Տանս կպած տներ է սարքում, որ վաճառի. քաղաքացու իրավունքները ոտնահարվում են, պատկան մարմինները լուռ են

«Հայկական ժամանակի» խմբագրություն է դիմել Երեւան քաղաքի բնակիչ Վարդիթեր Հարությունյանը՝ հայտնելով, որ խախտվում են իր եւ իր ընտանիքի իրավունքները, սակայն պատկան մարմինները շարունակում են անտարբեր մնալ՝ չկանխելով հերթական ապօրինի շինարարությունը:

Բանն այն է, որ Հարությունյանների հարեւանը իրենց առանձատան կողքին առանց քաղաքաշինական փաստաթղթերի առկայության եւ առանց հրդեհային անվտանգության նորմերը պահպանելու կոողք կողքի երեք նոր առանձնատների կառուցապատում է սկսել: Նորակառույցներն արվել են առանց Հարությունյանների տնից օրենքով նախատեսված 3 մետր հեռավորությունը պահպանելու:

Ինպես Հարությունյաններն են ասում, կառուցապատողը դրանով չի բավարարվել ու մի բան էլ երկրորդ հարկի սկիզբն է դրել, որն անմիջապես կպած է իրենց տան պատին: Երկրոդ հարկը կառուցելուց հետո նրանց տան աջ կողմն ամբողջությամբ մթության մեջ կհայտնվի՝ զրկվելով արեւի բնական լույսից:

_{Պատուհանից երեւացող պատն առաջիկա մի քանի օրում կշարվի՝ ամբողջությամբ փակելով Հարությունյանների տան լույսը}

Հարությունյանների առանձնատունը գտնվում է Մալաթիա-Սեբաստիա վարչական շրջանի Հաղթանակ թաղամասում (4-րդ գյուղ): «Հայկական ժամանակի» հետ զրույցում նրանք պատմեցին, որ կառուցվող առանձնատների սեփականատերը իրենց հարեւանն է, ազգանունը՝ Գարիկ Պողոսյան, բիզնեսմեն է, վերոնշյալ առանձնատներն էլ են բիզնես նպատակի ծառայեցվելու: «Այս թաղամասում նա արդեն տասնյակ տներ է սարքել: Սարքում, հետո վաճառում է: Ինչ ուզում է, թող անի, բայց ոչ իմ տան արեւի հաշվին: Խոհանոցի, երկու ննջարանների պատուհաններն արդեն գրեթե փակել է, հիմա այս երկրորդ հարկն է սկսել: Եթե սա էլ թույլ տան անել, տունս հավերժ մթության մեջ կթաղվի, արեւի երես չենք տեսնի: Խոնավությունն ու այդ անհարամարությունները՝ մի կողմ, բա որ. Աստված մի արասցե, հրդեհ լինի, հրշեջն ինչպես է անցնելու, կրակը հանգցնի: Մի բան լինի՝ իմ տունն էլ հետը կվառվի»,- «Հայկական ժամանակի հետ զրույցում ասացին Վարդիթեր Հարությունյանի ծնողները:

Տան տիկինը՝ Քնքուշ Հարությունյանը, նշեց, որ կառուցապատում իրականացնող տղամարդու՝ Գարիկ Պողոսյանի ընտանիքի հետ երկար տարիներ մտերիմ հարեւաններ են եղել: Ապա ցույց տալով շինարարության հետեւանքով առաջացած անհարմարությունները՝ տիկին Քնքուշը նկատեց. «Եթե իրենք տանս լույսը չփակեին, ես ոչ մի բողոք էլ չէի ներկայացնի ու երբեք նման բան չէի անի: Այդ տղայի մոր հետ էլ մտերիմ ենք եղել, հիանալի անձնավորություն է, բայց նրա որդին կանգնել, ինձ ասում է՝ ուր ուզում ես՝ գնա, բողոքի, ոչ ոք չի կարող ինձ խանգարել: Եթե բողոքես, երրորդ հարկ էլ կկառուցեմ, որ բոլորովին արեւի երես չտեսնես: Ժամանակին Նիկոլ Փաշինյանն ասում էր՝ դուք եք տերը ձեր երկրի, բայց ես իմ տան մեջ ինձ տեր չեմ զգում, դա մեկ օրվա բան չէ, որ համակերպվեմ, արեց՝ վերջ»:

Մեր այցելության ժամանակ Գարիկ Պողոսյանն այդեղ չէր: Մեզ դիմավորեց շինարարության աշղեկը՝ Հակոբ անունով: Հակոբը հայտնեց, որ պատուհանները կիսով չափ բաց են մնալու, քանի որ շինարարությամբ նախատեսված չէ լիարժեք երկրորդ հարկ: «Ինձնից հասնում է ամեն ինչ անել, որ 2-րդ հարկը 4 ռյադ կառուցվի, ամեն ինչ կանեմ, որ այդպես լինի»,- խոստացավ Հակոբը: Ըստ աշղեկի՝ բոլոր հարցերն էլ կարելի է քննարկել եւ ընդհանուր հայտարարի գալ, եւ քանի որ թե՛ ինքը, թե՛ առանձնատների սեփականատերը հարեւաններ ու վաղեմի մտերիմներ են, կփորձեն ընդհանուր եզրեր գտնել: Սակայն մեր ներկայությամբ հարեւանները կրկին վիճեցին:

Նա եւս փաստեց, որ օրենքով նախատեսված հեռավորությունը չի պահված, բայց չցանկացավ մեր մնացած հարցերին պատասխանել՝ ասելով՝ եթե հարկ համարեն, կզանգահարեն մեզ:

Հարությունյանների խոսքով էլ՝ շինարարություն անողը Հակոբին հանձնարարել է ցանկացած հարցնողի ներկայանալ որպես սեփականատեր (ի դեպ, սկզբից նա մեզ եւս որպես սեփականատեր ներկայացավ՝ մինչեւ կմոտենային Հարությունյանները): «Գարիկն ու Հակոբը մտերիմներ են: Ինքն է Հակոբին ասել, որ բոլոր հարցնողներին ասի, թե իր ու իր ախպոր առանձնատներն են: Նաեւ շահարկում են Հակոբի՝ Արցախյան վերջին պատերազմին մասնակից լինելը»,- ասացին Հարությունյանները:

Իսկ նրանց դուստրը՝ Վարդիթեր Հարությունյանը, ցանկացավ նաեւ շեշտել, որ օրենքով էլ իրենց պաշտպանված չեն զգում, քանի որ դիմել է տարբեր պետական կառույցների ու արդյունքի չի հասել: Քաղաքաշինության, տեխնիկական եւ հրդեհային անվտանգության տեսչական մարմնի աշխատակիցները արձագանքել են, խախտումները՝ գրանցել, սակայն մեկ ամիս է՝ անցել աշխատանքների դադարեցում չի եղել, ավելին՝ կառույցին դրանից հետո է ավելացվել երկրորդ հարկ։

«Ապրիլի 19-ին դիմել եմ ՀՀ քաղաքաշինության, տեխնիկական եւ հրդեհային անվտանգության տեսչական մարմին: Մայիսի 11-ին դիմել եմ Երեւանի քաղաքապետարան, ՀՀ վարչապետին եւ նորից դիմում-բողոք եմ ուղարկել ՀՀ քաղաքաշինության, տեխնիկական եւ հրդեհային անվտանգության տեսչական մարմին, բայց՝ ապարդյուն»,- ասաց նա:

Հարությունյանները ՀՀ քաղաքաշինության, տեխնիկական եւ հրդեհային անվտանգության տեսչական մարմին դիմում են ներկայացրել ապրիլի 19-ին են: Ապրլի 24-ին ստացել են պատասխան, որում նշված է. «ՀՀ քաղաքաշինության, տեխնիկական եւ հրդեհային անվտանգության տեսչական մարմնի քաղաքաշինական գործունեության վերահսկողության վարչությունն ուսումնասիրել է թեժ գծով ստացված դիմում-բողոքը եւ պարզել, որ վերոնշյալ հասցեում կառուցված քարե շինության շինարարական աշխատանքներն իրականացվել են առանց քաղաքաշինական փաստաթղթերի առկայության»: Պատասխանում նաեւ նշվում է, որ ելնելով վերոգրյալից՝ համապատասխան գրություն է ուղարկվել Երեւանի քաղաքապետին՝ առաջարկելով իր իրավասությունների սահմանում համապատասխան միջոցներ ձեռնարկել:

Մալաթիա-Սեբաստիա վարչական շրջանի աշխատակազմից էլ հայտնեցին, որ խնդրից տեղյակ են, խախտումներ են արձանագրվել, դիմել են նաեւ Երեւանի քաղաքապետին ու սպասում են նրա որոշմանը:

Երեւանի քաղաքապետարանից մեզ ասացին, որ հարցի վերաբերյալ պատասխաններ կտրամադրեն միայն գրավոր հարցման դեպքում: