Մայք Պոմպեոն մեկնել է Իսրայել. Թրամփի քարտեզն ու հակամարտության պլանը՝ քննարկման թիրախում (լուսանկարներ)

Աշխարհում կորոնավիրուսի համաճարակի տարածման պահից մինչ այսօր ԱՄՆ պետքարտուղարի առաջին արտասահմանյան այցն իրականացվել է այսօր՝ դեպի Իսրայել:

Ազգային դրոշի գույներով պատկերված  անձնական պաշտպանիչ դիմակով,  Մայք Պոմպեոն հյուրընկալող երկրում  պահպանել է  սոցիալական հեռավորության եւ անձնական պաշտպանության բոլոր ցուցումները:

Euronews-ը հայտնում է, որ մեկնաբանելով այցի նպատակները ՝ ԱՄՆ Արտաքին գործերի նախարարության ղեկավարն ասել է. «Մենք մտադիր ենք քննարկել խաղաղության հասնելու  ծրագրերը: Այն պահից, երբ ճանապարհային քարտեզի մանրամասները հրապարակվեցին նախագահ Դոնալդ Թրամփի կողմից, բավական ժամանակ է անցել, մենք պետք է հետագա քայլերը քննարկենք տվյալ ուղղությամբ»:

Հունվարին Իսրայելի կառավարության ղեկավարը և ԱՄՆ վարչակազմի ղեկավարը հայտարարեցին պաղեստինա-իսրայելական նոր խաղաղ կարգավորման կարևորագույն դրույթների մասին, միևնույն ժամանակ հայտարարվեց, որ Վաշինգտոնը մտադիր է Իսրայելի Արևմտյան ափին գտնվող հրեական բնակավայրերը ճանաչել որպես իսրայելական տարածք:

Այդ ժամանակ Ռուսաստանի Դաշնությունը հայտարարեց, որ այդ ծրագրերի իրականացումը կխաթարի Մերձավոր Արևելքի հակամարտության կարգավորման ամբողջ գործընթացը:

Նախօրեին պաշտոնական Մոսկվան կրկին հաստատեց ավելի վաղ ասված խոսքերը: 

Euronews-ը նաև փոխանցում է, որ Իսրայելում Մայք Պոմպեոն հանդիպել է Վարչապետ Բենյամին Նեթանյահուին և «Կահոլ-Լավան» դաշինքի ղեկավար Բենի Հանցի հետ, որը ներկայումս ղեկավարում է իսրայելական քնեսետը,  հանդիպել է  նաև նախկին գլխավոր շտաբի պետ Գաբի Աշխենազիի հետ: Հենց Աշխենազին է այս հինգշաբթի ստանձնելու Իսրայելի արտգործնախարարի պաշտոնը:

TACC-ը, մեկնաբանելով Պոմպեոյի այցը Իսրայել, գրում է, որ հրեական պետության կողմից Պաղեստինի տարածքների բռնակցումը Արևմտյան ափին և Հորդանանի հովտում քննարկումը չի եղել ԱՄՆ պետքարտուղար Մայք Պոմպեոյի Իսրայել կատարած ուղևորության նպատակ:

ԱՄՆ-ի արտաքին գերատեսչության  ներկայացուցիչները հայտնել են, որ Պոմպեոյի օրակագրում այդ հարցը չի եղել առանցքային տեղում:

Նշենք, որ Պոմպեոն արտասահմանյան ուղեւորություններ չէր կատարել արդեն 2 ամիս՝ Միացյալ Նահանգներում կորոնավիրուսի բռնկումից ի վեր:

Ավելի վաղ The Jerusalem Post-ը հայտնել էր, որ  Իսրայելում Պոմպեոյի բանակցությունների հիմնական թեմաներից մեկը ԱՄՆ նախագահ Դոնալդ Թրամփի խաղաղության պլանը կյանքի կոչելու քայլերն են:

Ապրիլի 22-ին Մայք Պոմպեոն հայտարարել էր, որ պաղեստինա-իսրայելական հակամարության լուծման ամերիկյան տարբերակի  վերաբերյալ վերջնական որոշումը կախված է Իսրայելից:

Ռուսաստանի Դաշնության արտաքին գործերի նախարարության պաշտոնական ներկայացուցիչ Մարիա Զախարովան մեկնաբանել էր ծրագիրը՝ նշելով, որ Իսրայելի նոր կառավարության առաջարկած պլանների իրականացումը ՝ Արևմտյան ափին մի շարք տարածքների մասին, կխաթարի Մերձավոր Արևելքի կարգավորման գործընթացը: Նա շեշտել է, որ Ռուսաստանը անհրաժեշտ է համարում պահպանել կարգավորման միջազգային իրավապայմանագրային դաշտը, ներառյալ Անվտանգության խորհրդի և ՄԱԿ-ի Գլխավոր ասամբլեայի բանաձևերը:

Նախագծի համաձայն՝ Երուսաղեմը լինելու է Իսրայելի անբաժան մայրաքաղաքը, իսկ Իսրայելի ինքնիշխանությունը տարածվելու է Հորդանան գետի արեւելյան ափի մի մասի նկատմամբ: Թրամփը միաժամանակ Պաղեստինին առաջարկել է սեփական մայրաքաղաքն ունենալ Արեւելյան Երուսաղեմում, որտեղ ԱՄՆ-ը «հպարտորեն» դեսպանատուն կբացի: Բացի այդ, ԱՄՆ նախագահը խոստացել է, որ համաձայնության դեպքում Պաղեստինում 50 մլրդ դոլարի ներդրումներ կանի:

Իսրայելի վարչապետ Բենյամին Նեթանյահուն առաջարկն անվանել է «իրատեսական տարբերակ» ՝ տարածաշրջանում երկարաժամկետ խաղաղության հասնելու համար:  Մինչդեռ Պաղեստինի ազգային ինքնավարության ղեկավար Մահմուդ Աբբասը եւ արմատական իսլամիստական «Համմաս» շարժման քաղաքական բյուրոյի ղեկավար Իսմայիլ Հանիան վճռականորեն մերժել են Սպիտակ տան ղեկավարի պլանը:

Նշենք, որ պաղեստինաիսրայելական հակամարտության «բանալի» համարվող Թրամփի այս նախագիծը եւ քարտեզը 3 տարի մշակել է Թրամփի փեսա ու խորհրդական Ջերարդ Քուշները:

Պլանի հիմքում ընկած Է 2 պետությունների փոխադարձ ճանաչումը: Պաղեստինի տարածքը, որը բաղկացած Է Գազայի հատվածից եւ Հորդանան գետի արեւմտյան ափից, առաջարկվում Է անխզելիորեն կապել արագընթաց տրանսպորտային հաղորդակցությամբ. այդ կերպ, Թրամփի խոսքով՝ արաբական պետության տարածքը պետք Է կրկնակի մեծանա:

Բացի այս, ԱՄՆ-ը  մտադիր Է օրինական ճանաչել հրեական բնակավայրերը Հորդանան գետի արեւմտյան ափի օկուպացված պաղեստինյան հողերում:

Փաստաթղթում հատուկ ուշադրություն Է դարձվում Երուսաղեմի կարգավիճակին. Վաշինգտոնն առաջարկում Է արաբական պետության մայրաքաղաք ճանաչել Արեւելյան Երուսաղեմը, եւ միաժամանակ Իսրայելի «անբաժանելի մայրաքաղաք» համարել ամբողջ Երուսաղեմը:

ԱՄՆ-ի նախագահը որպես հաշտության գործընթացի պայմաններ Է նշել այն, որ Պաղեստինի իշխանությունների կհրաժարվեն Գազայում գործող «Համմաս» արմատական շարժման աջակցությունից, ինչպես նաեւ զինված պայքարի մեթոդներից:

Պաղեստինը դեմ է ամերիկյան ծրագրին եւ Թրամփի հրապարակած քարտեզին: