Կորոնավիրուսը մշակութային ու արժեհամակարգային բեկում է բերել. Trend Union-ի հիմնադիր

Աշխարհում տարբեր ոլորտների զարգացման հիմնական ուղղությունների, տրամադրությունների, մտածողության փոփոխությունների կանխատեսման՝ Trend Union ընկերության հիմնադիրն անդրադարձել է այն հարցին, թե ինչպիսին կինի աշխարհն այն ժամանակ, երբ COVID-19-ը դադարի սպառնալիք լինել մարդկության համար:

Ըստ Լի Էդելկորտի՝ կորոնավիրուս կոչվող համաշխարհային խնդրի շնորհիվ կվերականգնվեն մի շարք մարդասիրական արժեքներ: Նա COVID-19-ն անվանում է «սպառման կարանտին» և նշում, որ դա ունենալու է մշակութային և տնտեսական լրջագույն փոփոխություններ: Ուզենք-չուզենք, ստիպված ենք լինելու կրճատել մեր ծախսերը, սովորել ավելի քիչ ճանապարհորդել, քանի որ վիրուսը հարվածում է ոչ միայն մարդկանց, այլև ազդում է ժամանակակից աշխարհում բոլոր գործընթացների վրա՝ խանութ առաքվող ապրանքներից սկսած, ուղևորափոխադրումներով վերջացրած: Լին նշում է, որ շուտով աղջիկները կսկսեն ուրախանալ ամենապարզ հագուստները կրելով, իրենց համար կրկին կբացահայտեն հին սիրված իրերը, կվերսկսեն գիրք կարդալ: Այսինքն՝ մարդիկ ստիպված կլինեն քիչ սպառել և կսովորեն բավարարվել իրենց ունեցածով:

Նաև, նրա խոսքով, կարող է թվալ սարսափելի և ցինիկ, բայց փաստը մնում է փաստ՝ երբեմն այն, ինչ վատ է մարդկանց համար, լավ է բնության համար և շահեկան՝ էկոլոգիական տեսանկյունից: Լին հիշեցնում է, որ Չինաստանի մթնոլորտի վերջին օրերի լուսանկարները ցույց են տվել, որ արտադրությունը կրճատելուց հետո երկինքը բավական մաքրվել է, ածխածնի արտանետումներն ու արդյունաբերական աղտոտումը նվազել են: Միայն թե էկո-բոնուսը լիարժեք գնահատելու համար, պարզ է որ հարկավոր կլինի ավելի երկար ժամանակ:

Աղետի՝ մոլորակի մասշտաբով մեկ այլ դրական հետևանք է, ըստ Էդելկուրտի, աշխատանքային հարաբերությունների նոր համակարգի ստեղծումը և առհասարակ բոլոր տեսակի աշխատանքների նկատմամբ ավելի մեծ հարգանքը, արտադրության ավելի հարմարավետ պայմանների կազմակերպումը, որ կհաջորդի այս համավարակին:

Կորոնավիրուսի բռնկումից խուսափելու համար մեծաթիվ մարդկանց մասնակցությամբ նշանակալից իրադարձությունների չեղարկումը կազմակերպիչներին կստիպի որոնել իրադարձությունների նոր ձևաչափեր, դա վերաբերում է նաև տեղեկատվության փոխանցման նորարարական եղանակներն առավել կիրառական դարձնելուն:

Նշենք, որ թեպետ 70-ամյա Էդելկուրտը համարվում է զարգացման միտումների ոլորտում աշխարհի ամենաազդեցիկ տեսաբաններից մեկը, սակայն դեռ հինգ տարի առաջ նա հայտարարել է, որ նորաձևությունը՝ իր այսօրվա դրսևորմամբ, այլևս կենսունակ չէ, իսկ նորաձևության արդյունաբերությունը հասել է աբսուրդի, դարձել ինքն իր ողորմելի պարոդիան: Այս անդրադարձում էլ Լին ընդգծել է, որ այս իրավիճակում նորաձևության ցուցադրությունները տարօրինակ և անտեղի կթվան, ճանապարհորդության գովազդը՝ ծիծաղելի, ապագայի համար նախատեսված պլանները՝ ոչ համոզիչ... ... Եվ արդյոք այդ ամենը ընդհանրապես կարևո՞ր կլինի: Արդյունքում, մենք ակամա ամեն նոր օր կասկածի տակ կդնենք այն համակարգը, որ գիտենք մեր ծննդյան պահից:

Կորոնավիրուսի ազդեցությունը մեզ կստիպի դանդաղեցնել կյանքի առօրյա ռիթմը՝ հրաժարվելով ինքնաթիռ նստելուց, կստիպի տնից աշխատել, զվարճանալ միայն մտերիմ ընկերների կամ ընտանիքի շրջանում. այն մեզ կսովորեցնի լինել ինքնաբավ և ուշադիր:

Եվ չնայած մենք արդեն սկսել էինք հասկանալ, որ մոլորակը պահպանելու (և հենց մեր գոյատևման) համար անհրաժեշտ էին կտրուկ միջոցներ՝ փոխել մեր կենսափիլիսոփայությունը, իրերի սպառումն ու արտադրությունը, զվարճանքի եղանակները, կորոնավիրուսը զգալիորեն կարագացնի այս գործընթացը, և հնարավոր է, որ անի այն, ինչը մինչ այժմ ի վիճակի չէր իր ազատ կամքով անել մարդկությանը:

Երիտասարդներն այլևս չեն ձգտի ձեռք բերել, ունենալ շատ իրեր՝ հագուստ, ավտոմեքենա: Դա այլևս գրավիչ չի լինի: էականորեն կկրճատվի Չինաստանից պլաստիկե կենցաղային իրերի ու սինթետիկ հագուստի արտահանումը Հնդկաստան ու Աֆրիկա, որ խաթարում են այդ երկրների տնտեսությունների զարգացումը և, միևնույն ժամանակ, աղտոտում շրջակա միջավայրը: Կորոնավիրուսը կվնասի շքեղ ապրանքանիշներին և կհարվածի հյուրանոցային բիզնեսին:

Բայց նաև հնարավորություններ կտրվեն տեղական արհեստագործական համայնքներին, կիրառական արվեստներին, այն բոլոր ոլորտներին, որտեղ ձեռքի աշխատանքը գնահատվում է: Մենք ստիպված կլինենք ստեղծել նոր տնտեսություն՝ ապրանքների արտադրության, փոխադրման և բաշխման այլ արժեքներով և մեթոդներով, մանրածախ սկզբունքներով:

Վերապրելու համար մենք ստիպված կլինենք փոխվել. սովորել ավելի քիչ սպառել, այդ թվում՝ նաև ինֆորմացիա, հրաժարվել մեր սովորությունների մեծ մասից, ինչպես «թմրանյութերից»: Եվ եթե Լի Էդելկորթն, ամեն դեպքում, իրավացի է, ապա «բեկումն» անխուսափելի է: