Որքան շուտ լինեն ՏԻՄ ընտրությունները, այնքան ավելի արագ կզարգանա քաղաքը. Ստեփանավանի քաղաքապետի պաշտոնակատար

Լոռու մարզի Ստեփանավան քաղաքում ընթացիկ տարում պետություն-համայնք համաֆինանսավորմամբ 2 ծրագիր է իրականացվել՝ մայթերի բարեկարգում ու բազմաբնակարան մի քանի շենքերի էներգախնայողությանն ուղղված ջերմամեկուսացման աշխատանքներ: Համատեղ ծրագրերի ընդհանուր արժեքը կազմել է մոտ 73 մլն դրամ, մինչդեռ, ինչպես քաղաքապետի պաշտոնակատարն է ասում, կարելի էր ավելին անել: Տարվա ընթացքում նախ հրաժարական տվեց համայնքի ավագանին, հետո արդեն մահացավ Ստեփանավանի քաղաքապետ Միքայել Ղարաքեշիշյանը: Ավագանու բացակայությամբ պայմանավորված՝ բազմաթիվ ծրագրեր հնարավոր չէ կյանքի կոչել մինչեւ նոր ընտրություններ: Անցնող տարում արվածի, համայնքում առկա խնդիրների ու դրանց լուծմանն ուղղված քայլերի շուրջ զրուցել ենք քաղաքապետի պաշտոնակատար Արմեն Գրիգորյանի հետ:

- Պարոն Գրիգորյան, տարվա ընթացքում սուբվենցիոն ծրագրով ի՞նչ աշխատանքներ իրականացվեցին Ստեփանավանում:

- Համայնքում այս տարի սուբվենցիոն 2 ծրագիր է իրականացվել, մոտ՝ 73 մլն դրամ արժողությամբ (պետության կողմից՝ 43, համայնքի կողմից՝ 32 մլն դրամ): Կատարվել են 4 փողոցների մայթերի կապիտալ նորոգումներ: Մեկ այլ ծրագրով համայնքի բազմաբնակարան 3 շենքերի ջերմամեկուսացման ծրագիր է իրականացվել, որի ընդհանուր արժեքը 113 մլն դրամ էր, բայց դա արվել է եռակողմ՝ պետություն, համայնք եւ ՄԱԿ համագործակցությամբ: Եղանակային պայմանների պատճառով աշխատանքները դադարեցվել ու տեղափոխվել են հաջորդ տարի: Մայթերի վերանորոգման աշխատանքներն ամբողջությամբ ավարտված են: Որոշակի թերություններ նկատել ենք, բայց աշխատանքները երաշխիքի մեջ են, հետեւաբար շինարարը պարտավորվել է այն վերացնել:

- Տարվա ընթացքում ի՞նչ լուրջ փոփոխություն է տեղի ունեցել Ստեփանավանում:

- Որպես լուրջ աշխատանք կարելի է միայն մայթերի բարեկարգումը նշել: Դրանից բացի՝ բացարձակ ոչինչ չի արվել:

- Համայնքի ավագանին ամիսներ առաջ հրաժարական տվեց, Դուք էլ ներկայումս ժամանակավոր եք նշանակված քաղաքապետի պաշտոնում: Որքանո՞վ են այս գործոնները խանգարում քաղաքի խնդիրների լուծմանն ու կառավարմանը:

- Ճիշտ եք, երկուսն էլ խանգարող հանգամանքներ են: Ավագանի չլինելու պատճառով շատ հարցերում կաղում ենք, իսկ իմ՝ քաղաքապետի պաշտոնակատար լինելը եւս լուրջ խոչընդոտների է բերում: Որքան շուտ լինեն ՏԻՄ ընտրությունները, այնքան ավելի արագ կզարգանա քաղաքը: Միակ լուրջ բանը, որ կարողացանք անել, տարածքային կառավարման եւ ենթակառուցվածքների նախարարության ու մարզպետարանի թույլտվությամբ կարողացանք ամանորյա ծախսերի համար նախատեսված գումարները հատկացնել Արցախյան վերջին պատերազմում զոհվածների, վիրավոր եւ անհետ կորածների, ինչպես նաեւ Ստեփանավանում Արցախից ժամանակավոր բնակեցված ընտանիքներին միանվագ աջակցություն ցուցաբերելուն:

- Ինչպիսի՞ն էր ֆինասական տարին Ստեփանավանի քաղաքապետարանում: Կլինե՞ն արդյոք աշխատավարձերի պարտքեր:

- Հավաքագրումները 90 տոկոսից պակաս չեն լինի: Տարին կփակենք առանց պարտքերի:

- Որո՞նք են Ձեզ համար քաղաքի հրատապ լուծում պահանջող խնդիրները, որոնց լուծումը օրակարգային է լինելու հաջորդ տարվա համար:

- Մեր առաջնային խնդիրը «Աշոտաբերդ» կոչվող թաղամասն է (Թաղամասը երկրաշարժից հետո կառուցվել է որպես ժամանակավոր կացարան, սակայն մինչ օրս բնակիչներն ապրում են այդտեղ-հեղ), պետք է ճանապարհներ գտնենք թաղամասում նոր շենքեր կառուցելու համար: Որոշակի աշխատանքներ սկսվեցին տարվել, հետո խնդիրներ առաջացան, ու գործը կանգնեց կարծես թե: Պետք է զրոյից նոր թաղամաս կառուցել, որը միայն համայնքի, անգամ պետական աջակցությամբ հնարավոր չի լինի կյանքի կոչել, եթե չլինի անհատ բարերար կամ միջազգային կազմակերպություն: Խնդիրներ ունենք նաեւ Ստեփանավան խոշորացված համայնքի կազմի մեջ մտած գյուղական բնակավայրերում՝ կապված խմելու ջրի մատակարարման հետ: Գյուղերի ջրերը բնական աղբյուրից են գալիս, ու շատ հաճախ որակական շեղումներ են արձանագրվում: Ինձ համար առաջնահերթ խնդիր է նաեւ Ստեփանավանը զբոսաշրջային կենտրոն դարձնելն ու տուրիզմին խթանելը:

- Նշեցիք, որ սուբվենցիոն 2 ծրագիր է արվել: Հաջորդ տարի ծրագրերի թիվը կավելանա՞:

- Միանշանակ ավելացնելու ենք: Համայնքի հնարավորությունները թույլ կտային միանշանակ բյուջեի գոնե 17-18 տոկոսը հատկացնել ծրագրերին: Պետք է նշեմ նաեւ, որ Ստեփանավանի բյուջեն սխալ ու անիրատեսական է կազմվել: Բյուջեն կազմվել է գանձվող գումարի չափով, որ իբր կարողանան բարձր կատարողական ցույց տալ, բայց ես նման բանի կողմնակից չեմ: Բոլորը գալու են օրենքի դաշտ, ու եկամուտները արտացոլվելու են բյուջեի մեջ:

- Մեր նախորդ զրույցում ասել էիք, որ ընտրություններին առաջադրվելու եք։ Որոշե՞լ եք, թե որ կուսակցությունով կառաջադրվեք:

- Միանշանակ կմասնակցեմ ընտրապայքարին: Քանի որ ինձ պաշտոնակատար նշանակել է վարչապետը, եւ ես վստահում եմ վարչապետին ու համակրում, հետեւաբար առաջնահերթությունը հենց վարչապետի թիմին կլինի: Ես իշխանության կողքին եմ:

- Ինչ գնահատական կտաք ներքաղաքական ներկայիս իրավիճակին:

- Ես բացարձակ չեմ ընդունում հետպատերազմական այս շրջանում նման հրահրումները: Պետության առաջ այսօր ավելի լուրջ ու ծանր խնդիրներ կան: Ես՝ որպես մարդ, կցանկանայի, որ որոշ ժամանակ անցներ, համերաշխության կոչեր լինեին, հետո նոր խոսեին վաղաժամկետ ընտրությունների ու մյուս բաների մասին:

Հ․Գ․ Ստեփանավանի ավագանու 14 անդամներից 7-ը հրաժարականի դիմում էին ներկայացրել դեռ օգոստոսին։ Նոյեմբերին՝ քաղաքապետ Միքայել Ղարաքեշիշյանի մահից հետո, վարչապետ Նիկոլ Փաշինյանի որոշմամբ՝ Արմեն Գրիգոյանը նշանակվել է Ստեփանավան համայնքի ղեկավարի պաշտոնակատար։ ՏԻՄ նոր ընտրությունները, նախնական տեղեկություններով, կկայանան մարտին։