշում է, որ վերազգային կազմակերպությունների դերը շատ մեծ է, քանի որ դրանք շատ մեծ պոտենցիալով՝ բազմահազար աշխատակազմով կազմակերպություններ են:

«Վերազգային կազմակերպությունների ներկայացումը խթանում է ՀՀ-ում այն տեսակի գիտելիքի ու մասնագետների թվի աճի, որոնց պահանջարկը շատ մեծ է նաև ամբողջ աշխարհում: Դա նաև տեսանելիություն է ապահովում մյուս վերազգային կազմակերպություններին, որ կարող են ՀՀ-ում ներկայացված լինել, որովհետև ՀՀ-ի պոտնեցիալը իրականում շատ քիչ է օգտագործվում այս պահին, ՀՀ-ն շատ ավելի շատ բան ունի վերազգային կազմակերպություններին տալու, քան այսօր է տալիս»,- նկատում է նա:

Խոսելով PMI Science Գիտահետազոտական կենտրոնի մասին՝ Մարդոյանը ընդգծում է, որ այն վերջին 6 տարվա ընթացքում ՀՀ-ում մոտ 35 միլիոն դոլարի ներդրում է կատարել  մոտ 8 միլիոնից ավելի ներդրումը՝ գիտական, ինժեներական և կրթական պրոյեկտների վրա:

«Որոշ խնդիրներ մենք հիմա կարողանում ենք հայաստանյան գրասենյակում լուծել, ինքներս մեր ներուժով, բայց առանց գործընկերների՝ գիտական, ինժեներական և IT կազմակերպությունների ներգրավման, գրեթե անհնար կլինի նմանատիպ կազմակերպության համար որոշակի արդիական խնդիրներ լուծել»,- ասում է Մարդոյանը:

Ըստ Գուրգեն Մարդոյանի՝ «Էնթերփրայզ Արմենիա» հիմնադրամի հետ համագործակցությունը միտված է լինելու հենց այդ խնդիրների լուծմանն ու վերազգային կազմակերպությունների համար լավ պայմանների ստեղծմանը. «Իրականում շատ լավ է, որ կա նմանատիպ կառույց, որը զբաղվում է վերազգային կազմակերպությունների համար լավ պայմաններ ստեղծելով: Մենք անընդհատ փորձում ենք ավելի շատ խնդիրներ բերել Հայաստան և հենց այստեղ տալ դրանց լուծումը, մեր ամենօրյա աշխատանքը դա է. ինչի՞ դա անել ուրիշ տեղ, եթե կարող ենք Հայաստանում անել, բայց երբեմն հանդիպում ենք խոչընդոտների, որի շրջանակում ուզում ենք ստանալ որոշակի աջակցություն կա՛մ պետության, կա՛մ որոշ ինստիտուտների ներկայացուցիչների կողմից:

Մեզ հաջողվել է վերջին մեկ տարվա երկար աշխատանքներից հետո կազմակերպության գլխավոր մաթեմատիկայով և արհեստական բանականությամբ զբաղվող կենտրոնը բերել Հայաստան, նմանօրինակ շատ բաներ կարելի է անել, և առանց «Էնթերփրայզ Արմենիա»-ի նման կազմակերպությունների ավելի դժվար կլինի, և այդ շրջանակում շատ կարևոր գործ կա անելու»:

Առավել մանրամասն՝ տեսանյութում: