«Այսօր խփենք վաղվա գոլը միասին»․ Ամերիաբանկի և գործընկերների ջանքերով Հայաստանում մեկնարկել է Միլանի ֆուտբոլային ճամբարը

«Այսօր խփենք վաղվա գոլը միասին»․ այս կարգախոսի ներքո Հայաստանում առաջին անգամ հյուրընկալվել է Միլանի ակադեմիայի մանկապատանեկան ճամբարը։ Այն բարեգործական նախաձեռնություն է, որն իրականացնում է «Ամերիաբանկ»-ը, և որին միացել են Team Telecom Armenia-ն, «Զանգեզուրի պղնձամոլիբդենային կոմբինատը և «Տաշիր» ընկերությունների խումբը։

Ճամբարը միավորել է Հայաստանի մարզերից 160 պատանու և գուցե նրանց համար դառնա ուղեգիր դեպի մեծ ֆուտբոլ։ Պատանեկան ճամբարին մասնակցում են 11-15 տարեկան այն տղաներն ու աղջիկները, որոնք խաղում են մարզերի ակումբներում և աչքի են ընկել իրենց խաղային դիրքերում ու ՀՖՖ առաջնություններում։

«Ամերիաբանկ»-ի մարքեթինգի և հաղորդակցության գծով տնօրեն Ռեբեկա Հակոբյանն իր խոսքում ընդգծում է՝ այս նախաձեռնությունը տարածաշրջանում առաջինն է, և մեր պատանիները միակն են, որոնք հնարավորություն են ստացել մասնակից լինել դրան։ Վերջինս նաև նկատում է՝ ապագան երիտասարդներինն է, պետք է գտնել նրանց և հնարավորություն տալ աշխարհի լավագույն օրինակներով առաջ ընթանալ։

«10 օրը բավական քիչ է պրոֆեսիոնալ ֆուտբոլի համար, բայց այն երկար ժամանակ է՝ մտահորիզոններ փոփոխելու համար։ Վաղվա գոլը խփելու ենք մեր միասնականությամբ և ցույց ենք տալու պատանիներին, որ երկրի լավագույն ընկերությունները հնարավորություն են տալու իրականացնել իրենց երազանքները, բացել երազանքների դռները։ Մենք մեր հավատով կարծրատիպեր ենք կոտրում, որ իբր թե չենք կարող թիմային խաղով հաջողության հասնել։ Հակառակը՝ այս ծրագիրը շատ դրական ազդեցություն կունենա մեր երեխաների համար»,- ընդգծում է Հակոբյանը։

Միլանի ակադեմիայի մանկապատանեկան ճամբարի տեխնիկական գծով տնօրեն, գլխավոր մարզիչ Կլաուդիո Զոլայնն էլ կարևորում է այս ճամբարի ընթացքում պատանիների՝ իրենց ուժերին հավատալը:

«Ֆուտբոլը խաղ է, և եթե դրանից հաճույք չես ստանում, քո տեղը չէ։ Հմտություններ հղկելու համար պետք է ամեն օր քրտնաջան աշխատել, հետամուտ լինել երազանքին։ Շատ երեխաներ ուզում են պրոֆեսիոնալ խաղացող դառնալ և ինքնավստահության շնորհիվ պետք է պայքարեն դրա համար։ Ամեն մեկը յուրովի անձնավորություն է և իր յուրօրինակությունը չպետք է կորցնի ու երբեք չպետք է հանձնվի։ Երբեմն պատահում է, որ խաղը տանուլ տալուց հետո հիասթափվում են, բայց սպորտի գեղեցկությունը նրանում է, որ դու միշտ կարող ես գտնել առիթ՝ նորից կատարելագործվելու՝ թե՛ որպես անձ, թե՛ որպես մարզիկ»,- ասում է նա։

Միլանի ակադեմիայի մանկապատանեկան ճամբարում մարզվել է շուրջ 200 հազար պատանի Իտալիայից, Մեծ Բրիտանիայից, Գերմանիայից, Չինաստանից, Ճապոնիայից, Թայլանդից, Կանադայից և տասնյակ այլ երկրներից։ Հայաստանում ճամբարը կանցկացվի երկու հերթափոխով մայիսի 28-ից հունիսի 7-ը։ Հայ պատանիներին մարզելու նպատակով առաջին անգամ Հայաստան են ժամանել Միլանի ակադեմիայի մարզիչներ Կլաուդիո Զոլանը, Ամադեո Կատալդին, Լեո Մոգեսոնը և Վիրիո Պերելլին։

ՀՖՖ-ից 4 մարզիչ, ինչպես նաև կամավոր այլ մարզիչներ են ընդգրկված այս նախաձեռնության շրջանակներում։ Իտալացի մասնագետներն իրենց գիտելիքն են փոխանցում նաև մեր հայ մարզիչներին։  

Միլանի ակադեմիայի մանկապատանեկան ճամբարի համակարգող Լուկա Ամադեսիի խոսքով՝ շատ հազվադեպ է, որ ճամբարը կազմակերպվում է նման հիասքանչ վայրում և այս տեսակ բարձրակարգ հնարավորությամբ. «Երեխաները հնարավորություն ունեն ձեռք բերել նոր բարեկամություն։ Սա պիլոտային նախաձեռնություն է, արձագանքից կախված՝ կհասկանանք՝ ինչպես կազմակերպել նմանատիպ այլ նախագծեր»։

Նախաձեռնությանը միացած «Տաշիր» ընկերությունների խմբի «Արարատ-Արմենիա» ֆուտբոլային ակումբի գործադիր տնօրեն Հրաչյա Պողոսյանը մեծապես կարևորում է ծրագրի իրականացումը ՀՀ-ում. «Դեռևս 2018 թվականին ֆուտբոլային ակումբ հիմնեցինք և զբաղվում ենք ՀՀ-ում ֆուտբոլի զարգացմամբ։ Ցանկալի կլինի, որ այս նախաձեռնությանը մասնակից 160 երեխաներից գոնե մի քանիսը կարողանան իրականացնել իրենց երազանքները և խաղան նաև դրսում։ Սա աննախադեպ ծրագիր է Հայաստանյան ֆուտբոլի համար։ Մեծ սիրով կսպասենք արդյունքներին»:

Նախաձեռնությանը մասնակցելու են եկել ՀՀ բոլոր մարզերի ակումբներից աչքի ընկած պատանիները։ Նրանցից է, օրինակ, Արարատի մարզի Փոքր Վեդի քաղաքից 13-ամյա Նարե Եփրեմյանը։ «Հայկական ժամանակ»-ի հետ զրույցում Նարեն պատմում է. «Հանդես եմ գալիս «Սուրենավան» ֆուտբոլային ակումբում, որը համանուն գյուղում է գտնվում։ Դժվար է բացատրել, թե ինչքան երջանիկ էի, որ ընտրվեցի այս ծրագրում։ Ցանկանում եմ դառնալ լավագույնը իմ ընտրած ուղում, արդեն երկուսուկես տարի իմ ակումբում եմ։ Կցանկանայի հետագայում հանդես գալ Հայաստանի ազգային հավքականի աղջիկների թիմում։ Մեծ ոգևորությամբ եմ մասնակցում ծրագրին, հույս ունեմ՝ այս ամենի շնորհիվ ավելի հմտանալ ֆուտբոլում»։

14-ամյա Հայկն էլ Կապանից է եկել, հանդես է գալիս «Սյունիքի» ֆուտբոլային ակումբում։

«7 տարի է, որ զբաղվում եմ ֆուտբոլով։ Պարապում եմ ամեն օր: Ես շատ էի աշխատում իմ ակումբում, և մարզիչս ասաց, որ այսպիսի ծրագիր կա, որ ես էլ եմ մասնակցելու։ Այստեղ եկել եմ՝ ցույց տալու իմ  ուժերը։ Ուզում եմ դառնալ լավագույն ֆուտբոլիստներից մեկը և մեծ հույսեր եմ կապում այս ծրագրի հետ։ Հուսով եմ՝ մի օր ինձ կհաջողվի խաղալ Միլան ակումբում ու հանդես գալ բարձրագույն լիգայում»,- ասում է նա:

Մանրամասները՝ տեսանյութում: