Մեր կրպակի պատուհանները ջարդելուց հետո հետնամասում փոքրիկ տնակ կառուցեցին. քաղաքացին զրկվել է հացի միակ աղբյուրից

Երեւան քաղաքի բնակիչ Լյուդմիլա Բդեյանը դիմել է «Հայկական ժամանակ»-ի խմբագրություն՝ հայտնելով, որ Երեւանի քաղաքապետարանը թույլ չի տալիս տնօրինել ժամանակին իրեն տրամադրված փոքրիկ տարածքը, որն ընտանիքի միակ հացի աղբյուրն է:

«2019 թվականի հուլիս ամսից դիմում եմ Երեւանի քաղաքապետարանին՝ քսան տարուց ավելի իմ օգտագործած հողամասի սեփականության իրավունքը ձեռք բերելու համար, սակայն մինչ օրս որեւէ պատասխան չեմ ստացել»,- նշեց նա: Բդեյանի ընտանիքը գտնվում է սոցիալապես ոչ այնքան բարվոք դրության մեջ: Արդեն 20 տարի է՝ ապրում են վարձակալական հիմունքներով, ամուսինն էլ ունի հիվանդություններ:

Խնդրո առարկա փոքրիկ՝ 24 քմ առեւտրի կրպակը Լյուդմիլա Բդեյանը ձեռք է բերել 2000 թվականին Երեւան քաղաքի Մարգարյան եւ Բաշինջաղյան փողոցների հատման հատվածում:

Նրա խոսքով՝ տարածքին տիրապետել է բարեխղճորեն՝ որպես սեփական գույքի: Այդ մասին տեղյակ են եղել բոլոր հարեւանները, թաղապետարանի եւ ոստիկանության աշխատակիցները: Աջափնյակի թաղապետարանը, քննարկելով նրա դիմումը կրպակի շահագործման ժամկետը երկարաձգելու վերաբերյալ, 2004 թվականին որոշել է վարձակալության ժամկետը երկարաձգել մինչեւ 2007 թվականի փետրվար ամիսը: «Այդ որոշման համաձայն՝ նախատեսված է եղել Երեւան քաղաքի Մարգարյան եւ Բաշինջաղյան փողոցների հատման մասում ինձ վարձակալությամբ տրամադրել հողամաս»,- պատմեց նա:

2000 թվականից Լյուդմիլան կրպակի սպասարկման հատվածում կատարել է շինարարական աշխատանքներ. ամուսնու՝ Ռուբեն Շահինյանի հետ միասին կառուցել քարե շինություն, կնքել կոմունալ ծառայությունների պայմանագրեր՝ կատարելով համապատասխան վճարումները: Նրա խոսքով՝ առեւտրի կրպակի ձեռք բերման պահից պարտաճանաչ վճարել է տարածքի վարձավճարները, գրանցվել հարկային դաշտում, ձեռք բերել անհատ ձեռներեցի վկայական եւ սկսել գործունեություն ծավալել մինչեւ 2018 թվականի սկիզբը: Երեւանի քաղաքապետին 2018 թվականին դիմում են ներկայացրել ինքնակամ կառույցը եւ հողամասը օրինականացնելու վերաբերյալ:

Սակայն 2018 թվականի ամռանը իրենց համար անհայտ պատճառներով եւ անհայտ անձինք կոտրել են շինության պատուհանները: Այս պահին էլ շինության պատերը կան, իսկ պատուհանները՝ ոչ: Մեր հարցին, թե ինչո՞ւ չեն դիմել իրավապահ մարմիններին, Լյուդմիլա Բդեյանը պատասխանեց. «Այդ ընթացքը համընկավ թավշյա հեղափոխության հետ, ամեն ինչ խառն էր, չկողմնորոշվեցինք՝ ինչ անել»:

Հատկանշական է, որ պատուհանները կոտրելուց հետո՝ Երեւանի քաղաքապետի ընտրություններից մի քանի օր առաջ, նախկին քաղաքապետ Տարոն Մարգարյանի խորհրդական Հրաչ Մուրադյանից ստացել է գրություն այն մասին, որ նշված հասցեում շինություն առկա չէ, եւ բարձրացված հարցը Կառավարության համապատասխան որոշման շրջանակներում քննարկման ենթակա չէ:

«Պատուհանները ջարդելուց հետո հենց մեր կրպակի հետնամասում շատ արագ կերպով անծանոթ մարդիկ օտարազգի ճարտարապետական լուծումներով կառուցեցին ինչ-որ փոքրիկ տնակ: Երեւանի քաղաքապետի ընտրություններից մի քանի օր առաջ քաղաքապետի խորհրդական Հրաչ Մուրադյանը, անտեսելով վերը նշված տնակը, մերժեց մեր խնդրանքը»,- պատմեց Լյուդմիլա Բդեյանը: Հարեւանների խոսքով՝ կանաչավուն այդ երկհարկանի տունը պատկանում է Աջափնյակ համայնքի ճանաչված բնակիչներից մեկին՝ «Կարգին շինանյութի» կամ «Ջերմուկի Նորո» մականուններով հայտնի գործարարին կամ նրա մերձավորներին:

Երեւանի քաղաքապետարանից Լյուդմիլա Բդեյանի բազմաթիվ դիմում նամակները մերժել են՝ հայտնելով՝ Երեւան քաղաքում հողամասերը վարձակալության տրամադրելու հիմքերը սահմանված են ՀՀ հողային օրենսգրքով, իսկ քաղաքացու նշած՝ Մարգարյան եւ Բաշինջաղյան փողոցների հատման մասում գտնվող առեւտրի կրպակով ծանրաբեռնված հողամասը վարձակալության տրամադրելու հիմքեր չկան:

Բդեյանն իր օրինական պահանջը բավարարելու համար դիմել է նաեւ դատարան: Նրա պաշպան Մանուշակ Հակոբյանը ՀԺ-ին հայտնեց, որ հարցում է արել Երեւանի քաղաքապետարան, որտեղից հայտնել են՝ տեղյակ չեն, թե ով է արել, բայց նաեւ քաղաքապետարանը շարունակում է տարածքը Լյուդմիլա Բդեյանին չտրամադրել:

Պաշտպանի խոսքով՝ Բդեյանը բազմիցս քաղաքապետարանին առաջարկել է վճարել տվյալ շինության ու տարածքի կադաստրային արժեքը, սակայն չեն համաձայնել: Պաշտպան Հակոբյանը նաեւ նշեց, որ քաղաքացի Բդեյանը լիարժեք իրավունք ունի տնօրինելու այդ տարածքին՝ վկայակոչելով ՀՀ հողային օրենսգրքի 72-րդ հոդվածը: Սույն հոդվածի 2-րդ մասով սահմանված է, որ քաղաքացիները եւ իրավաբանական անձինք, որոնք ավելի քան տասը տարի անընդմեջ բարեխիղճ ու բացահայտ, սակայն առանց իրենց իրավունքների իրավաբանական ձեւակերպման օգտվում են պետության կամ համայնքի հողերից, ունեն այդ հողերից սեփականության իրավունքով հողամասեր ձեռք բերելու նախապատվության իրավունք, եթե արգելված չէ սեփականության իրավունքով տվյալ հողամասը ձեռք բերելը կամ, եթե դրանք վաճառվում կամ անհատույց փոխանցվում են միեւնույն նպատակային նշանակության համար:

Երեւանի քաղաքապետարանից «Հայկական ժամանակին» հայտնեցին՝ քանի որ գործը դատարանում է, զերծ կմնան որեւէ մեկնաբանություն տալուց: