Նիկոլ Փաշինյանը շնորհավորեց «Հայաստան» եւ «Պատիվ ունեմ» դաշինքներին ԱԺ անցնելու առիթով

ՀՀ կառավարության այսօրվա նիստում վարչապետի պաշտոնակատար Նիկոլ Փաշինյանն անդրադարձավ ՀՀ Սահմանադրական դատարանի հուլիսի 17-ին հրապարակած որոշմանը, որով ուժի մեջ մնացին հունիսի 20-ի ԱԺ արտահերթ ընտրությունների արդյունքները:

«Այսպիսով՝ եւս մեկ անգամ արձանագրվեց, որ արտահերթ ընտրությունները Հայաստանում անցել են ժողովրդավարության չափանիշներին համապատասխան, եւ ընտրությունների վերջնական արդյունքները արտահայտում են ՀՀ ժողովրդի կամքը: Հիշեցնեմ, որ, համաձայն միջազգային դիտորդական առաքելությունների գնահատականների, խորհրդարանական արտահերթ ընտրությունները եղել են մրցակցային, հիմնական իրավունքներն ու ազատությունները հարգվել են, եղել են ազատ, քարոզարշավի իրականացման հնարավորությունները եղել են հավասար, ապահովվել է լուսաբանման հավասար սկզբունքը, ընտրությունները համապատասխանել են ժողովրդավարության սկզբունքներին»,- ասաց Փաշինյանը:

Նա ընդգծեց՝ այսպիսով՝ 8-րդ գումարման Ազգային ժողովը կազմված կլինի 107 պատգամավորներից՝ «Քաղաքացիական պայմանագիր» կուսակցությունը կունենա 71 մանդատ, «Հայաստան» դաշինքը՝ 29, «Պատիվ ունեմ» դաշինքը՝ 7 մանդատ:

«Հարգելի գործընկերներ, սիրելի հայրենակիցներ, մեզ՝ բոլորիս, շնորհավորում եմ ճգնաժամային պայմաններում ազատ եւ մրցակցային խորհրդարանական ընտրությունների անցկացման կապակցությամբ: Շնորհավորում եմ «Հայաստան» դաշինքին եւ «Պատիվ ունեմ» դաշինքին խորհրդարան անցնելու առիթով: Ուզում եմ ընդգծել, որ Հայաստանի պատմության մեջ առաջին անգամ ընտրությունները դարձել են ներքաղաքական ճգնաժամի հաղթահարման միջոց, մինչդեռ նախկինում մենք սովոր ենք եղել ընտրությունների արդյունքներով ներքաղաքական ճգնաժամեր ունենալու պրակտիկային»,- նշեց վարչապետի պաշտոնակատարը:

Փաշինյանն ասաց, որ Սահմանադրական դատարանը ընտրությունների արդյունքներով կայացված որոշման մեջ մի շարք կարեւոր շեշտադրումներ է արել: Դրանցից անդրադարձավ ատելության խոսքին վերաբերող հատվածին՝ մեջբերելով հատված այդ որոշումից:

«Սահմանադրական դատարանը, հաշվի առնելով վարչապետի սահմանադրական կարգավիճակը եւ լիազորությունների ծավալը Հայաստանի սահմանադրական ժողովրդավարության պայմաններում, ինչպես նաեւ քաղաքական մեծամասնության ունեցած ազդեցությունը հանրային իշխանության մարմինների համակարգում, ընդգծում է նրանց կողմից գործուն միջոցներ ձեռնարկելու անհրաժեշտությունը՝ հայաստանյան քաղաքական խոսքում ատելության, բռնության, վիրավորանքի եւ արժանապատվությունը նվաստացնելու կասկած հարուցող խոսքի եւ վարքագծի որեւէ դրսեւորում, ներառյալ՝ նախընտրական քարոզչության ժամանակ հնչեցվող խոսքում բացառելու նպատակով: Ընտրություններին մասնակցող քաղաքական ուժերի կողմից իրականացվող նախընտրական քարոզչությունն ուղղված է ընտրողների վստահությունը ձեռք բերելուն, ամրապնդելուն:

Այս գործընթացում առանցքային դեր պետք է կատարեն տնտեսական, սոցիալական, պաշտպանական եւ այլ բնագավառներում քաղաքական ուժերի ծրագրային դրույթների մասին ընտրողների իրազեկումը եւ այդ դրույթների առարկայական քննարկումը՝ չբացառելով նախընտրական քարոզչության ժամանակ սուր քննադատական խոսքը, որը, սակայն, չպետք է ուղեկցվի ատելության, բռնության, վիրավորանքի եւ արժանապատվությունը նվաստացնելու կասկած հարուցող խոսքով եւ վարքագծով: Ընդ որում՝ նշված գործընթացի արդյունավետության ապահովման հարցում մեծ դեր ունեն ընտրություններին մասնակցող բոլոր քաղաքական ուժերը»,- նշեց Փաշինյանը՝ մեջբերելով ՍԴ որոշումը: 

Նա բոլորի ուշադրությունը հրավիրեց այն փաստին, որ տվյալ գնահատականը վերաբերում է ոչ միայն նախընտրական քարոզարշավին, այլեւ ընդհանրապես քաղաքական խոսույթին ու վարքագծին. «Որպես խորհրդարանական ընտրություններում հաղթած «Քաղաքացիական պայմանագիր» կուսակցության համամասնական ցուցակը գլխավորող եւ ժողովրդի կողմից ընտրված վարչապետ՝ ուզում եմ ասել հետեւյալը՝ «Քաղաքացիական պայմանագիր» կուսակցությունը Ազգային ժողովում եւ ԱԺ-ից դուրս տրամադրված է կառուցողական, փոխադարձ հարգանքի վրա հիմնված աշխատանքի՝ հանուն մեր երկրի անվտանգության, բարեկեցության ու զարգացման»:

Վարչապետի պաշտոնակատարն ընդգծեց, որ վճռական են ժողովրդի առաջ իրենց ստանձնած պարտավորությունները լիարժեք կատարելու գործում եւ պատրաստ են համագործակցային, ատելության խոսքից, բռնության խոսույթից, վիրավորանքից, արժանապատվությունը նվաստացնող բառապաշարից զերծ աշխատանքի ինչպես խորհրդարանական, այնպես էլ արտախորհրդարանական ուժերի հետ:

«Ինչպես գիտեք, արտախորհրդարանական ուժերի հետ համագործակցությունն ինստիտուցիոնալ տեսք է ստանում այս օրերին, իսկ խորհրդարանական ուժերի հետ հարաբերությունները ինստիտուցիոնալացված են ՀՀ սահմանադրությամբ եւ օրենքներով: Ընդգծում եմ, որ ՀՀ կառավարությունը եւ խորհրդարանական մեծամասնությունն ընդունում են Սահմանադրական դատարանի ուղերձը եւ ինչպես քաղաքական, այնպես էլ օրենսդրական եւ իրավական անհրաժեշտ միջոցները կձեռնարկեն՝ ՀՀ-ն եւ նրա ժողովրդին ատելության խոսքից, վիրավորանքից, արժանապատվությունը նվաստացնելուն ուղղված խոսույթից զերծ պահելու համար»,- ասաց Նիկոլ Փաշինյանը: