Կոռուպցիոն բնույթի հանցագործության 50 քրեական գործ է հարուցվել Շիրակի մարզում. դատախազն ամփոփել է 9 ամիսների աշխատանքը

2021 թվականին 9 ամսում Շիրակի մարզում արձանագրվել է հանցագործության 970 դեպք: Նախորդ տարվա նույն ժամանակահատվածում դրանք 1019 են եղել: Դեպքերը նվազել են 49-ով: Հարուցվել է 623 քրեական գործ:

Այս մասին այսօր կայացած ասուլիսում հայտարարեց Շիրակի մարզի դատախազ Գուրգեն Գրիգորյանը:

Նշված ժամանակահատվածում սպանության դեպքերն աճել են 1-ով: Արձանագրվել է սպանություն 3 դեպք: 3-ն էլ բացահայտված է: 2 դեպքի նախաքննությունն ավարտված է, գործերը ՇՄ ընդհանուր իրավասության դատարանում են, 1-ի նախաքննությունն  ավարտական փուլում է:

Անցնող 9 ամիսներին արձանագրվել է սպանության փորձի 1 դեպք: Նախորդ տարվա նույն ժամանակահատվածում 2 դեպք է եղել գրանցված:

Շիրակում դիտավորությամբ առողջությանը ծանր վնաս պատճառելու 13 դեպք է արձանագրվել՝ նախորդ տարվանից 4 դեպքով պակաս: 13 դեպքից 10-ը բացահայտվել է:

Ըստ ՇՄ դատախազի՝ հրազենի, ռազմամթերքի ապօրինի շրջանառության 51 դեպք է արձանագրվել մարզում: Թիվն աճել է 20-ով:

«Սա հիմնականում պայմանավորված է հետաքննության մարմնի, դատախազության կողմից տարված բացատրական աշխատանքով»,- ասաց դատախազը:

2021-ին ավազակության 2 դեպք է արձանագրվել. 2-ն էլ դեռ բացահայտված չեն:

Շիրակի մարզում էականորեն նվազել են գողության դեպքերը: Այս տարի 164 դեպք է արձանագրվել՝ 35-ով պակաս 2020 թվականից:

Բնակարանային գողության դեպքերն են 17-ով նվազել: 164-ից 31-ն են այս հանցատեսակի խմբում: Չնայած դեպքերը նվազել են, սակայն, ըստ Շիրակի մարզի դատախազի, բացահայտման ցուցանիշը չի փոխվել:

«Մտահոգիչ համարելով դեպքերի չբացահայտված լինելը, նաև ավտոմեքենաներից կատարված գողությունների բացահայտված չլինելը՝ իմ կողմից միջնորդագրեր են ուղարկվել ոստիկանության Շիրակի մարզային վարչության պետին, որով անհրաժեշտություն է համարվել նախ քարտեզագրել թիրախային այն տարածքները, որտեղ առավել հաճախ են կատարվել դեպքերը: Ինչպես նաև վերակարգերն են տեղաբաշխվել ըստ այդ տարածքների, ինչն իր դրական ազդեցությունն ունեցել է: Վերջին շրջանում նվազել են մեքենաներից կատարվող գողությունների դեպքերը»,- ներկայացրեց Գուրգեն Գրիգորյանը:

Այս տարի կողոպուտի 6 դեպք է արձանագրվել Շիրակի մարզում:

Աճել է մարմնական վնասվածքներով ՃՏՊ-ների դեպքերը: Անցնող 9 ամիսներին 167 դեպք է արձանագրվել՝ նախորդ տարվա 134-ի դիմաց: Զոհվել է 17 մարդ. 10-ով ավելի, քան 2020-ին է արձանագրվել:

«ՃՏՊ-ների աճը հիմնականում պայմանավորված է երթևեկության կանոնները կոպտորեն խախտելով, արագություն գերազանցելով, փակ փողոց մտնելով, չնախատեսված վայրում մեքենա կայանելով, պատասխանատու օղակի թերի աշխատանքով, կարգազանց վարորդների նկատմամբ խիստ միջոցներ չձեռնարկելով, գիշերային ժամերին խիստ հսկողություն չիրականացնելով, նաև նախականխիչ գործողություններ կարող են լինել ճանապարհների տեսախցիկներով կահավորումը: Նաև հասարակությունը պետք է բարձրաձայնի իրավախախտ վարորդի արարքի մասին»,- կարծում է դատախազը:

Ըստ դատախազի՝ եղել են դեպքեր, երբ երթուղայինների վարորդները չեն ունեցել վարորդական վկայականներ, կամ դրանք չեն եղել պահանջվող կարգին համապատասխան: Երթուղայինների և տաքսի մեքենաների վարորդները պարբերաբար կոպտորեն խախտում են ճանապարհային երթևեկության կանոններն ու վտանգում և՛ իրենց, և՛ հետիոտների կյանքը:

Ներկայացվող վիճակագրության համաձայն՝ նախորդ 9 ամսում կոռուպցիոն բնույթի հանցագործության 50 քրեական գործ է հարուցվել: Նախորդ տարի թիվն ավելի մեծ է եղել՝ 87: Քննվել է նմանաբնույթ 95 հանցագործության վերաբերյալ քրեական գործ, որից 12-ը մեղադրական եզրակացությամբ ուղարկվել է ՇՄ ընդհանուր իրավասության դատարան:

Դատախազն առանձնակի կարևորեց Շիրակի մարզի գյուղական համայնքներում բջջային օպերատորների կողմից հողեր վարձակալելու և ալեհավաքներ տեղադրելու գործընթացներում համայնքների ղեկավարների կողմից կատարված չարաշահումները:

Առկա խիստ նախնական հաշվարկներով՝ պետությանն ու համայնքներին պատճառվել է 80 մլն դրամի վնաս: Այս պահին 11 մլն դրամը վերականգնվել է:

Շիրակի մարզի դատախազության կողմից ներկա պահին իրականացվում են մի քանի ուղղություններով պետական շահերի ուսումնասիրություններ: Մասնավորապես՝ Գյումրու Սև բերդ ամրոցի հարակից հողատարածքների օտարման իրավաչափությունը, «Հոկտեմբեր» կինոթատրոնի շենքը Համաշխարհային բանկի՝ առավել մեծ միջոցներով վերանորոգելու և համեմատաբար ցածր գնով օտարելու հարցը:

Հունիսի 20-ի արտահերթ ընտրությունների ժամանակ ստացված 69 ահազանգից 31-ով նյութեր են նախապատրաստել, հարուցվել է 3 քրեական գործ, 2-ը կառչվել են:

Առաջիկա ընտրությունների հետ կապված որևէ ահազանգ մինչ այս պահը դատախազությունը չի ստացել:

Ապօրինի գույքի բռնագանձման մեկ փաթեթ է Շիրակի մարզի դատախազությունը ներկայացրել Գլխավոր դատախազություն:

Սամսոն Մատինյան