Լատինական Ամերիկան՝ կորոնավիրուսի ամենամեծ էպիկենտրոն. աշխարհում ավելի քան 8,3 միլիոն վարակակիր կա

 Ջոն Հոփքինսի անվան հետազոտական համալսարանի տվյալներով, ներկա պահին աշխարհում հաշվվում է կորոնավիրուսով վարակված ավելի քան 8,3 միլիոն մարդ, նրանցից 450 հազարը մահացել են:

Վարակի տարածման էպիկենտրոններից մեկը ներկա պահին մնում է Լատինական Ամերիկան, մի շարք երկրներում նկատվում է համաճարակի երկրորդ ալիքը:

Covid-19-ի մասին վերջին տեղեկությունները ներկայացնում է BBC-ն:

Մեծ Բրիտանիայում մեղադրում են ու հետազոտում

Մեծ Բրիտանիայի արտաքին գործերի նախարար Դոմինիկ Ռաաբը մեղադրել է Ռուսաստանի Դաշնությանը, Չինաստանին ու Իրանին՝ համավարակով պայմանավորված իրավիճակը սեփական շահերի նպատակով օգտագործելու համար: Որպես օրինակ, նա նշել է Չինաստանի կողմից Հոնկոնգի նկատմամբ ուժեղացված հսկողության սահմանումը:

Հոնկոնգի բնակչությունը հաճախ համաձայն չէ կղզային Չինաստանի վարած քաղաքականության հետ եւ հաճախ մեծամասշտաբ բողոքի ցույցեր է կազմակերպում՝ հեղեղելով փողոցները: Ռուսաստանն էլ, Ռաաբի կարծիքով, սիստեմատիկ կերպով ապատեղեկատվություն է տարածում առողջապահության պահպանման մասին՝ ինտերնետ-հարթակների եւ այլ մեթոդներով:

ՌԴ նախագահի մամուլի քարտուղար Դմիտրի Պեսկովը, արձագանքելով Ռաաբի ներկայացրած մեղադրանքներին, դրանք աբսուրդային է անվանել, քանի որ համաճարակի բռնկման օրից Ռուսաստանը, ըստ Պեսկովի, ամբողջ ուժով փորձել է համագործակցել կորոնավիրուսի դեմ պայքարում:

Միեւնույն ժամանակ, Լոնդոնի Արքայական քոլեջն աշխատություն է թողարկել, որտեղ պնդում է, որ սոցիալական ցանցերն ու համացանցը՝ առավելապես Facebook-ն ու YouTube-ը կարող են սպառնալ մարդկանց առողջությանը՝ կորոնավիրուսի մասին որոշ թեորիաներ տարածելիս: Հենց այդ հարթակներին հետեւելու արդյունքում շատ օգտատերեր կարծում են, որ հիմարություն է կարանտինի կանոններին հետեւելը եւ անտեսում են իշխանությունների պահանջները: Մարտ-ապրիլ ամիսներին Մեծ Բիրտանիայում անկացված հետազոտությունից պարզ է դառնում, որ երկրում ինտերնետ օգտագործողների մի մասը հակված է հավատալ, որ Covid-19-ը դիտավորյալ լաբորատորիայից դուրս թողնված վարակ է կամ 5G ցանցերի ճառագայթման արդյունք:

Չարլզի կորցրած հոտառությունն ու Մակրոնի այցը

Բրիտանական թագաժառանգ արքայազն Չարլզը, վերջերս մի խումբ բժիշկների հետ հանդիպման ժամանակ հայտնել է, որ կորոնավիրուսով վարակվելուց հետո կորցրել է հոտառության եւ համի զգացողությունը: Նա նաեւ կիսվել է վարակման պատմության սեփական փորձով: 71-ամյա արքայազնի մոտ կորոնավիրուս էր հաստատվել մարտին՝ Մեծ Բրիտանիայում վարակի տարածման սկզբում:

Հինգշաբթի օրը Ֆրանսիայի նախագահ Էմանուել Մակրոնը Լոնդունում էր: Այլ հարցերի հետ, նա երկրի վարչապետ Բորիս Ջոնսոնի հետ քննարկել է երկիր մուտք գործող բոլոր անձանց համար երշաբաթյա պարտադիր կարանտինի մասին բրիտանական կանոնը: Քննարկվել է հատուկ միջանցքի ստեղծումն այն երկրների համար, որտեղ վարակի տարածման տեմպը փոքր է, ներառյալ Ֆրանսիան: Առայժմ Մեծ Բրիտանիայում պարտադիր կարանատինը չի գործում միայն բրիտանական կղզիներից եւ Իռլանդիայից ժամանողների համար:

Մեծ Բրիտանիան շարունակում է մնալ համաճարակից ամենից շատ տուժած երկրներից մեկը Եվրոպայում: Վարակակիրների թվով այն աշխարհում հինգերորդ տեղում է, մահերի թվով՝ երրորդն աշխարհում:

Իրավիճակը՝ Եվրոպայի այլ հատվածներում

Գերմանիայում հազարավոր մարդիկ են մեկուսացվել՝ երկրի հյուսիս-արեւմուտյան Գյուտերսլո քաղաքում զանգվածային միջոցառումից հետո: Հազարից ավելի մարդ է թեստավորել, վարակ է հաստատվել նրանցից 650-ի մոտ, եւս մի քանի հազար մարդ սպասում է թեստավորման: 

Գերմանիայի կանցլեր Անգելա Մերկելը ԵՄ իշխանություններին կոչ է արել հնարավորինս շուտ պայմանավորվել երկարաժամկետ բյուջեի շուրջ եւ սկսել ֆինանսական միջոցներ հատկացնել ՝ թույլ եվրոպական տնտեսությունները վերականգնելու համար: Ելույթ ունենալով Գերմանիայի խորհրդարանում, նա ասել է,  որ Եվրոպային անհրաժեշտ է համերաշխություն `հաղթահարելու կորոնավիրուսային համաճարակի հետեւանքով առաջացած խորը տնտեսական ճգնաժամը: Ըստ նրա, համաճարակը հստակ ցույց տվեց, թե որքան փխրուն է Եվրամիություն կոչվող նախագիծը:

Հուլիսի 1-ից Գերմանիան կգլխավորի ԵՄ-ն ՝ 6  ամսով:

Ըստ Ռոսզդրավնադզորի, Ռուսաստանում կորոնավիրուսից մահացել է աշխատավայրում վարակված 489 բժիշկ: Սա հսկայական թռիչք է մայիս ամսվա վիճակագրության համեմատ, այդ ժամանակ COVID-19-ից մահացել էր բժշկական անձնակազմի 101 աշխատակից: Ռուսաստանի Դաշնությունն աշխարհում երրորդ տեղն է զբաղեցնում՝ կորոնավիրուսով վարակվածների թվով՝ ավելի քան 561 հազար մարդ:

Իսպանիայում իշխանությունները հայտարարել են, որ այս տարի աշխարհահռչակ գիշերային ակումբները Իբիցայում եւ Բալեարյան արշիպելագի մյուս կղզիներում չեն բացվի, եւ հնարավոր է ՝ չսկսեն աշխատել մինչև Covid-19- ի դեմ պատվաստանյութի ի հայտ գալը: Այս շրջանում տասնյակ հազարավոր երաժիշտներ, DJ- ներ եւ երաժշտասերներ գալիս էին Իսպանիայի կղզիներ: Շատ գիշերային ակումբներ բաց էին շուրջօրյա: Սա հսկայական արդյունաբերություն է, որն ապահովում է աշխատանքով ոչ միայն տեղի բնակչությանը, այլեւ սեզոնային եկամուտով  ԵՄ շատ քաղաքացիների:

Միաժամանակ, Իսպանիայի վարչապետ Պեդրո Սանչեսը հայտարարել է երկրի զբոսաշրջային արդյունաբերությունը փրկելու համար 4,2 միլիարդ եվրո հատկացնելու մասին: Ի թիվս այլ բաների, գումարները կծախսվեն իսպանական հանգստավայրեր գովազդելու, սանիտարական չափորոշիչների տրամադրման, ավիաընկերությունների համար հարկերի իջեցման վրա: Զբոսաշրջությունը կազմում է Իսպանիայի տնտեսության 12% -ը:

Հուլիսի 1-ից երկիր ժամանողները ստիպված չեն  լինի անցնել 14-օրյա կարանտին:

Լատինական Ամերիկան մնում է Covid-19-ի էպիկենտրոնը

Բրազիլիայի արեւելքում  բնակվող Ամազոնյան Կայապո ցեղի առաջնորդը մահացել է կորոնավիրուսից: 65-ամյա Պաուլինյո Պայջանը հայտնի էր որպես Ամազոնյան ջունգլիների ամենաքաջ պաշտպաններից մեկը:

Covid-19-ի վարակվածության ցուցանիշներով Պերուն շրջանցել է Իտալիային: Պերուն Բրազիլիայից հետո կորոնավիրուսից տուժած երկրորդ երկիրն է Լատինական Ամերիկայում:

Ներկա պահին Լատինական Ամերիկայում կորոնավիրուսը տարածվում է մեծ մասշտաբներով, այն այժմ համարվում է վարակի տարածման առումով ամենամեծ էպիկենտրոնն աշխարհում: