Ռուսաստան մուտքը արգելվում է ԱՄՆ գլխավոր դատախազին, ՀԴԲ ղեկավարին, այլ պաշտոնյաների. ՌԴ-ն պատասխանում է ԱՄՆ-ին

Ռուսաստանի Դաշնության ու Միացյալ Նահանգների հեռակա բանավեճն ու տարաձայնությունները շարունակվում են նոր դրսևորումներով: Ի պատասխան ԱՄՆ-ի սահմանած վերջին պատժամիջոցների, պաշտոնական Մոսկվան  պատժամիջոցներ է սահմանել ԱՄՆ-ի վարչակազմի 8 բարձրաստիճան պաշտոնյաների նկատմամբ: Երկրի արտաքին գործերի նախարարությունից այսօր հայտնել են, որ բացի այդ, առաջարկվել է ՌԴ-ում դիվանագիտական ծառայություն իրականացնող մեկ տասնյակ ամերիկացի դիվանագետի երկրից վտարել:

ՌԴ ԱԳ նախարար Սերգեյ Լավրովը հայտարարել է, որ փոխադարձության սկզբունքով այլ պատժամիջոցներ էլ են սահմանվել, որոնց մասին Մոսկվան կհայտարարի, երբ ժամանակը գա:

«Տասը դիվանագետ ընդգրկվել է այն ցուցակում, որը մեզ տրվել է հեռացման խնդրագրով: Մենք այդ իրողությանը կարձագանքենք հայելային պատկերով: Մենք էլ մեր հերթին  Ռուսաստանում աշխատող ամերիկացի տասը դիվանագետի կառաջարկենք լքել մեր երկիրը», - ասել է Լավրովը:

Ռուսաստանը նաև հայտարարել է պատժամիջոցներ «հակառուսական արշավի իրականացման մեջ ներգրավված» ներկա և նախկին ամերիկյան բարձրաստիճան պաշտոնյաների և գործիչների նկատմամբ. մասնավորապես, նրանց արգելվում է մուտք գործել երկիր: Նրանց թվում են ԱՄՆ գլխավոր դատախազ Մերիկ Գարլանդը, Ազգային անվտանգության քարտուղար Ալեխանդրո Մալյորկասը, Հետախուզության դաշնային բյուրոյի տնօրեն Քրիստոֆեր Ռեյը, Ներքին քաղաքականության նախագահի խորհրդական Սյուզան Ռայսը, Ազգային հետախուզության տնօրեն Ավրիլ Հեյնսը և Դատական բյուրոյի ղեկավար Մայքլ Կարվախալը: Բացի այդ, Ռուսաստանի սահմանը  փակ է ԱՄՆ նախկին պաշտոնյաներից մի քանիսի համար ևս: Նրանք են՝ ԱՄՆ նախկին նախագահի օգնական Ջոն Բոլթոնը, Ազգային անվտանգության հարցերով և ՄԱԿ-ում մշտական ներկայացուցիչ, ԿՀՎ նախկին տնօրեն Ռոբերտ Վուլսին:

Լավրովը հավելել է, որ Մոսկվան սկսում է ընթացակարգ, որով սահմանվում է, որ ավարտին է հասցվում  Ռուսաստանի և երրորդ երկրների քաղաքացիներին Ռուսաստանում ամերիկյան դիվանագիտական ներկայացուցչություններում վարձու աշխատանք տրամադրելու պրակտիկան:

Այս բոլոր միջոցները պատասխան են ԱՄՆ պատժամիջոցների, որոնք ապրիլի 15-ին կիրառվել են  պետական պարտքի վրա:

«Մենք սկսում ենք ընթացակարգեր ՝ համաձայն Վիեննայի դիվանագիտական հարաբերությունների կոնվենցիայի, Ռուսաստանի օրենսդրությանը համապատասխան՝ ներառյալ աշխատանքային օրենսգրքին վերաբերվող: Ընթացակարգով նախատեսված է վերջ դնել Ռուսաստանի և այլ երկրների քաղաքացիներին Ռուսաստանում ամերիկյան դիվանագիտական առաքելություններում աշխատանքի ընդունելու պրակտիկային», - ասել է Լավրովը:

Ըստ նրա, այս պրակտիկան լայնորենու վաղուց  օգտագործվում է ԱՄՆ-ի կողմից: Մոսկվան որոշում է կայացրել սկսել ամերիկացի դիվանագետների Ռուսաստան մեկնումը կարգավորող համաձայնագիրը չեղյալ հայտարարելու կարգ, և այժմ դիվանագետների `իրենց կեցության ու աշխատանքի քաղաքներից դուրս գալու կամ այլ քաղաքներում ճանապարհորդելու խնդիրները որոշվելու են անհատական, ոչ թե դիվանագիտական հիմունքներով:

«Ամերիկացիները, դեսպանատներում և հյուպատոսարաններում աշխատավարձից բացի, տարեկան իրենց մի քանի հարյուր աշխատողների, այսպես ասած, կարճաժամկետ գործուղումների են ուղարկում: Հետևաբար, մենք դադարեցնում ենք Պետդեպարտամենտի և ԱՄՆ այլ գերատեսչությունների աշխատակիցների անվերահսկելի, անսահմանափակ կարճաժամկետ ուղևորությունները Ռուսաստանում ամերիկյան դիվանագիտական առաքելություններում աշխատելու համար », - ասել է ԱԳ նախարարը:

Նա ավելացրել է, որ Ռուսաստանը նաև կսահմանափակի կամ կդադարեցնի ամերիկյան հիմնադրամների և հասարակական կազմակերպությունների գործունեությունը ՌԴ տարածքում:

Հատկանշական է, որ միևնույն ժամանակ, Մոսկվան դրական է գնահատում Ռուսաստանի և Միացյալ Նահանգների ղեկավարների համատեղ  գագաթնաժողով անցկացնելու առաջարկը: «Շատ է խոսվում ջՋո Բայդենի` երկկողմ գագաթնաժողով կազմակերպելու առաջարկի մասին: Ինչպես արդեն նշել ենք, մենք դրան դրականորեն արձագանքեցինք, այժմ մենք ուսումնասիրում ենք այդ նախաձեռնության տարբեր կողմերը », - ասել է Լավրովը մամուլի ասուլիսում:

Մանրամասնելով, նա նշել է, որ Ռուսաստանի նախագահի օգնական Յուրի Ուշակովը Մոսկվայում ԱՄՆ դեսպան Ջոն Սալիվանի հետ հանդիպմանը խորհուրդ է տվել նրան խորհրդակցությունների մեկնել Վաշինգտոն:

ԱՄՆ-ում Ռուսաստանի դեսպան Անատոլի Անտոնովն էլ իր հերթին շարունակում է խորհրդակցությունները Մոսկվայում, ասել է Լավրովը: Նրան Ռուսաստանի մայրաքաղաք էին հրավիրել մարտի 21-ին այն բանից հետո, երբ նախագահ Ջո Բայդենը հարցազրույցի ժամանակ դրականորեն էր արձագանքել այն հարցին, եթե Պուտինին համարու՞մ էր, արդյոք, մարդասպան: Ապրիլի 7-ին Ռուսաստանի արտգործնախարարությունը հայտարարել էր, որ Անտոնովի վերադարձը ԱՄՆ «առաջիկա օրերի խնդիր չէ»: Անտոնովը մարտից մինչ օրս գտնվում է Մոսկվայում:

Ռուսաստանը չունի կարողություն համարժեք կերպով արձագանքելու ԱՄՆ պետական պատժամիջոցներին, որոնք սահմանվել են պետական պարտքի նկատմամբ, բայց ԱՄՆ-ի այս պատժամիջոցներին դիմակայել Ռուսաստանի տնտեսությունը կարող է, ասել է արտգործնախարարը: 

Հինգշաբթի, ապրիլի 15-ին, ԱՄՆ նախագահ Ջո Բայդենը հրամանագիր է ստորագրել, որով ամերիկյան ֆինանսական հաստատություններին արգելվում է մասնակցել առաջնային շուկայում ռուսական ինքնիշխան պարտատոմսերի գնմանը: Այս հրահանգը անհրաժեշտության դեպքում ԱՄՆ կառավարությանը իրավունք է տալիս երկարաձգել Ռուսաստանի ազգային պարտքի նկատմամբ պատժամիջոցները: Մինչ այժմ Ռուսաստանի կառավարության պարտքի հետ կապված կար մեկ սահմանափակում. 2019-ի օգոստոսից ամերիկացի ներդրողները չէին կարող մասնակցել ինքնիշխան եվրապարտատոմսերի նախնական առաջարկներին:

ԱՄՆ ֆինանսների նախարարությունը նաև ընդգրկել էր վեց ռուսական տեխնոլոգիական ընկերությունների ցուցակում, որոնք, ըստ նրա, սատարում են Ռուսաստանի հետախուզական ծառայությունների կիբեր ծրագիրը, ներառյալ փորձագիտական խորհրդատվություն, ծրագրակազմի մշակում և վնասակար կիբերտարածության գործունեությունը դյուրացնելու համար տեխնիկական բազայի տրամադրում:

ԱՄՆ ֆինանսների նախարարությունը պատժամիջոցներ է սահմանել 32 ռուս իրավաբանական և ֆիզիկական անձանց նկատմամբ, որոնք, ըստ Վաշինգտոնի, փորձել են ազդել ԱՄՆ-ում 2020 թ. Նախագահական ընտրությունների վրա, ինչպես նաև իրականացրել են ապատեղեկատվության և միջամտության այլ գործողություններ ՝ Ռուսաստանի կառավարության հանձնարարությամբ:

ԱՄՆ-ը երկրից վտարելու է նաեւ Վաշինգտոնում գտնվող Ռուսաստանի դիվանագիտական առաքելության տասը անդամների: