Գյումրեցի զինվորականի ընտանիքում զույգ որդի է ծնվել՝ Մոնթե ու Մհեր

Լույսը Գյումրում այսօր բարի է բացվել: Զինվորական Առաքելյանների ընտանիքում զույգ որդի է լույս աշխարհ եկել: Երեխաներից մեկին՝ Մոնթե, մյուսին Մհեր են անվանակոչել:

Որ երեխաներից մեկի անունը Մոնթե է լինելու, հստակ ու վաղուց էին որոշել: Մհերի ծնունդն է անակնկալ եղել ծնողների համար:

«Գիտեինք, որ մեկ տղա, մեկ աղջիկ ենք ունենալու: Սկզբում ծնվեց Մոնթեն, ու անսպասելիորեն աղջկա փոխարեն ծնվեց երկրորդ տղաս: Էդ պահին շատ եկար մտածելու ժամանակ էլ չկար, նաև զարմացել էինք, արագ որոշեցինք, անունը Մհեր դրեցինք»,- մեզ հետ զրույցում պատմեց երեխաների մայրը՝ Հասմիկը:

Մոնթեն լույս աշխարհ  է եկել 3 կգ, Մհերը՝ 2կգ 400 գրամ քաշով: «Երկուսն էլ առողջ, կենսունակ բալիկներ են»,- ասում է բժիշկը:

Նորածիների խնամքով զբաղված տատիկը հասցրել է նկատել՝ Մոնթեն ավելի աշխույժ է:

«Մոնթեն շատ ակտիվ է, ժիր է, հեչ չի քնի, անընդհատ զարթուն է, Մհերն էլ միշտ քնած է, հանգիստ է, խելոք»,- ասում է տիկին Գայանեն:

Երկվորյակների հորեղբայրն այս պահին Արցախի դիրքերում է: Արդեն իմացել է զարմիկների մասին, անունները հարցրել, նաև հասցրել է շնորհավորել Հասմիկին:

Երկվորյակներին տանը մեծ եղբայրներն են անհամբեր սպասում՝ 10 և 11 տարեկան Հայկն ու Աբրահամը:

Երկվորյակները ծնվել են Գյումրու ծննդատանը: Այստեղ այսօր մեծ ոգևորությամբ էին աշխատում բժիշկները: Մինչ կհասցնեին մատյանը թերթել ու երեկվանից այսօրն ընկած ժամանակահատվածում լույս աշխարհ եկած նորածինների թիվն ասել՝ ծնվեց 7-րդ տղան:

Օր ու կեսում 7 նորածին, 7-ն էլ՝ տղա, 7-ն էլ՝ ապագա զինվոր,- ասում է մանկաբարձ-գինեկոլոգ Լիլիկ Գևորգյանը:

Այսօրվա երկվորյակները 2020-ի երկրորդ զույգն են: Առաջին զույգը լույս աշխարհ է եկել առաջին եռամսյակում, էլի տղաներ են ծնվել: 2018-ին 6 զույգ է լույս աշխարհ եկել, 2019-ին 4 երկվորյակի ծնունդ են ընդունել:

Ընդհանուր առմամբ տարվա մինչ այս ժամանակահատվածը Գյումրու ծննդատանը 260 նորածին է լույս աշխարհ եկել: Գերակշիռ են տղաները: Մասնագետն ասում  է՝ բոլորն էլ՝ առողջ, բոլորն էլ՝ կենսունակ: Նաև ուրախությամբ ընդգծում է՝ կանխածինների ցածր թիվը պահպանվում է:

Մանկաբարձ-գինեկոլոգը նաև հուզված է, աշխատում է, սակայն աչքն անընդհատ հեռախոսին է, սահմանից լուրերի է սպասում, վայրկյանը մեկ թարմացնում է պաշտոնական էջերն ու սոցցանցի իր տիրույթը:

«Մեզ, մեր ազգին գիտե՞ք՝ ինչն է պահում այսքան ամուր և հարատև»,- հուզված դիմում է մեզ ու շարունակում՝ մեր էմոցիոնալ լինելը:

«Մի գերմանացի ծանոթ ունենք, ասում է՝ արտասովոր ազգ եք: Ձեր երեխաների վրա էդքան դողում եք, էդպես յուրահատուկ պահում ու առանց վայրկյան անգամ մտածելու, առանց տատանվելու՝ նվիրում հայրենիքին: Ոչ մի ուրիշ ազգի մոտ չկա նման բան»,- պատմում է տիկին Լիլիկը:

Առավոտյան բժիշկը հուզվելու, նաև հպարտանալու այլ առիթ էլ է ունեցել: «Երեկ մի տղա երկրորդ անգամ հայր դարձավ, երկրորդ որդին ունեցավ: Շատ էր ուրախացել: Ասաց՝ էնքան ուրախ եմ, որ ծնունդներ են լինում, բայց որ տղա են ծնվում, ավելի եմ ուրախանում, ախր էս օրերին շատ կորուստներ ունեցանք: Էդ խոսքերն ամբողջ գիշեր ականջներիս մեջ էր, ինքն էլ՝ աչքիս առաջ՝ ջահել, սիրուն, զինվորական շորերով»,- պատմեց Գևորգյանն ու ավելացրեց՝ առավոտ իմացա, որ արդեն սահման է մեկնել: