Չեմ թաքցնում, որ կադրային փոփոխությունը կապված է ՏԻՄ ընտրության արդյունքի հետ. Նազելի Բաղդասարյան

Այսօր Շիրակի նորանշանակ մարզպետ Նազելի Բաղդասարյանն իր հրավիրած ասուլիսը շնորհակալական խոսքով սկսեց՝ ուղղված ԶԼՄ ներկայացուցիչներին՝ ընդգծելով, որ ինքը ևս ժամանակին եղել է լրագրող, սակայն այժմ հանգամանքների բերումով այլ տեղում է: 

«Ես գիտեմ, որ մարզպետները գալիս և գնում են, լրագրողները՝ մնում: Հասկանալով, որ իրական և մնայուն իշխանությունը 4-րդ իշխանությունն է՝ ես լիահույս եմ, որ արդյունավետ կհամագործակցենք: Պատրաստ եմ բաց և թափանցիկ աշխատանքի, և լրագրողների առաջ մարզպետարանի դռները միշտ բաց են»,- ասաց Բաղդասարյանը:

Անդրադառնալով հարցին՝ եղե՞լ է արդյոք պատգամավորական մանդատը վայր դնելու և մարզպետի պարտականությունը ստանձնելու պարտադրանք՝ Բաղդասարյանն ասաց՝ բնականաբար՝ ոչ՝ ընդգծելով, որ մարզպետի պաշտոնը զբաղեցրել է մեծ պատասխանատվությամբ:

«Այս ծանր և դժվարին փուլում որոշել եմ վերադառնալ մարզ՝ գիտակցելով խնդիրների և բարդությունների ամբողջ սպեկտրը՝ հասկանալով, որ բազմաթիվ խնդիրներ կան ծառացած, որոնք պետք է լուծել: Հույս ունենամ, որ նվիրումով աշխատանքը և գիտելիքների այն համեստ պաշարը, որն ունեմ, կկարողանամ ծառայեցնել հօգուտ Շիրակի: Շատ դժվար է օրենսդիր մարմնից տեղափոխվել գործադիր, և եթե Աստծո կամոք հաջողեմ նաև այս ոլորտում, դա կլինի մարզի բոլոր բնակիչների հաջողությունը, որովհետև ինչ անելու ենք, անելու ենք քաղաքի, մարզի, երկրի համար»,- նշեց մարզպետը:

Դիտարկմանը, որ «Քաղաքացիական պայմանագիր» կուսակցությունը 4 տարում Շիրակում 4-րդ նոր մարզպետն է նշանակում, Բաղդասարյանն ասաց՝ դա ոմանց պարագայում՝ օբյեկտիվ, ոմանց պարագայում էլ սուբյեկտից պատճառներ ունի: Սակայն մարզպետի աշխատասենյակ մտնող յուրաքանչյուր ոք պետք է գիտակցի, որ մի օր հեռանալու է:

«Եթե չեմ սխալվում, Շիրակի մարզպետի պաշտոնը զբաղեցրած նախորդ գործընկերներն այս պահի դրությամբ բոլորն էլ որոշակի պետական պաշտոններ են զբաղեցնում՝ 2-ը փոխնախարարի, 1-ը՝ համալսարանի ղեկավարի: Սա ոչ թե խզում է, այլ հավանաբար որոշում կայացնողները գտել են, որ այդ մարդիկ այլ ոլորտում կլինեն առավել պիտանի: Այս պահին ինձ է վստահվել պաշտոնը, կփորձեմ հնարավորինս արդարացնել սպասումները»,-ասաց Նազելի Բաղդասարյանը:

Հարցին՝ արդյոք Բաղդասարյանին մարզպետի պաշտոնում նշանակելը կա՞պ ունի Գյումրիում կայացած ՏԻՄ ընտրության ընթացքում ՔՊ-ի արդյունքների հետ, նա ասաց. «Այո, ՏԻՄ ընտրության արդյունքները եղել են ազդակ, և մենք որոշակի որոշումներ փոփոխել ենք թիմի ներսում: Չեմ թաքցնում, որ այս կադրային փոփոխությունը կապված է դրա հետ»:

Բաղդասարյանը նկատում է՝ արդյունավետ աշխատանքը, անկողմնակալ վերաբերմունքը լինելու են իր աշխատանքային սկզբունքային հիմնաքարերը: «Ես ՔՊ անդամ եմ, բայց մարզպետը վարչական պաշտոն է, և ես Շիրակի մարզպետի պաշտոնում լինելու եմ բոլորի մարզպետը՝ անկախ քաղաքական հայացքներից ու պատկանելությունից: Ես սա ուզում եմ ընդգծել»:

Աշխատանքային առաջին օրն արդեն մարզպետարանում Բաղդասարյանին սպասում էին Շիրակի գերեվարված զինծառայողների հարազատները: Նորանշանակ մարզպետն ասաց, որ բոլորին էլ ճանաչում է և երբեք հանդիպման կաշկանդվածություն չի ունեցել:

«Այս պահի դրությամբ մարզի 62 գերեվարվածների գրեթե կեսը վերադարձել են, մյուսների վերադարձի ուղղությամբ ակտիվ աշխատանքներ են տարվում: Չեմ թաքցնի, պատգամավորի կարգավիճակում լիազորությունների ավելի լայն սպեկտր ունեի՝ խորհրդարանական դիվանագիտությունը օգտագործելով: Վերջերս ընդգրկված էի ԵԽԽՎ-ում այս կարևոր գործառույթը ստանձնելու համար, և ԵԽԽՎ մեր վերջին բանաձևում պնդել եմ հատուկ գերիների վերադարձի հետ կապված որոշակի դրույթներ՝ մասնավորապես առանձնացնելով Խծաբերդի գերիներին, իրենց կարգավիճակի հարցը, քանի որ Բաքվում անհիմն քրեական գործեր են հարուցվել:

Գերիների վերադարձի գործընթացը շարունակական է: Մենք կարևոր մեկ ձեռքբերում ունեցանք, որ դատավարության ընթացքում գերիները, որոնք որոշակի քրեական հոդվածով դատապարտվել էին, և հարազատների մոտ մտածմունք կար, որ նրանք այլևս չեն վերադառնա: Վերջին 5 վերադարձածները, որոնք Շիրակի մարզից էին, ապացուցեցին, որ այդ դատավարությունն իրականում բեմադրություն է, և դատապարտված լինելով անգամ՝ վերադարձել են հայրենիք»,- մանրամասնեց մարզպետը:

Նազելի Բաղդասարյանը Շիրակում  Լիդա Նանյանից հետո, որը մարզը ղեկավարել է 2007-2010 թթ., 2-րդ կին մարզպետն է: Հարցին՝ արդյոք պաշտոնը համատեղելի՞ է կին լինելու հետ, Բաղդասարյանը պատասխանեց. «Պաշտոնում ծառայելն անձնական որակների և սկզբունքների խնդիր է: Ես լիահույս եմ, որ իմ աշխատանքի ընթացքում կտարբերվեմ ոչ թե կին լինելով, այլ աշխատանքի որակով»։

Սամսոն Մատինյան