«Ովքեր ՀԴՄ կտրոն չեն թողարկել, այս ծրագրով որեւէ աջակցություն չեն ստանա»․ կառավարությունը եւս 1 միջոցառում հաստատեց

ՀՀ կառավարությունն այսօրվա նիստում հաստատեց կորոնավիրուսի տնտեսական հետեւանքների չեզոքացման տասներորդ միջոցառումը, որի նպատակն է միանվագ դրամաշնորհի տրամադրման միջոցով օժանդակել միկրոձեռնարկատիրության սուբյեկտ հանդիսացող առանձին տնտեսավարողներին:

Նախագիծը ներկայացրեց ՀՀ պետական եկամուտների կոմիտեի նախագահ Դավիթ Անանյանը՝ նշելով, որ միկրոձեռնարկատերերը, որոնք ներկա պահին աջակցության կարիք ունեն՝ կապված կորոնավիրուսի տարածման ու Հայաստանում հայտարարված արտակարգ դրության հետ, աջակցություն կստանան կառավարությունից:

«Մենք առաջնահերթ խրախուսում ենք այն միկրոձեռնարկատերերին, որոնք իրենց մատակարարած ապրանքներն ու մատուցած ծառայությունները պատշաճ ձևով փաստաթղթավորել են: Միաժամանակ, շահառու են նաեւ այն ձեռնարկատերերը, որոնց համար ՀԴՄ-ի կիրառումը պարտադիր չի եղել կամ ՀԴՄ չեն ունեցել, քանի որ նրանց հայտը չի բավարարվել»,- ասաց Անանյանը:

Միջոցառման շահառու են 2020 թվականի հունվարի 1-ից հետո Հայաստանի Հանրապետության հարկային օրենսգրքով սահմանված կարգով միկրոձեռնարկատիրության սուբյեկտ հանդիսացող այն անձինք, որոնք` 

1. 2019 թվականին Հայաստանի Հանրապետության հարկային օրենսգրքով սահմանված կարգով հանդիսացել են ընտանեկան ձեռնարկատիրության սուբյեկտ,
2. 2019 թվականին հանդիսացել են անհատ ձեռնարկատեր չհանդիսացող ֆիզիկական անձինք և «Ինքնազբաղված անձանց հարկային արտոնությունների մասին» Հայաստանի Հանրապետության օրենքով սահմանված կարգով ունեցել են հարկերից ազատման արտոնագիր,
3. 3.2020 թվականի հունվարի 1-ից հանդիսանում են անհատ ձեռնարկատեր չհանդիսացող ֆիզիկական անձ և 2019 թվականին չեն հանդիսացել սույն մասի առաջին և երկրորդ կետում նշված անձ, ինչպես նաև հաշվառված չեն եղել որպես անհատ ձեռնարկատեր։

Աջակցությունը տրամադրվում է միանվագ՝ շահառու հանդիսացող անձանց կողմից 2020 թվականի առաջին եռամսյակի ընթացքում մատակարարված ապրանքների, մատուցված ծառայությունների եւ կատարված աշխատանքների իրացման շրջանառության 10 տոկոսի չափով, բայց ոչ ավելի, քան նվազագույն աշխատավարձի կրկնապատիկի չափով»

Շահառու հանդիսացող անձանց տրամադրվում է միանվագ աջակցություն նվազագույն աշխատավարձի չափով, եթե՝

1. շահառու անձինք 2020 թվականի ապրիլի 1-ի դրությամբ Հայաստանի Հանրապետության պետական եկամուտների կոմիտեի (այսուհետ՝ ՀՀ ՊԵԿ) «Հսկիչ-դրամարկղային մեքենաների ներդրման գրասենյակ» պետական ոչ առևտրային կազմակեպություն ունեն ներկայացված հսկիչ-դրամարկղային մեքենայի ձեռք բերման հայտ, սակայն ՀՀ ՊԵԿ տեղեկատվական շտեմարանում դեռևս ակտիվացված նոր սերնդի հսկիչ-դրամարկղային մեքենա  չունեն.
2. հանդիսանում են սույն հավելվածի երկրորդ մասի երրորդ մասով սահմանված շահառու հանդիսացող անձ։ 

Շահառու հանդիսացող անձանց կողմից 2020 թվականի առաջին եռամսյակի ընթացքում մատակարարված ապրանքների, մատուցված ծառայություններիեւև կատարված աշխատանքների իրացման շրջանառություն է համարվում ՀՀ ՊԵԿ հաշվարկային փաստաթղթերի դուրս գրման էլեկտրոնային համակարգում շահառու հանդիսացող անձի կողմից դուրս գրված հաշվարկային փաստաթղթերում արտացոլված հասույթների և ՀՀ ՊԵԿ տեղեկատվական շտեմարանում առկա նոր սերնդի հսկիչ-դրամարկղային մեքենաների ֆիսկալային հասույթների հանրագումարը։

Սույն աջակցությունից չեն կարող օգտվել այն անձինք՝

որոնց կողմից 2020 թվականի առաջին եռամսյակի ընթացքում մատակարարված ապրանքների, մատուցված ծառայությունների եւ կատարված աշխատանքների իրացման շրջանառությունը գերազանցել է վեց միլիոն դրամը. 

ովքեր 2020 թվականի հունվարի 1-ից մինչև ապրիլի 1-ն ընկած ժամանակահատվածում ունեցել են երկու եւ ավելի աշխատակից.

ովքեր հանդիսացել են (հանդիսանում են) ՀՀ կառավարության կորոնավիրուսի չեզոքացման մնացած միջոցառումների շահառու։

ՀՀ վարչապետ Նիկոլ Փաշինյանն ասաց, որ հակաճգնաժամային այս միջոցառումներն ունեն օպերատիվ բնույթ:

«Բայց մեր որոշումների մեջ կա մի կարեւոր առանձնահատկություն՝ ամեն ինչ անում ենք, որ այդ որոշումներն ունենան ռազմավարական կոմպոնենտ, որը կապ ունի մինչեւ այժմ վարած մեր քաղաքականության եւ ապագային միտված մեր քաղաքական պատկերացումների հետ:
Այս որոշումը նույնպես այն դեպքերից է, երբ որ կա այդպիսի ռազմավարական մոտեցում եւ հիմքում դրված է միկրոձեռնարկությունների գրանցած շրջանառությունը: Այսինքն, միկրոբիզնեսի այն ներկայացուցիչները, ովքեր պարտաճանաչ արձանագրել են իրենց կատարած առեւտուրը հսկիչ դրամարկղային կտրոնների միջոցով, նրանք ավելի շատ աջակցություն կստանան, իսկ նրանք, ովքեր ՀԴՄ կտրոն չեն թողարկել, այս ծրագրով որեւէ աջակցություն չեն ստանա»,- ասա վարչապետը:

Նա հավելեով, որ սա տնտեսական աջակցության ծրագիր է եւ, ըստ էության, այս ծրագրով այդ մարդիկ տնտեսական գործունեություն չեն ծավալել եւ պետք է նայեն, թե նրանց ինչպիսի աջակցության փաթեթներ կարող են առաջարկել։

Նիկոլ Փաշինյանն ընդգծեց, որ իրենք բոլոր միջոցառումների մեջ հաշվի են առնում սոցիալական, տնտեսական, ռազմավարական կոմպոնենտը:

«Մենք այս շրջանում առավելագույնս պետք է խրախուսենք տնտեսվարող այն սուբյեկտներին, ովքեր նախաճգնաժամային ժամանակաշրջանում աչքի են ընկել իրենց օրինապահ կեցվածքով եւ գործելակերպով»,- ասաց վարչապետը։