Կորոնավիրուսից ավելի հաճախ տղամարդիկ են մահանում. 70-ից բարձր անձինք քիչ են վարակվում, բայց մեծ մասամբ մահացու ելքով

Հունաստանը բացել է իր զբոսաշրջային այցեքարտը՝ կղզիները, սակայն զբասաշրջիկները հունական կղզիներ դեռեւս չեն կարող մտնել: Եվրոպան շարունակում է թուլացնել կարանտինը, Գերմանիայի տնտեսությունը փակուղի է մտել, իսկ Ճապոնիայում ամբողջությամբ հանվել է արտակարգ դրության ռեժիմը: Ամբողջ աշխարհում կորոնավիրուսի համավարակը շարունակում է առկախված սպառնալիք մնալ, տնտեսությունները շարունակում  են անկում ապրել, մարդիկ՝ ահաբեկվել, իսկ ցուցանիշները՝ աճել ու աճել:

Աշխարհում կորոնավիրուսի հաստատված դեպքերի թիվը հասնում է արդեն 5,5 միլիոնի: Այդ ցուցանիշի 1,5 միլիոնից ավելին, ըստ Ջոն Հոփքինսի անվան ամերիկյան հետազոտական համալսարանի տվյալների, բաժին է ընկնում ԱՄՆ-ին: Ճիշտ է, Միացյալ Նահանգների ցուցանիշների հետ անհամեմատելի տվյալներով, բայց երկրորդ տեղում արագորեն հայտնվել է Բրազիլիան՝  մոտ 363 հազար դեպքով: Երրորդ տեղում շարունակում է մնալ Ռուսաստանի Դաշնությունը՝  ավելի քան 350 հազար դեպքով:

Եվրոպական երկրները շարունակում են աստիճանաբար թուլացնել կարանտինային միջոցառումները: Դրանք շարունակվում են արդեն մի քանի շաբաթ շարունակ, բայց պետությունների ղեկավարությունները, սահմանափակումների վերացման կամ թուլացման հետ մեկտեղ մտավախություն ունեն, որ վարակի երկրորդ ալիքը կարող է սպառնալ բոլորին: Նման մտավախություն ունի նաեւ Առողջապահության համաշխարհային կազմակերպությունը:

Վարակի տարածման բազմաթիվ հետազոտությունները փաստում են  COVID-19-ի տարածվելու  ինտենսիվությունը: Եթե տարածման տեմպերը կրկին բարձրանան սահմանափակումները  արդեն իսկ թուլացրած երկրներում, ապա կառավարությունները կրկին ստիպված կլինեն դիմել խիստ միջոցառումների, հնարավոր է՝ անգամ ավելի խիստ, քան նախկինում:

Գերմանիայում, որտեղ կարանտինը թուլացրել էին դեռ ապրիլին, առայժմ հաջողվում է խուսափել վարակակիրների թվի եւ մահերի կտրուկ աճից: Վերջին օրերին Գերմանիայում Covid-19-ի 289 նոր դեպք է հաստատվել, մահացել է վարակակիր 10 հիվանդ: Համաճարակի բռնկումից ի վեր Գերմանիայում, ընդհանուր առմամբ, կորոնավիրուսի178 հազար դեպք է հաստատվել: Ռոբերտ Կոխի ինստիտուտի՝ կիրակի օրը հրապարակված զեկույցի տվյալներով, նրանց ճնշող մեծամասնությունը՝ մոտ 160 հազար մարդ, առողջացել է:

Ինստիտուտում ուսումնասիրել են համաճարակի եւ վարակակիրների հետ կապված վիճակագրությունը: Այդ ուսումնասիրությամբ պարզվել է, որ վարակը միաժամանակ եւ նույնկերպ թիրախավորում է եւ՛ տղամարդկանց, եւ՛ կանանց: Այս պահի դրությամբ, աշխարհում վարակակիրներնի շարքում կանայք ավելի մեծ թիվ են կազմում՝ 52 տոկոսը կանայք են, 48 տոկոսը՝ տղամարդիկ: Մահացածների շարքում, ընդհակառակը՝ ավելի մեծ թիվ են կազմում տղամարդիկ՝ 55 տոկոս: Հետազոտությունը ցույց է տվել, որ ամենից ռիսկային խումբը 70 տարեկանից բարձր անձինք են, նրանք քիչ են վարակվում, սակայն  մեծ մասամբ հիվանդությունը նրանց համար ավարտվում է մահվան ելքով: Մինչ այժմ ամբողջ աշխարհում վարակվածների թվի 19 տոկոսն են կազմում 70-ն անց մարդիկ, սակայն մահացածների ընդհանուր թվի գերակշիռ մասը՝ 86 տոկոսը հենց այդ տարիքային խմբի մարդիկ են:

Այս տարվա առաջին եռամսյակում գերմանական տնտեսությունը ծանր անկում է ապրել, այս մասին նշվում է այսօր հրապարակված պաշտոնական վիճակագրության մեջ:

Ըստ Դաշնային վիճակագրության գրասենյակի տվյալների, առաջին եռամսյակում Գերմանիայի ՀՆԱ-ն նախորդ եռամսյակի համեմատ նվազել է 2.2% -ով: Վիճակագրությունը ցույց է տալիս արտահանման, սպառման եւ ներդրումների կտրուկ անկում: Փորձագետները ակնկալում են, որ անկումը կշարունակվի երկրորդ եռամսյակում, այնուհետ տնտեսությունը կսկսի վերականգնվել:

Հունական կղզիներն այսօրվանից կրկին բաց են Հունաստանի բնակիչների համար: Կղզիների եւ երկրի մայրցամաքային մասի միջեւ կրկին սկսել են լողալ լաստանավերը: Կղզիները ամբողջովին փակվել էին մարտ ամսվից, երբ երկրում ներդրվեց կարանտինային ռեժիմ:

Ավելի վաղ Հունաստանի վարչապետ Կիրիակոս Միցոտակիսը հայտարարել էր, որ երկիրը այլ երկրի զբոսաշրջիկների համար կբացվի հունիսի 15-ից: Դա ավելի շուտ է նախնական կանխատեսումներից ու սպասումներից, սակայն օդային հաղորդակցությունը աշխարհի երկրների մեծ մասի հետ, ըստ վարչապետի,  կբացվի հուլիսին միայն: Նշենք, որ երկրի ընդհանուր ՀՆԱ-ի քառորդը ստացվում է զբոսաշրջությունից:

Հունաստանում Covid-19-ի համաճակի բռկման օրվանից կորոնավիրուսի բավական քիչ  թվով դեպքեր են գրանցվել՝ 2878 դեպք, 171 մահ:

Արտակարգ դրությունն, ի թիվս այլ երկրների, չեղարկվել  է նաեւ Ճապոնիայում: Ճապոնիայի վարչապետ Սինձո Աբեն հայտարարել է արտակարգ դրության ավարտի մասին: Երկրի ամբողջ տարածքով մեկ հանվել են բոլոր սահմանափակումները:

Աբեն նշել է, որ Ճապոնիայում այդ սահմանափակումները հանելու համար չափազանց խիստ քննադատության են ենթարկվել, սակայն կարծում են՝ երկրում առկա իրավիճակը համապատասխանում է սահմանափակումերը հանելու որոշմանը: Ըստ վարչապետի, Ճապոնիային հաջողվել է վերահսկողության տակ առնել համաճարակային իրավիճակը: Արտակարգ դրության ռեժիմը Ճապոնիայում սահմանվել էր ապրիլի 7-ին, աստիճանաբար թուլացվել՝ մայիսի կեսերից:

Այսօր հրապարակված տվյալների համաձայն, Ճապոնիայում մինչեւ օրս կորոնավիրուսի 16.550 դեպք է հաստատվել եւ 820 մահ:

Թե ինչպիսին կլինի աշխարհի օդանավակայանների աշխատանքը՝  սահմանափակումները հանելու պարագայում եւ ինչպես կկարողանան դիմակայել ուղեւորահոսքին օդանավակայանները, իսկ մեծաթիվ զբոսաշրջիկների հոսքին՝ ընդունող  երկրները, դեռ դժվար է կանխատեսել: Որոշ օդանավակայաններում, օրինակ ուղեւորների համար նախատեսված հատուկ լվացարաններ են տեղադրվել, որոնք աշխատում են 20 վայկրկյան՝ յուրաքանչյուր սեղմումի ժամանակ, որպեսզի ապահովեն ձեռքերի ամբողջական մաքրում:

Աշխարհի մի քանի օդանավակայաններում էլ, օրինակ, արդեն տեղադրվել են 40 վայրկյանում մարդուն ամբողջությամբ ախտահանող հատուկ սարքեր: Ընդամենը պետք է մտնել փոքրիկ խցիկը, սպասել 40 վայրկյան եւ դուրս գալ: