Դպրոցը կարի ֆաբրիկա դարձնելու վտանգն անցել է. շենքը վերանորոգվել, բարեկարգվել ու վերազինվել է

Դպրոցների վերակոմպլեկտավորման գործընթացը, որը ձեռնարկվել էր 2017 թվականին՝ նախկին վարչապետ Կարեն Կարապետյանի հանձնարարությամբ, դարձել էր նաեւ Արթիկի N 4 դպրոցի գլխավոր մտահոգությունը:

Ինչպես այն ժամանակ նշվում էր, հանրակրթական ուսումնական հաստատությունների վերակոմպլեկտավորման նպատակը շենքային անմխիթար վիճակ ու թերբեռնվածության ունեցող դպրոցների օպտիմալացումն է, քանի որ դրանց հիմնանորոգման համար միլիոնավոր գումարներ են հարկավոր, ինչը պետությունը չի կարող հատկացնել:

Արթիկի N 5 դպրոցի հետ միավորման հեռահար ծրագրից բացի՝ Արթիկի 4-րդ դպրոցի տարածքում նախատեսվում էր տեղակայել «Սաստեքս» տեքստիլ արդյունաբերության ֆաբրիկան՝ շվեյցարահայ գործարար Վարդան Սրմաքեշի ու Վարագյան եղբայրների աջակցությամբ: Դպրոցի տարածքում հիմնադրվելիք կարի ֆաբրիկայում մոտ 400 աշխատատեղ պետք է ստեղծվեր Արթիկի ու հարակից գյուղերի բնակիչների համար: Իսկ թե ինչու էր որոշվել հենց դպրոցի տարածքն օգտագործել այդ նպատակի համար, նշվում էին դպրոցի թերբեռնվածությունն ու անբարեկարգ վիճակը:

Ի վերջո, սակայն, հուրախություն դպրոցի աշակերտների եւ աշխատակիցների, տեղի չի ունեցել ո՛չ մեկը եւ ո՛չ էլ մյուսը. ավելին, դպրոցը հիմնովին վերանորոգվել է, բարեկարգվել՝ համալրվելով նյութատեխնիկական անհրաժեշտ սարքավորումներով:

Արթիկի թիվ 4 հիմնական դպրոցի տնօրեն Նունե Գրիգորյանը մեզ հետ զրույցում նշեց, որ դպրոցը կարի ֆաբրիկա դարձնելու վտանգ այլեւս չի տեսնում. դա հիմա արդեն անիրատեսական է, քանի որ վերանորգված, լուսավոր, բարեկեցիկ դպրոցը 5-րդ դպրոցին միանալու ծրագիրն այլեւս մնացել է անցյալում:

«Դա աբսուրդի դաշտից կլինի պարզապես: Եթե նախկինում դպրոցների միավորվելը բացատրում կամ հիմնավորում էին մեր դպրոցի անբարեկարգությամբ, ապա այսօր ոչ մի պատճառաբանություն ընդունելի չի լինի. հիմա Հայ կրթական հիմնարկության շնորհիվ վերանորոգվել է գրեթե ամբողջ դպրոցի տանիքը, պատուհանները, դռները, դասասենյակները: Այսուհետ մեր երեխաները կսովորեն բարեկեցիկ պայմաններում, այսուհետ մենք էլ ո՛չ ջեռուցման եւ ո՛չ էլ սարքավորումների խնդիր չենք ունենա: Տաք, լուսավոր դասասենյակները եւ մոտ 12 իդեալական սանհանգույցները եւս ստեղծել են նպաստավոր պայմաններ: Վերանորոգվել են հատակը, մարզադահլիճը եւ միջոցառումների դահլիճը, վերականգնվել է նաեւ այն կորպուսի ջեռուցումը, որը չէր ջեռուցվում մինչ վերանորոգումը: Մեր դպրոցը Հայ Կրթական հիմնարկությունից նվեր է ստացել համակարգիչներ, գրատախտակներ, սեղան-աթոռներ, ուսուցչանոցի համար կահույք»,- ասաց տնօրենը:

Վերանորոգումից հետո աշակերտների թիվը 132-ից դարձել է ավելի քան 160: «Եվ դեռ ունենալու ենք աշակերտ-թվի աճ, որովհետեւ կան ծնողներ, որոնք ասում են, որ սեպտեմբերից տեղափոխելու են երեխաներին: Շենքից մի հատված վերանորոգվել է նախակրթարան ունենալու համար, հիմա նաեւ այդ հարցերով ենք զբաղվում»,- նշեց Նունե Գրիգորյանը:

Հարցին՝ թե ինչու դպրոցի շենքը կարի ֆաբրիկա դարձնել ցանկացողները հրաժարվեցին իրենց այդ մտքից՝ Նունե Գրիգորյանը պատասխանեց. «Մեր պայքարի արդյունքում դպրոցը չդարձավ կարի ֆաբրիկա: Եվ կոլեկտիվի միահամուռ ուժերի, եւ՛  ծնողական հանրույթի պայքարի շնորհիվ իրենք պարզապես չկարողացան: Հետո մեր դպրոցը գտնվում է քաղաքի կենտրոնում, ու կենտրոնում դպրոցը դարձնել կարի ֆաբրիկա, դա էլ է սխալ, որովհետեւ գործարաններն ընդհանրապես քաղաքի ծայրամասերում են լինում, ոչ թե քաղաքի կենտրոնում: Արթիկի 7-րդ դպրոցի շենքը դարձավ գործարան, բայց այդ գործարանը նպատակին չի էլ ծառայում (2017 թվականին Արթիկի N 7 ավագ դպրոցը վերակոմպլեկտավորվել է N 3 ավագ դպրոցի հետ, ազատված շենքը 20 տարի անհատույց օգտագործման իրավունքով օտարվել է «Չեխ-Արմ-Ինվեստ» ՍՊԸ-ին, որի 50 տոկոս բաժնեմասի սեփականատերը գործարար Սամվել Ալեքսանյանի դուստր Աստղիկ Ալեքսանյանն է - խմբ.)»:

«Նախկին լարվածությունը եւ անհանգստությունը, որ տիրում էր դպրոցում՝ կապված դպրոցի հետագա ճակատագրի անորոշության հետ, արդեն հաղթահարված է: Դպրոցում բարոյահոգեբանական մթնոլորտը իդեալական է. բարձր պատրաստվածությամբ ուսուցիչների եւ մեծ պատրաստակամությամբ աշակերտների հետ աշխատելը իսկական երջանկություն է»,- հավելեց տնօրենը:

Դպրոցի հետագա կարգավիճակի, մասնավորապես կարի ֆաբրիկա դարձնելու հնարավոր վտանգի, ինչպես նաեւ երբեմնի մտադրության փոփոխության պատճառների շուրջ փորձեցինք պարզաբանում ստանալ Արթիկ համայնքի ղեկավար Մխիթար Վարագյանից: Նա նշեց, որ մտադրության փոփոխությունների մասին ինքը տեղյակ չէ. ներդրողներն են ցանկացել դպրոցի տարածքում ֆաբրիկա ստեղծել, սակայն ժամանակին մտափոխվել են, իսկ թե ինչու՝ ավելի լավ կլինի ներդնողներից ճշտել:

«Ժամանակին Եվրոֆաբրիկայի հետ համատեղ Սրմաքեշն էր զբաղվում, ուզում էին ֆաբրիկա բացեին, հիմա չգիտեմ: Իսկ ինչ վերաբերում է տարածքի տրամադրմանը, տարածքը համայնքին չի պատկանում. եթե տրամադրի, ապա կառավարությունը պետք է տրամադրի»,- ասաց Վարագյանը:

Համայնքապետի խոսքով՝ ինքը առհասարակ շահագրգռված է, որ քաղաքում բոլոր ուղղություններն էլ հավասարապես զարգանան ու բարելավվեն. ե՛ւ բարեկարգ դպրոցներ լինեն, ե՛ւ աշխատատեղեր:

Ինչ վերաբերում է դպրոցը ֆաբրիկա դարձնելու հնարավոր վտանգին՝  համայնքապետը հավատացրեց, որ միանշանակ նման վտանգ այլեւս չկա:

Մարիամ Գեւորգյան