Որևէ քարտեզի հիման վրա սահմանազատման վերաբերյալ ոչ մի համաձայնություն ձեռք չի բերվել. Ադրբեջանի ԱԳՆ

Ադրբեջանական լրատվամիջոցների փոխանցմամբ՝ Ադրբեջանի արտաքին գործերի նախարարությունը մեկնաբանություն է տարածել Հայաստանի անվտանգության խորհրդի քարտուղար Արմեն Գրիգորյանի՝ հունիսի 4-ին Հանրային հեռուստատեսությանը տված հարցազրույցում հնչեցրած հայտարարությունների վերաբերյալ:

Ադրբեջանի ԱԳՆ-ն նախ անդրադարձել է այն հայտարարություններին, թե ինչ հիմքով է իրականացվելու սահմանազատման գործընթացը: Գերատեսչությունը հղում է արել Պրահայի և Սոչիի հանդիպումների արդյունքներին հաջորդած հայտարարություններին և նշել, թե սահմանազատումը պետք է իրականացվի՝ հիմք ընդունելով տարածքային ամբողջականության և ինքնիշխանության փոխադարձ ճանաչումը։

«Ընդհանուր առմամբ, այս հայտարարություններում հղումները ՄԱԿ-ի կանոնադրությանը և Ալմա-Աթայի հռչակագրին արվում են նշված սկզբունքների համատեքստում։ Հայկական կողմը քաջատեղյակ է, որ ոչ մի հանդիպման ժամանակ որևէ համաձայնություն ձեռք չի բերվել սահմանազատման վերաբերյալ որևէ քարտեզի հիման վրա։ Ի տարբերություն Հայաստանի՝ սահմանազատման գործընթացը, որը մինչ այժմ Ադրբեջանը իրականացրել է իր որոշ հարևանների հետ, իրականացվել է միջազգային պրակտիկային համապատասխան, ոչ թե հատուկ ընտրված քարտեզի, այլ բոլորի վերլուծության և դիտարկման հիման վրա: Այս պրակտիկայի կիրառումը հնարավոր է նաև Հայաստանի դեպքում։

Այս համատեքստում հայկական կողմի համար ավելի օգտակար կլինի սահմանազատման աշխատանքներ սկսելը, քան պնդել 1975թ.: Մի մոռացեք, որ հենց Հայաստանն էր, որ երկար ժամանակ չէր արձագանքում 2020 թվականի Հայրենական պատերազմից հետո սահմանների սահմանազատման վերաբերյալ մեր երկրի ոչ մի առաջարկի»,- ասել են Ադրբեջանի ԱԳՆ-ում:

Պաշտոնական Բաքուն օկուպանտ լինելու իր գործելաոճը վերագրել է Հայաստանին՝ ասելով, թե ՀՀ-ն, որը շուրջ 30 տարի օկուպացված է պահել ադրբեջանական տարածքները, դեռևս գրավում է 8 ադրբեջանական գյուղ, հակառակ ձեռք բերված գրավոր և բանավոր պայմանավորվածությունների՝ ամբողջությամբ դուրս չի բերել իր ուժերը ադրբեջանական տարածքից, տարբեր պատրվակներով ձգձգում է 8 գյուղերի վերադարձը»:

Ագրեսոր երկիրը նաև նշել է, թե «Հայաստանը շարունակում է ռազմական սադրանքները՝ միաժամանակ մեղադրելով Ադրբեջանին Հայաստանի դեմ ագրեսիայի համար, որը ոչ մի հիմք չունի»:

«Բոլորը հիշում են Արմեն Գրիգորյանի նախորդ տարվա հայտարարությունը, թե ի տարբերություն եռակողմ հայտարարության, սեպտեմբերին հայկական զինված ուժերը դուրս են բերվելու մեր տարածքից։ Այս հայտարարությամբ նա հաստատել է Ադրբեջանի դեմ շարունակվող ագրեսիայի փաստը։ Այս համատեքստում խաղաղության գործընթացին հավատարիմ լինելու Հայաստանի պոպուլիստական հայտարարությունը լիովին զուրկ է տրամաբանությունից»,- ասվում է պաշտոնական Բաքվի հայտարարության մեջ:

Բաքվի արտաքին հարցերով գերատեսչությունում անդրադարձել են նաև իրենց մոտ պահվող հայ ռազմագերիներին. «Արմեն Գրիգորյանի հայտարարությունն այն մասին, որ Ադրբեջանը, իբր, խոստացել է ազատ արձակել 10 ձերբակալված հայերի, իրականում ցույց է տալիս Հայաստանի մտադրությունը՝ կոծկելու իր գործողությունները, ինչպիսիք են միջազգային մարդասիրական իրավունքի և հումանիզմի սկզբունքների անտեսումը, ինչպես նաև վստահության ամրապնդման միջոցառումների հարցում փոխադարձության բացակայությունը։ 10-ից ավելի հայ զինվորների անմիջական վերադարձը մեր կողմից, ովքեր, կորցնելով իրենց ճանապարհը, հատել են սահմանը»:

Հայտարարության մեջ ընդգծել են, թե «հայկական կողմը, ի հեճուկս եռակողմ հայտարարության 9-րդ կետի, դեռևս չի վերականգնել տրանսպորտային հաղորդակցությունը Ադրբեջանի Հանրապետության արևմտյան շրջանների և Նախիջևանի Ինքնավար Հանրապետության միջև, տարբեր պատրվակներով, ձգձգում է գործընթացը՝ փոխարենն ապահովելու նոր շինարարությունը։ Նախիջևանի Ինքնավար Հանրապետությունը և Ադրբեջանի արևմտյան շրջանները կապող տրանսպորտային հաղորդակցությունները քաղաքական հակասությունների համար պայմաններ են ստեղծում, ինչը Հայաստանի կողմից այդ գործընթացին խոչընդոտելու վառ օրինակ է»:

Պաշտոնական Բաքուն հրճվանքով խոսել է նաև Լաչինի միջանցքի փակ լինելու մասին՝ հերթական անգամ ստելով, թե Արցախի բնակչությունը կարող է անարգել անցնել դրանով:

«Ծիծաղելի է, որ հայ պաշտոնյան, որը չի կարողանում համակերպվել այն փաստի հետ, որ օրվա ընթացքում տասնյակ հայ բնակիչներ, համապատասխան ընթացակարգերով, երկու ուղղություններով անարգել հատում են սահմանը Լաչինի սահմանային անցակետով, պնդում է Լաչինի ճանապարհը փակելու մասին։

Միևնույն ժամանակ, հայ բնակիչների վերաինտեգրման հարցում միջամտության անհապաղ դադարեցումը ցուցիչ կլիներ, որ Հայաստանը հարգում է Ադրբեջանի տարածքային ամբողջականությունն ու ինքնիշխանությունը ոչ թե խոսքով, այլ գործով»,- ասվում է Բաքվի ԱԳՆ-ի տեքստում:

Եվ, բնականաբար, Ադրբեջանը չի մոռացել հիմնական գործելաոճով՝ սպառնալով ավարտել հայտարարության տեքստը՝ ասելով. «Հիշեցնում ենք հայկական կողմին, որը, սխալ մեկնաբանելով ձեռք բերված պայմանավորվածությունները, ցանկանում է խուսափել իր պարտավորություններից, այդ ապակառուցողական գործունեությունը ոչ միայն չի ծառայում տարածաշրջանում խաղաղության վերականգնմանը, այլ առաջին հերթին ուղղված է Հայաստանի դեմ»։