«Տետատետ»․ համերգի ժամանակ հանդիսատեսը երաժիշտների հետ կլինի բեմում, այնտեղ կուղեկցվի հատուկ ստեղծված հարթակով

Մարտի 2-ին Երեւանի Արամ Խաչատրյան համերգասրահում իր տեսակի մեջ բացառիկ համերգային երեկո է սպասվում․ երաժիշտները բեմահարթակը կիսելու են հանդիսատեսի հետ:

Ֆիլհարմոնիկ դահլիճում սպասվող կամերային երաժշտության համերգաշարը կոչվում է «Տետ ա տետ» (դեմ առ դեմ), այն հենց այդ ֆորմատով էլ անցկացվելու է. հանդիսատեսները նստելու են բեմահարթակում, երաժիշտներն էլ՝ անմիջապես նրանց դիմաց։

Երաժիշտ Շմավոն Գրիգորյանը, որը գաղափարի հեղինակներից է ու ընդգրկված է նախագծում (հանդես է գալիս որպես ֆագոտահար), «Հայկական ժամանակի» հետ զրույցում վստահեցրեց՝ այս ֆորմատը հանդիսատեսին հաստատ դուր կգա։

Մոտ 150-հանդիսատես է նախատեսվում։ Նրանց համար Խաչատրյան համերգասրահի հենց գլխավոր մուտքից հարթակ են ստեղծելու ուղիղ դեպի բեմ։ «Կամերային երաժշտությունը է՛լ ավելի հաճելի է ըմբոշխնել հենց կամերային մթնոլորտում։ Եվ հետո, այսպիսի համերգներն ընդունված են Եվրոպայի առաջադեմ համերգասրահներում։ Կամերային երաժշտություն կատարելն իր տեսակի մեջ յուրահատուկ մերձեցնող միջավայր է. չէ՞ որ այն կատարում են սակավաթիվ երաժիշտներ: Եվ շատ կարեւոր են փոխադարձ ներքին կապն ու սերը կատարվող ստեղծագործության նկատմամբ, ինչը է՛լ ավելի ազդեցիկ եւ հաճելի է դարձնում կատարումը»,- ասաց երաժիշտը։

Շմավոն Գրիգորյանի խոսքով՝ ցանկանում են մտերմիկ եւ ջերմ միջավայրում հյուրընկալել հանդիսատեսին, որպեսզի նրանք եւս այդ ամենի մասնակիցը լինեն՝ համերգը ունկնդրելով հենց բեմահարթակից։ Ինչ վերաբերում է համավարակին եւ դրանով պայմանավորված սահմանափակումներին, ապա երաժիշտն ընդգծեց՝ կամերային մթնոլորտում եւս խստապահանջ են այդ հարցում, հետեւելու են բոլոր կանոններին՝ ախտահանում, հանդիսատեսի պարտադիր դիմակների կրում ու 1,5 մետր հեռավորության պահպանում։

Հայաստանի ազգային ֆիլհարմոնիկ նվագախմբի գեղարվեստական ղեկավար եւ գլխավոր դիրիժոր Էդուարդ Թոփչյանն էլ, «Հայկական ժամանակի» հետ զրույցում խոսելով «Տետ ա տետ» նախագծի նկատմամբ իր մոտեցման մասին, ասաց․ «Ինձ համար միշտ ողջունելի է եղել նվագախմբի երաժիշտների՝ կամերային երաժշտությամբ հնարավորինս շատ զբաղվելը: Աշխարհի լավագույն նվագախմբերի երաժիշտների լավագույն նվագը թրծվում է նաեւ դրա արդյունքում, երբ բոլոր երաժիշտները սկսում են նվագել միասին։ Գալիք՝ Վիվալդիի համերգի այս ձեւաչափը, որը մտածել են մեր երաժիշտները՝ նվագախմբի երաժիշտ Շմավոն Գրիգորյանի հետ միասին, անչափ գեղեցիկ է»:

Մաեստրո Թոփչյանի համոզմամբ՝ կամերային երաժշտության կատարման ժամանակ երաժշտի համար հնարավոր է լինում ինքնուրույն մտածել՝ առանց դիրիժորի միջամտության: Այս պարագայում նրանք զարգանում են թե՛ իրենց նվագով եւ թե՛ որպես երաժիշտ: Իսկ հետագայում արդեն, երբ նվագախմբում են նվագում, միմյանց լսելով ու շարունակելով են նվագում:

«Ես ուրախ եմ եւ միայն ողջունել եմ, որ համաճարակի պայմաններում, երբ ամեն ինչ փակ էր, մեր երաժիշտները ամեն հինգշաբթի կարողացան կամերային առցանց համերգներ ունենալ: Դա արդեն ավանդույթ է դարձել եւ շարունակական բնույթ է կրում»,- հավելեց Թոփչյանը: Նա նաեւ նշեց, որ մի անգամ նմանատիպ նախագիծ արդեն եղել է դեկտեմբերին՝ բեթհովենյան երեկոն, երբ բեմի հետնամասում նստած էր ունկնդիրը: Երաժիշտները մեջքով դեպի դահլիճն էին, իսկ դեմքով՝ դեպի ունկնդիրը (մոտ 150 հոգի): «Ինքս որպես ունկնդիր էի ներկա այդ համերգին: Այն հետաքրքիր էր ու դուր եկավ ինձ: Եվ այս անգամ արդեն, ձեւաչափի ընտրության հարցում ինքս էլ կողմ էի այս տարբերակին, ու կոչվեց այն «Տետ-ա-տետ»»,- ասաց նա:

Թոփչյանի վստահեցմամբ՝ իրենք ցանկություն ունեն շարունակել այս նոր ձեւաչափը՝ դարձնելով այն համերգաշարի կանոնավոր համերգների մի մասը՝ նախատեսված 150 ունկնդրի համար: «Սա կամերային երաժշտության սիրահարների համար մի յուրօրինակ նվեր կարող է լինել՝ կիսել բեմը երաժիշտների եւ երաժշտության կատարմանը այսքան մոտ լինել»,- եզրափակեց նա։

Հ.Գ. «Տետ-ա-տետ» համերգի տոմսերի արժեքը սկսվում է 3000 դրամից՝ հասնելով 5000-ի։  Գումարի չափը կախված է հանդիսատեսի նախընտրած տեղից․ երաժիշտներին դեմ-դիմաց նստելու համար պետք է վճարել 5000 դրամ, իսկ աջ եւ ձախ կողմերը նստելու համար՝ 3000։