Առարկայական չափորոշիչների եւ ծրագրերի նախագծի քննադատությունների կողքին սակավաթիվ լավ կարծիքներ կան

Արդեն քանի օր է՝ սոցցանցերում ակտիվորեն քննարկվում է ՀՀ կրթության, գիտության, մշակույթի եւ սպորտի նախարարության կողմից հանրային քննարկման ներկայացված առարկայական չափորոշիչների եւ ծրագրերի նախագիծը։

Թեեւ չափորոշիչը քննադատող մեկնաբանությունները գերակշռում են, կան նաեւ սակավաթիվ դրական կարծիքներ։

Ազգային ժողովի «Իմ քայլը» խմբակցության պատգամավոր Վահագն Թեւոսյանը ֆեյսբուքյան իր էջում գրառում է կատարել՝ նշելով, որ քննարկումներում գրեթե ամեն մեկս մեր այս պահի ճաշակն ենք թելադրում։ Իր կարծիքով՝ Հայաստանում հայապահպանության խնդիր չկա այլեւս, կա մտքի ու մտածողության զարգացման խնդիր։ «Ամենակարեւոր բանը, որ մի մատ երեխու մեջ պետք է հայաստանյան դպրոցում զարգացնել, երեւակայությունն է: Մնացածը նոր տեխնոլոգիաներով, կյանքով, ընտանիքներով, սոցիալիզացիայով, համայնքային մակույթով գալիս է անխուսափելի»։

Ավելի վաղ նաեւ նշել էր, որ բազմաթիվ լավ գրքեր են գրվել վերջին տասնամյակներին, մեծ է բանական մարդու սոցիալական կարծրատիպերի փոփոխությունը, ամուր ու ընդգրկուն են տրանսամենինչյան կոմունիկացիաները։ «Պետք է լուրջ վերանայենք մեր երեխաների համար ցանկալի գրականության մասին մեր պատկերացումները»։

Թարգմանիչ, կինոգետ Զավեն Բոյաջյանն ավելի կարճ է անդրադարձել նախագծին ու քննարկումներին։

«Արմեն Օհանյան հայաստանցու նման տաղանդավոր ու ազատախոհ հեղինակի հավանական ներկայությունը գրականության դպրոցական ծրագրում անչափելի կսկիծով տանողներ (տեսակ-տեսակ նավթալինապաշտներ, ֆեյսբուքյան իմաստակներ, գրականամերձ կանայք եւ այլք), մի քիչ կամաց ճողփեք կեղծ բարեպաշտության խոր ջրերում՝ կխեղդվեք»։

Նշենք, որ շատերն այս օրերին դժգոհում էին, որ դպրոցական առարկայական ծրագրում կարող են տեղ գտնել, օրինակ, ժամանակակից արձակագիր Արմեն Օհանյանի ստեղծագործությունները։ 

Գրականագետ, «Անտարես» հրատարակչության գլխավոր խմբագիր Արքմենիկ Նիկողոսյանի կարծիքով՝ երիտասարդ գրողի պինդ գիր ու ապագայի լուսավոր հեռանկար պա­րա­գր­կող մի պատմվածքն ավելին արժե, քան ուզածդ դասականի հանկարծ հայտ­նա­բեր­ված միջին մակարդակի անտիպների մի հատորը: Ավելի ուշ նա եւս մեկ գրառմամբ պարզաբանել էր, որ իր հրապարակումը չի նշանակում, որ ամեն մի երիտասարդ գրողի գիր պինդ է ու ապագայի լուսավոր հեռանկար պարագրկող, եւ որ ուզածդ դասականի հանկարծ հայտնաբերված անտիպների հատորը միջին մակարդակի է։ Նիկողոսյանը որոշ ժամանակ անց եւս մեկ գրառում էր արել՝ նշելով, որ ամեն դեպքում գրականության նոր չափորոշիչների՝ այս տեսքով շրջանառության մեջ դնելուն, դեմ է։

Նախագծի մասին ավելի մանրամասն ԿԳՄՍ փոխնախարար Ժաննա Անդրեասյանն էր գրել: Նրա խոսքով՝ չափորոշիչների մասին հերթական անհեթեթությունը հասցրել են տարածել։ «Պարզվում է՝ ամոթ է եւ խայտառակություն, որ վեցից տասը տարեկան երեխան մարմնի մասերը իմանա, քանի որ սա, իհարկե, կհանգեցնի վաղ սեռականացման եւ այլասերման։ Կներեք իհարկե, վաղ սեռականացման ավելի շուտ կհանգեցնեն նման այսպես կոչված մասնագիտական վերլուծությունները, որոնք մարմնի հետ կապված ցանկացած գիտելիք ու հմտություն ընկալում են միայն սեռականության կոնտեքստում»։

Նա հավելել էր, որ «Ես եւ շրջակա աշխարհը» առարկայի 2012 թվականի չափորոշիչով արդեն իսկ գրված է եղել, որ երեխան պետք է կարողանա ներկայանալ, նկարագրել իր արտաքինը, զանազանի մարդկանց միջեւ գոյություն ունեցող տարիքային, սեռային տարբերությունները: Կարողանա ցույց տալ մարդու օրգանները։ Փոխնախարարը պատասխանել էր կենսաբանության առարկայի՝ առողջ ապրելակերպի թեմաների վերաբերյալ քննադատություններին՝ նշելով, որ «Առողջ ապրելակերպ» դասընթացը դպրոցներում արդեն քանի տարի է՝ դասավանդվում է, որի նպատակն է սովորողների մեջ ձեւավորել սեփական եւ այլոց առողջությունը որպես կարեւորագույն արժեք գնահատելու որակ եւ անվտանգ վարքագիծ: Դասընթացում ներառված են վերարտադրողական առողջության եւ սեռական դաստիարակության մասին թեմաներ։

Երեկ տեղեկացրել էինք, թե ինչ քննադատությունների է արժանացել նախագիծը, իսկ որպես պատասխան ԿԳՄՍՆ-ն առայժմ հիշեցնում է, որ ներկայացվածը դեռեւս նախագիծ է, եւ մասնագետներին կոչ անում ներկայացնել առաջարկներ։