Երեխայի մոտ սեքսոլոգիական խնդիր է առաջանում, երբ հանդերձարանում տեսնում է մեծահասակների սեռական օրգանները. սեքսոպաթոլոգ

Առողջապահական ոլորտի մասնագետների կարծիքով՝ կարևոր է, որ երեխայի մոտ հոգեսեռական զարգացումը սկսվի ճիշտ ժամանակին և ընթանա ճիշտ փուլերով։ Այն պետք է տեղի ունենա համահունչ նրա մարմնասեռական զարգացմանը, այսինքն՝ երեխայի ընդհանուր հասունության և սեռական զարգացման տեմպերը պետք է համապատասխանեն միմյանց։ 

Հոգեսեռական զարգացումը անձի սեքսուալության ձևավորումն է։ Այն զուգահեռ ընթանում է և միահյուսվում մարմնասեռական զարգացմանը, որի ընթացքում ձևավորվում է սեքսուալության մարմնական հիմքը։ Սակայն երբեմն որոշակի գործոններ կարող են ազդել հոգեսեռական զարգացման վրա, որոնց թվում է սոցիոգեն գործոնը։

Հայ-ամերիկյան կենտրոնի բժիշկ-սեքսոպաթոլոգ, դոցենտ Սևադա Հակոբյանը «Հայկական ժամանակի» հետ զրույցում մանրամասնում է՝ սոցիոգեն գործոններից է հատկապես մանկահասակ տղաների՝ հասուն տղամարդկանց հետ միևնույն հանդերձարանում գտնվելը, որը կարող է բացասական հոգեհուզական և սթրեսոգեն ազդեցություն ունենալ երեխաների ներաշխարհի վրա։ Նույնը վերաբերում է մանկահասակ աղջիկներին, որոնք մեծահասակ կանանց հետ նույն հանդերձարանում են գտնվում։

«Այդ ամենը կարող է պատճառ դառնալ երեխայի հոգեսեռական տեմպի արագացմանը և հանգեցնել վաղաժամ հոգեսեռական զարգացման։ Ո՞րն է պատճառը․ առաջին հերթին մերկ հասուն մարմինները տեսնելը։ Երեխան, մեծահասակների հետ գտնվելով նույն հանդերձարանում, հայտնաբերում է հասուն, սեռական օրգաններ, որոնք իր համար ունեն սթրեսոգեն ազդեցություն։ Այսինքն՝ երեխայի համար անսպասելի էր դա, իր ունեցած պատկերացումներին հակասող»,- ընդգծում է մասնագետը։

Բժշկի խոսքով՝ երեխայի մոտ հոգեսեռական զարգացման տեմպի արագացումը, հանգեցնելով վաղաժամ հոգեսեռական զարգացման, առաջացնում է նաև որոշակի բարդություններ: Միևնույն ժամանակ, մասնագետը ընդգծում է՝ դա չի կարող ազդել երեխաների սեռական կողմնորոշման վրա։ Ըստ զրուցակցի՝ այս եզրահանգմանը եկել է տարբեր դիտարկումների միջոցով, ինչպես նաև պացիենտների հետ շփվելով: Օրինակ՝ երբ որևէ սեքսուալ խնդիր ունեցող հիվանդի հետ զրուցելիս պարզվել է, որ մանուկ ժամանակ երեխան մերկ է տեսել ծնողներից մեկին, որն էլ հետևանքներ է թողել, առաջացրել սեքսուալ բնույթի խնդիրներ։

«Սեքսուալ տարբեր խնդիրներ ունեցող հիվանդների հետ զրուցելիս նկատում ենք, որ այդպիսի խնդիրների առաջացման արմատներ կան: Երեխան, տեսնելով հասուն օրգանները, նրա մեջ հետաքրքրություն է առաջանում, սկսում է մտածել այդ օրգանների մասին և ընկնում տառապանքների մեջ։ Այդ մտահոգությունները կարող են ստիպել, որ ավելի շուտ զարգանա նրա հոգեսեռական վիճակը, դա էլ իր հերթին հետագայում դառնում է սեքսոլոգիական խնդիրների պատճառ»,- ընդգծում է մասնագետը։

Սևադա Հակոբյանի խոսքով՝ միշտ չէ, սակայն, որ երեխաների մոտ նման տեսարաններից սեքսոլոգիական խնդիրներ են առաջանում։ Մասնագետը նկատում է՝ մարդու հոգեհուզական ֆոնը տարբեր է, ելնելով դրանից՝ յուրովի է արձագանքը: Իսկ առաջացած խնդիրները, ըստ տեսակների, հաղթահարելու տարբեր ժամկետներ ունեն։

Բժշկի դիտարկմամբ՝ պետք չէ, որ այդ մանրամասները ծնողները երեխային փոքրուց բացատրեն, ամեն ինչ պետք է լինի ճիշտ ժամանակին, և մարմնի փոփոխությունները երեխան ինքը պետք է նկատի։ «Կարևոր է, որ ծնողները ուշադիր լինեն հենց հանդերձարաններին, երեխաներին տանեն այնպիսի կենտրոններ, որոնք ունեն մեծահասակների և երեխաների համար առանձնացված հանդերձարաններ, իսկ կենտրոնները պետք է պարտադիր ունենան և՛ երեխաների, և՛ մեծահասակների համար առանձնացված՝ ըստ սեռերի»,- ասում է նա:

Հետևո՞ւմ են արդյոք այդպիսի կենտրոնները հանդերձարանների տարանջատմանը, թե՞ ոչ, մենք փոքրիկ հարցում իրականացրինք՝ զրուցելով մի քանի կենտրոնների ներկայացուցիչների հետ։ Ուշագրավ է, սակայն, որ մեզ՝ որպես հաճախորդի, հանդերձարանների առանձնացված լինելու հարցի վերաբերյալ որոշ կենտրոններ այլ պատասխաններ էին տալիս, որպես լրատվամիջոցի՝ այլ։

Օրինակ, երբ զանգահարեցինք «Ինշեյփ ստուդիո» կանանց ֆիտնես ակումբ՝ ներկայանալով որպես հաճախորդ, ակումբի աշխատակցուհին մեզ հետ զրույցում նախ ճշտեց, թե երեխան ի՞նչ տարիքի է, պատասխանեցինք՝ 11 տարեկան է, աշխատակցուհին ասաց, որ միանշանակ կարող է օգտվել նույն հանդերձարանից։ Ավելի ուշ նույն կենտրոն լրատվամիջոցի անունից զանգեցինք և ստացանք հետևյալ պատասխանը. «Երեխաների հանդերձարանը միանշանակ առանձին է մեծահասակների հանդերձարանից։ Աղջիկ երեխաները փոխվում են այլ հանդերձարանում, տղա երեխաները՝ այլ»։

«Վլադ ֆիթնես» ակումբի աշխատակցուհու խոսքով էլ՝ մեծահասակների և երեխաների հանդերձարանները թեև միասին են, սակայն ժամային գրաֆիկը այնպես է կազմված, որ երեխաների փոխվելու ընթացքում մեծահասակները հանդերձարանից չեն օգտվում։ Որևէ դժգոհություն հանդերձարանի միասին լինելու հետ կապված ակումբը չի ստացել։

«Գոլդ’ս ջիմ» մարզասրահից էլ նշեցին՝ երեխաների հանդերձարանները առանձնացված են, թե՛ տղա, թե՛ աղջիկ երեխաները ունեն իրենց առանձին հանդերձարանները։ «Lady Space Fitness & Beauty Lounge»-ի աշխատակիցն էլ մեզ հետ զրույցում ասաց՝ երեխաները իրենց մոտ հաճախում են միայն լողի, նրանց փոխվելու ժամանակ մեծահասակները հանդերձարան չեն կարող մուտք գործել։

«Aquatek Sport Complex» ֆիթնես ակումբից էլ փոխանցեցին՝ երեխաները իրենց առանձին հանդերձարաններն ունեն, սակայն լինում են որոշ բացառություններ․ «Մենք ունենք մանկական հանդերձարան առանձին, եթե մայրիկ ու աղջիկ երեխա են գալիս, թույլ ենք տալիս, որ երեխան մայրիկի հետ նույն հանդերձարանում փոխվի: Բայց եթե մայրիկը գալիս է տղա երեխայի հետ, երեխային տրվում է մանկական հանդերձարան»:

Մարիամ Առաքելյան