Տարածաշրջանում եզակի այգի՝ Գյումրու ոգով. տրվեց Բարեկամության այգու շինարարության մեկնարկը (լուսանկարներ)

Տարածաշրջանում եզակի այգի՝ Գյումրու ոգով: Բարեկամության այգու շինարարական աշխատանքների մեկնարկը տրվեց այսօր: Միջոցամանը Գյումրիում մասնակցեցին  տարածքային կառավարման և ենթակառուցվածքների նախարար Գնել Սանոսյանը, ՀՀ էկոնոմիկայի նախարար Վահան Քերոբյանը, Շիրակի մարզպետ Հովհաննես Հարությունյանը, «Քաղաքաշինության և զբոսաշրջության» (ТUF) բարեգործական հիմնադրամի համահիմնադիր Ռուբեն Վարդանյանը, մարզպետներ, բազմաթիվ հյուրեր ու գյումրեցիներ:

Աշխատանքների մեկնարկն ազդարարվեց խորհրդանշական քայլով: Այգու նախկին տնօրենի դուստրը՝ Նարինեն, արխիվային թղթադրամ տեղադրեց հիմնվող առաջին քարի տակ: Ասաց՝ այս այգում երեխա ժամանակ շատռ է խաղացել: Հայրիկի ու անցած օրերի հետ կապված լավ հիշողություններ ունի և մեծ ցանկություն, որ իր մանկության այգին կրկին մարդաշատ ու կենդանի դառնա:

Գործարար Ռուբեն Վարդանյանը լրագրողների հետ զրույցում ընդգծեց՝ սա համագործակցության նոր բանաձև է, և Հայաստանում դժվարությամբ են իրականացնում:

«Շինարարությունը պետք է 2020 թվականին լիներ, բայց տարբեր պատճառներով հետաձգվեց, սակայն պետք է կա՛մ լավն անել, կա՛մ չանել: Մի փոքր դանդաղում ենք, որովհետև ուզում ենք ամենալավն անել Գյումրու համար:

Շատ ծանր ծրագիր է և մեծ ու ամբիցիոզ նախագիծ է: Վստահ եմ՝ այգին կդառնա գյումրեցիների ամենասիրված տեղը: Մեր համար կարևոր է, որ աշխարհի տարբեր անկյուններից մասնակցեն այս ծրագրին, քանի որ սա, ի վերջո, բարեկամության այգի է»,- ասաց Վարդանյանը:

Գյումրիում զինվորական ծառայությունն անցկացրած Ռուբեն Վարդանյանը նաև հիշում է, որ այստեղ 6 ամիս ձմեռ է, 6 ամիս՝ գարուն, ամառ, աշուն: Հենց դրա համար էլ հիմա նոր միտք ունեն, որ այգին նաև ձմեռային լինի:

Ինչ էլ լինի, ըստ Վարդանյանի, ամեն ինչ անելու են՝ լավագույն արդյունքի հասնելու ձգտումով, քանի որ այս այգին դառնալու է Գյումրու սիրտն ու քաղաքի տարբեր հատվածների միջև կամուրջ:

Բարեկամության այգու արևելյան հատվածում կկառուցվի ատրակցիոնների հրապարակը, որը կլինի այգու ամենաաղմկոտ և ամենաակտիվ հատվածը:

Բարեկամության այգու վերակառուցման ընթացքում, ըստ նախագծի, պահպանվելու են տարածքի խորհրդային կոմպոզիցիայի դասավորվածությունն ու սալիկապատ տարածքները, իսկ նախկին 3 լողավազանները ստանալու են նոր վիզուալ տեսք և գործառույթներ։

Այցելուները հնարավորություն կունենան զբոսնել լողավազանների շրջակայքով՝ շորհիվ տարածքի դեկորատիվ փոփոխությունների։ Հյուսիսային հատվածը կվերածվի կանաչապատ լաբիրինթոսի՝ մեկուսի հանգստի համար նախատեսված վայրերով։  Տարանցիկ ճանապարհի վրա գտնվող միջանցիկ տարածքը կկորցնի լողավազանի գործառույթը և կձևավորվի լուսավոր սալահատիկներով։ Իսկ հարավային տարածքը կվերածվի ամֆիթատրոնի, որը նախատեսված կլինի կարճաժամկետ հանգստի համար։

Տարածքի սալահատակը մասամբ կփոխարինվի նորով՝ ապահովելով հարմարավետ ելքն ու մուտքը դեպի հանգստի գոտիներ։ Իսկ հրապարակին ավելի մոտ տարածքներում առկա սալիկները կվերականգնվեն կամ կպահպանվեն՝ մաքրելով միայն վերին կանաչապատ շերտը։ 

Ըստ տարածքային կառավարման և ենթակառուցվածքների նախարար Գնել Սանոսյանի՝ «Քաղաքաշինության և զբոսաշրջության» (ТUF) բարեգործական հիմնադրամի միջոցներով 900 մլն դրամի աշխատանք կիրականացվի: Կբարեկարգվի այգու հարակից տարածքը՝ կից ենթակառուցվածքներով:

Տարածաշրջանում եզակի այգի ունենալու համար Գյումրին 7.2 հա է հատկացրել: Պատասխանատուները խոստանում են՝ որևէ մեկին հուսախաբ չանել:

«Ուզում եմ այս մեկնարկի համար շնորհավորել բոլորիս, և ամեն ինչ կանենք, որ այն, ինչ մեր մտքերում կա, այն, ինչ մեր գաղափարներում ու թղթերում կա, դառնա գեղեցիկ իրականություն: Այս մոտ 900 մլն դրամը մաս է 4 մլրդ 300.000 դրամի աշխատանքների, որով մենք Տարածքային զարգացման հիմնադրամի միջոցով նախատեսում ենք Գյումրիում իրականացնել փողոցաշինական աշխատանք նաև»,- ասաց Սանոսյանը:

Էկոնոմիկայի նախարար Վահան Քերոբյանն էլ ասաց՝ գյումրեցիները յուրահատուկ հումորով, անկոտրում կամքով, լավատես մարդիկ են, ինքն էլ հաճույքով է գալիս Գյումրի: Վստահ է, որ այս ծրագիրը հաջող ընթացք է ունենալու:

Այս այգին, ըստ Քերոբյանի, նման ենթակառուցվածքները լուրջ ձգողական կետեր են զբոսաշրջիկների համար նաև:

Գյումրու քաղաքապետի պաշտոնակատար Ալբերտ Մարգարյանն էլ նշեց, որ այս այգի մտնելիս քաղաքացին կդառնա քաղաքակրթության մասնիկ: Բարեկամության այգին դառնալու է գաղափարի հեղափոխության և նոր ձգտումների մեկնարկային կետ գյումրեցիների համար:

Սամսոն Մատինյան