Կինոյի միջոցով հանրահռչակել Հայաստանի Հանրապետությունը. քննարկվեց կինեմատոգրաֆիայի ոլորտին առնչվող օրենքների նախագծերը

Խորհրդարանը այսօր առաջին ընթերցմամբ ընդունեց «Կինեմատոգրաֆիայի» և 3 հարակից այլ օրենքներում փոփոխություններ կատարելու մասին օրենքների նախագիծը:

Նախագծի համահեղինակ  և հիմնական զեկուցող, «Լուսավոր Հայաստան» խմբակցության պատգամավոր Աննա Կոստանյանը ընդգծեց՝ Հայաստանի Հանրապետությունում բացակայում է կինեմատոգրաֆիայի ոլորտը կարգավորող իրավական ակտ, որի արդյունքում մի շարք կարեւոր հարաբերություններ օրենսդրական կարգավորում չեն ստացել: «Առկա կարգավորումները չեն ապահովում եզրույթների օգտագործման միասնականությունը»:

Աննա Կոստանյանը թվարկեց ոլորտում առկա խնդիրները, որոնք առաջարկվող նախագծով կկարգավորվեն: «Կարգավորված չեն ֆիլմարտարդրության, ֆիլմերի վարձույթի, միջազգային կինոփառատոններին մասնակցելու պետական ֆինանսավորման, պետական աջակցության այլ ձևերը: Որևիցե կերպ չի խրախուսվում օտարերկրյա ֆիլմերի նկարահանումը  ՀՀ տարածքում, կինոթատրոններում և հեռուստատեսության ֆիլմերի հրապարակային ցուցադրումը իրականացվում է առանց տարիքային սահմանափակումների մասին նշում անելու, ինչը կարող է բացասական անդրադառնալ բարոյական նորմերի և երեխաների իրավուքների պաշտպանության վրա»:

Նախագծի համահեղինակը նաև նշեց՝ առաջարկ է անելու միավորել Հայաստանում գոյություն ունեցող 3 կինոկառույցները՝դարձնելով այն կինեմատոգրաֆիայի ազգային մարմին: «Առաջարկելու եմ, որպեսզի Հայաստանում գոյություն ունեցող 3 կինոկառույցները՝ «Ազգային կինոկենտրոնը», «Հայք» փաստավավերագրական ֆիլմերի կինոստուդիան և «Հայ ֆիլմ» կինոստուդիան կառավարության որոշմամբ միավորվեն, դառնան այն ազգային մարմինը, որի մասին խոսում ենք տվյալ օրեսնդրական կարգավորման մեջ»: Ի դեպ, այս օրենքով կանոնակարգվելու է նաև կինեմատոգրաֆիայի ազգային մարմնի լիազորությունները:

Ըստ պատգամավորի՝ օրենքով առաջարկվող պետական աջակցության նպատակը ֆիլմերի միջոցով Հայաստանի Հանրապետությունը հանրահռչակելն է:

«Իմ քայլը» խմբակցության պատգամավոր Արտակ Մանուկյանը, սակայն, մտահոգություն հայտնեց նախագծով սահմանվող հարկային արտոնությունների վերաբերյալ: «Ավելացված արժեքի հարկի արտոնությունների մեխանիզմի հետ կապված՝ ես ծանոթ եմ պետական ֆինանսների կառավարաման ռազմավարությանը, այնտեղ արտոնություններից հնարավորինս զերծ ենք մնալու և դա ամրագրված է: Դուք օրենք եք բերել, որով արտոնությունները խորացնում եք»:

«Իմ քայլը» խմբակցության պատգամավոր, նախագծի համահեղինակ, դերասան Արթուր Մանուկյանն էլ, անդրադառնալով ֆինանսական խնդիրների վերաբերյալ բարձրաձայնվող հարցերին, նշեց՝ անհնար է արվեստը  ֆինանսական տեսանկյունից դիտարկել: «Շատ «վախվորած» օրինագիծ ենք գրել ավելացված արժեքի հարկերի հետ կապված:Արվեստը անհնարին է ֆինանսական տեսակետից նայել: Մալևիչի «Սև քառակուսի» կտավի  ինքնարժեքը 70 ցենտ արժի, թե մեկ դոլար 70 ցենտ, մի կտավ՝ վրան սև ներկ: Իսկ աուկցիոն՝ այն մի քանի տասնյակ դոլար արժի: Այստեղ չափելի չի, ֆինանսիստները և տնտեսագետները չեն կարող իրենց սովորական չափումներով չափել, թե այսքան փող եթե դնեն և ավելացված արժեքի հարկ չվերցնենք կամ արտոնություններ տա ֆիլմերին կամ ցանկացած արվեստի ոլորտին: Դուք չեք կարող հաշվել, դա անհնարին է: Ձեր չափումները ես չեմ ընդունում»:

Նախագծի շուրջ իր կարծիքը ներկայացրեց նաև գործադիրի ներկայացուցիչը: Կրթության, գիտության, մշակույթի և սպորտի նախարարի տեղակալ Արա Խզմալյանը նշեց՝ տվել են առաջարկությունների և առարկությունների մեծ փաթեթ՝ հորդորելով արվեստի առանձին ճյուղերի վերաբերյալ օրենքների ընդունման հարցում ավելի զգուշավոր լինել:  «Երբ մենք քննարկում ենք հարկային արտոնություններ տրամադրելու հարցը, դրա համար մենք ունենք Հարկային օրենսգիրք, երբ խոսում ենք մաքսային իրավակարգավորումների մասին, մենք ունենք Մաքսային կարգավորումների մասին օրենսգիրք: Եկեք գործող օրենքները կատարելագործենք, շտկենք բոլոր այն բացերը, որոնք խոչընդոտում են ոլորտի զարգացմանը, այնուհետև քննարկենք նպատակահարմարությունը առանձին նոր օրենք ունենալու»:

Աժ Կրթության, գիտության, մշակույթի, սպորտի, սփյուռքի, երիտասարդության հարցերի մշտական հանձնաժողովի նախագահ, օրենքի համահեղինակ Մխիթար Հայրապետյանն էլ նշեց՝ կինո երևույթին այլ տեսնակյունից պիտի մոտենալ, կարևորել կրթական ռազմավարության կոնտեքստում և միայն փողի ու հարկահավաքության մասին չմտածել:  «Ընդհանրապես ուզում եմ որևէ մեկը կինոն չթերագնահատի, դրա ազդեցությունը չնսեմացվի, որովհետև մենք հաճախ խոսում ենք ցկյանս կրթության մասին, այն ամբողջովին, լիուլի տեղավորվում է այդ գաղափարախոսության մեջ»,-վստահեցրեց պատգամավորը: