Դոնբասում իրավիճակը սրվել է. տեղեկություններ կան մարտերի վերսկսման մասին

Դոնբասում իրավիճակը լարված է, որոշ տեղեկությունների համաձայն՝ վերսկսվել են մարտերը: Մասնավորապես Ria-ն գրում է, որ Միխայլովկա գյուղում մարտեր են սկսվել Ուկրաինայի զինված ուժերի և ինքնահռչակ Լուգանսկի Ժողովրդական Հանրապետության ժողովրդական միլիցիայի զինված ուժերի միջև: Այս մասին նաև Telegram-ի ալիքում հայտնել է միլիցիայի նախկին պաշտոնական ներկայացուցիչ Անդրեյ Մարոչկոն:

Նա տեղադրել է տեսանյութ, որում տարբեր զենքերից ինտենսիվ կրակոցներ են լսվում: Մարոչկոյի խոսքով՝ զինված ուժերը օգտագործում են փոքր զենքեր ու ականանետեր, իսկ գնդակոծման գոտում դպրոց կա:

«Տեղի բնակիչները գրում են, որ շատ փամփուշտներ դիպում են տների պատերին»,- գրել է նա:

Ըստ ինքնահռչակ հանրապետության իշխանությունների՝ վիրավորվել է մեկ աշխարհազորային: Միևնույն ժամանակ, Ժողովրդական միլիցիային հաջողվել է ճնշել Ուկրաինայի զինված ուժերի կրակակետերի վրա հարձակումը Մինսկի համաձայնագրերով չարգելված զենքի միջոցով:

Դոնբասում հակամարտությունը շարունակվում է արդեն յոթ տարի, որի ընթացքում զոհվել է արդեն շուրջ 13 հազար մարդ: Կարգավորման հարցը քննարկվում է Մինսկում շփման խմբի հանդիպումների ժամանակ: Կողմերը մի քանի փաստաթուղթ են ընդունել, որոնք ուղղված են հակամարտության կարգավորմանը, բայց կրակոցները շարունակվում են: 

Փետրվարից սկսած՝ իրավիճակը սկսել է վատթարանալ. Դոնբասի ժողովրդական զինված խմբավորման գումարտակի հրամանատարի վրա մահափորձ է կատարվել, ուկրաինական անվտանգության ուժերը ականանետերով կրակ են բացել Գորլովկայի և Դոնեցկի մատույցների ուղղությամբ, և մարտերը սրվել են:

Ինքնահռչակ հանրապետություններում կարծում են, որ լայնամասշտաբ հարձակողական գործողություններ են նախապատրաստվում Կիեւում՝ նոր ուժեր տեղակայելով շփման գծի երկայնքով: Ուկրաինայի մայրաքաղաքը մասամբ հաստատել է այս տեղեկությունը: Փետրվարի 22-ին Ուկրաինայի զինված ուժերի գերագույն գլխավոր հրամանատար Ռուսլան Խոմչակը հայտնել է, որ բանակը աշխատում է քաղաքային միջավայրում հարձակումների սցենարի վրա:

Վերջին օրերին սոցիալական ցանցերում ուկրաինական տարբեր շրջաններից տեսանյութեր են հրապարակվել, որոնցում տեսանելի են ռազմական տեխնիկա փոխադրող գնացքներ:

Մարտի 9-ին եռակողմ շփման խմբում Ուկրաինայի ներկայացուցիչ Սերգեյ Գարմաշը մեղադրել է Ռուսաստանին Դոնբասում «սադրանք» նախապատրաստելու մեջ՝ խաղաղապահներ տարածաշրջան բերելու համար: Այս մասին նա գրել է «Ֆեյսբուքի» իր էջում:

Դիվանագետը նշել է, որ Ֆրանսիան և Գերմանիան նախապատրաստում են որոշ «կլաստերների առաջարկներ», ըստ որոնց՝ Դոնբասում հնարավոր կլինի ստեղծել ճանապարհային քարտեզ՝ պատերազմը դադարեցնելու համար: Բայց Մոսկվան առաջ է մղում խաղաղապահներին հակամարտության գոտի բերելու գաղափարը:

Սադրանքների հրահրումն ու խաղաղապահների ներդրման նպատակը Դոնբասում նոր իրողություն ստեղծելն է, որը կդարձնի գերմանա-ֆրանսիական «կլաստերի վերաբերյալ առաջարկությունները» Ռուսաստանի համար ոչ եկամտաբեր և թույլ կտա բախվել հակամարտության աբխազական մոդելին»,- ասել է Գարմաշը:

Նրա խոսքով՝ խաղաղապահների ներդրումը Դոնբասը կդարձնի ռուսական ռազմակայան:

Միևնույն ժամանակ, Գարմաշը ասել է, որ պաշտպանության նախապատրաստական աշխատանքներն ընթանում են Դոնեցկում ու Լուգանսկում, որը հարկավոր կլինի, եթե Ուկրաինան անցնի «հակահարձակման»:

Դոնեցկի ղեկավար Դենիս Պուշիլինը ևս հայտարարել էր Ուկրաինայի զինված ուժերի նախապատրաստման մասին՝ Դոնբասում ռազմական գործողությունները վերսկսելու համար: Նա հայտարարել էր շփման գծում օտարերկրյա ռազմական հրահանգիչների ու հրամանատարների առկայության և դիվերսիոն խմբերի վարժանքների մասին: Բացի այդ՝ նա նշել է Ուկրաինայի զինված ուժերի կողմից նոր գնդակոծությունների մասին: Լուգանսկում հայտարարել են, որ լեհական և լիտվական զորքերը ժամանել են հակամարտության գոտի:

Գերագույն ռադայի պատգամավոր Ռենատ Կուզմինը նույնպես խոսել է Ղրիմում և Դոնբասում հնարավոր պատերազմին Ուկրաինայի նախապատրաստվելու մասին: Նա ուշադրություն է հրավիրել այն փաստի վրա, որ երկրում անընդհատ ռազմաշունչ կոչեր են հնչում, Գլխավոր շտաբը զորքեր է պատրաստում փողոցային մարտերի, իսկ Կիևի ներկայացուցիչները հրաժարվում են կատարել Մինսկի համաձայնագրերը:

Ռուսաստանի Դաշնության արտաքին գործերի փոխնախարար Անդրեյ Ռուդենկոն, մեկնաբանելով իրավիճակը, այսօր հայտարարել է, որ Ռուսաստանը պատրաստ է միջոցներ ձեռնարկել, որպեսզի Դոնբասում հակամարտությունը չվերադառնա թեժ փուլ:

«Մենք ուշադիր հետևում ենք իրավիճակին, և բոլոր միջոցները ձեռնարկվելու են՝ ռիսկերը նվազագույնի հասցնելու համար, այդ թվում՝ դիվանագիտական մակարդակում»,- ասել է նա Interfax-ին:

Նախօրեին էլ Ուկրաինայի նախագահի աշխատակազմի ղեկավար Անդրեյ Երմակը հայտնել էր, որ Կիևն ավարտին է հասցրել Դոնբասում իրավիճակի խաղաղ կարգավորման ծրագիրը, որն առաջարկել են Փարիզը և Բեռլինը: Ըստ նրա՝ նոր կոնկրետ ծրագիրը համապատասխանում է Մինսկի համաձայնագրերի ոգուն և միջազգային իրավունքի նորմերին: Նա նաև ավելացրել է, որ այժմ նախագիծը սպասում է Ռուսաստանի կողմից հաստատմանը:

Ի դեպ, այսօր այս տարվա մեջ առաջին անգամ Օդեսսայի նավահանգիստ է ժամանել ՆԱՏՕ-ի ռազմածովային ականազերծման գործողությունների խումբը՝ բաղկացած 4 նավերից: Խմբում ներառված են Թուրքիայի (2 նավ), Իսպանիայի և Ռումինիայի ականակիր, ուսումնական և ականազերծող նավերը:

Նավախումբը մտել էր Սև ծով փետրվարի 25-ին: Փետրվարի 27-ից մարտի 6-ը նավերը մասնակցում էին ՆԱՏՕ-ի Poseidon-21 միջազգային զորավարժություններին, այնուհետ ուղևորվել են Ուկրաինա:

Ռուսաստանի արտգործնախարարությունը բազմիցս նշել է, որ Սեւ ծովում տարածաշրջանից դուրս տերությունների նավերի ռազմական ներկայությունը չի նպաստում կայունության ամրապնդմանը: