2021-ը վերականգնման, հետագա զարգացման, հիմքերի ամրապնդման տարի. ԱՀ խորհրդարանն ամփոփեց 7-րդ գումարման 3-րդ նստաշրջանը

Հունիսի 30-ին  Արթուր Թովմասյանի նախագահությամբ կայացել է Արցախի խորհրդարանի 7-րդ գումարման 3-րդ նստաշրջանի եզրափակիչ նիստը: Նիստին մասնակցել է 31 պատգամավոր:

Այս մասին հաղորդագրություն է տարածել ԱՀ ԱԺ լրատվության և հանրության հետ կապերի բաժինը:

Արցախի Հանրապետության նախագահ Արայիկ Հարությունյանը ներկայացրել է 2020 թ. գործունեության միջոցառումների ծրագրի կատարման ընթացքը և արդյունքները, ինչպես նաև 2021 թ. ծրագիրը: Հաղորդումն ամփոփել է ինչպես մինչև 2020 թ.մայիսի 21-ը՝ նախագահ Բակո Սահակյանի, այնպես էլ դրանից հետո՝ Արայիկ Հարությունյանի նախագահության ժամանակահատվածները:

Նախագահը  անդրադարձել է պաշտպանության, արտաքին քաղաքականության, տնտեսական ու սոցիալական  ոլորտներին:

«Պատերազմական գործողությունների ողջ ընթացքում պետական մարմինները կատարել են իրավիճակին համապատասխան իրենց լիազորությունները: Ինչ վերաբերվում է բացթողումներին ու սխալներին, ապա դրանք ենթակա են առանձին քննության ու վերլուծության»,-իր ելույթում ասել է Արայիկ Հարությունյանը:

Նա անդրադարձել է հետպատերազմյան իրողություններում անվտանգության ապահովման նոր մարտահրավերներին:

«Արցախի Հանրապետության միջազգային ճանաչումը մնում է արտաքին քաղաքականության հիմնական նպատակը: Դրան ավելացել է երկրի տարածքային ամբողջականության վերականգնումն ու  բռնի տեղահանվածների վերադարձի ապահովումն իրենց բնակավայրեր:

Առողջապահության համակարգը արժանապատվորեն դիմակայել է երկու հզոր ալիքի՝ համավարակին ու պատերազմին: 2021 թ. աշխատանքներ են տարվել ու տարվում պատերազմից տուժած բուժհիմնարկների վերականգնման, ինչպես նաև առողջապահությունը էլ ավելի հասանելի դարձնելու ուղղությամբ:

Պատերազմից մեծապես տուժել են  կրթական համակարգն ու մշակութային ժառանգությունը: Աշխատանքներ են տարվում Ադրբեջանի վերահսկողության տակ մնացած մշակութային ժառանգությունը պահպանելու ու  վերադարձնելու ուղղությամբ:

Իրականացվել են բնակչության սոցիալական պաշտպանության ծրագրեր:Կառավարությունը միջոցներ է ձեռնարկել տեղահանված բնակիչներին կացարանով, սննդով և հագուստով ապահովելու ուղղությամբ: Համակարգվել են բարեգործական ծրագրերը, որոնց ընդհանուր արժեքը կազմել է ավելի քան 1.2 մլրդ. դրամ:

Մեկնարկել է բնակարանաշինության լայնածավալ ծրագիր, որի արդյունքում շուրջ 3000 ընտանիք գյուղական բնակավայրերում կապահովվի կացարանով, իսկ Ստեփանակերտում կառուցվող բազմաբնակարան բնակելի շենքերով կապահովվեն կոնկրետ շահառու խմբեր,   ինչպես նաև Շուշիի ու Հադրութի բնակիչները:

2020 թ. տնտեսության ակտիվության ցուցանիշը կազմել է 76,8 տոկոս: 2021 թ. տնտեսական քաղաքականության գերակա խնդիրներից են Արցախին հասցված վնասների գույքագրումն ու բնակչության տնտեսական գործունեության խթանումը: Հաստատվել  է ֆիզիկական և իրավաբանական անձանց վարկային պարտավորությունների կատարմանն ուղղված պետական ֆինանսական աջակցության ծրագիրը:

Պատերազմի հետևանքով տուժել են ցանքատարածությունների կեսից ավելին, 2020 թ. հիմնադրված այգիները լրիվությամբ մնացել են բռնազավթված տարածքներում: 2021 թ. գյուղատնտեսության ոլորտում կառավարության գործունեությունը ուղղված կլինի պտղաբուծության ճյուղի զարգացմանը, առկա անասնաշենքերի ողջ պոտենցիալի օգտագործմանը»,-ասված է հաղորդագրության մեջ:

 Ելույթի վերջում Արայիկ Հարությունյանը 2021 թվականը որակել է վերականգնման, հետագա զարգացման հիմքերի ամրապնդման ու բարեփոխման տարի: Հանրապետության նախագահը պարզաբանումներ է տվել պատգամավորների հնչեցրած՝ հաղորդմանն առչնվող հարցերին:

Նիստի ընթացքում 11 պատգամավոր 22 հարց է  ուղղել Հանրապետության նախագահին և կառավարոթյան անդամներին: Պատգամավորների բարձրացրած հարցերը վերաբերել են  Արցախի ինքնորոշմանը, էներգետիկ և պարենային անվտանգությանը, ջրային ռեսուրսների պահպանությանը, ԱՀ և ՀՀ միջպետական այլընտրանքային ճանապարհի կառուցմանը, միջհանրապետական ճանապարհաշինությանն ու բնակարանաշինությանը, վարկային ծրագրերին, էկոլոգիական անվտանգությանը և այլն:

Ձայների 24 կողմ, 5 դեմ  հարաբերակցությամբ խորհրդարանը հաստատել է ԱՀ 2020 թվականի պետական բյուջեի կատարման տարեկան հաշվետվությունը ՝ եկամուտների գծով՝ 124.622.757.6 հազ. ՀՀ դրամ, ծախսերի գծով՝ 122. 557.882.4 հազ.  ՀՀ դրամ, բյուջեի հավելուրդը՝ 2.064.875.2 հազ. ՀՀ դրամ:

2020 թվականի պետական բյուջեի կատարման վերաբերյալ ԱՀ հաշվեքննիչ պալատը ներկայացրել է դրական եզրահանգում:

Այնուհետ կայացել է Հաշվեքննիչ  պալատի  նախագահի ընտրությունը:23 կողմ, 5 դեմ ձայների հարաբերակցությամբ խորհրդարանը Տիգրան Տիգրանի Ծատրյանին ընտրել է Հաշվեքննիչ պալատի նախագահ՝ մինչև 2027 թվականի փետրվարի 4-ը պաշտոնավարման ժամկետով: